Read Zokam 2 Khangthute 28 Bible Online

2 Khangthute 28 - Zokam bible

2 Khangthute 28

¹Ahaz kumpi a suahin kum sawmnih pha a, Jerusalem ah kum sawm le guk sung a uk hi. A pa David tawh kibang loin TOPA muhna ah amaanin na a sem kei hi.

²Amah in Israel uliante lampite tawn a Baal biak nadingin milimte a sung hi.

³Amah in Ben Hinnom Kuam ah biaknate hala, TOPA in Israel-te mai-a a hawlkhiat minamte zuih a kihhuai lampite zui-in biakna-in a tapate mei-in a hal hi.

⁴Amah in munsangte, mualte tung le singhiangzau nuai tengah biakna pia in gimnamtui a hal hi.

⁵Tua ahi ciangin TOPA ama Pasian in Aram kumpipa khutah a pia hi. Aram-te in amah zo uh a ama mite tampitak thong ah khumin Damascus ah a puak uh hi. Amah zong Israel kumpite khut sungah kipia-a, tuapa in tampi khelbawlin a that hi.

⁶Ni khat Remaliah tapa Pekah in Judah ah galkap tul zakhat le tul sawm nih a that hi - bang hang hiam cih leh Judah in TOPA a pate uh Pasian a taisan hi.

⁷Ephraim-te galhangpa Zicri in kumpipa tapa Maaseiah, kumpi inncing ukpa Azrikam le kumpipa zompa Elkanah a that hi.

⁸Israel-te in amau sanggam pasalte panin zite, tanute le tapate tul zanih sal-in a kai uh hi. Amaute in van kinusia tampitak zong la uh a Samaria ah a pua kik uh hi.

⁹Ahi hangin Oded min nei TOPA kamsangpa khat tua lai-ah om a, galkapte Samaria a tun kik uh ciangin amaute tawh kimu dingin a pai hi. Amah in amaute kiangah, "TOPA na pate uh Pasian, Judah tungah heh ahi manin amaute no khut sungah hong pia hi. Ahi hangin hehna tawh amaute na golum uh a, tua pen vantungah a tung hi.

¹⁰Tuateh tu-in Judah le Jerusalem numei le pasalte sila-in khawi na sawm lai uh hi. Ahi hangin no zong TOPA note Pasian tungah khialhna-in mawh hi lo na hi uh hiam?

¹¹Tu-in ka thugen ngai dih un! TOPA no tungah heh lua ahi manin thongkia a na laksa uh na gam mipihte uh puak kik un," a ci hi.

¹²Tua ciangin Ephraim sung makai pawlkhatte - Jehohanan tapa Azariah, Meshillemoth tapa Berekiah, Shallum tapa Jehizkiah, le Hadlai tapa Amasa-te in - galsim hong tungte a na maitang salh uh hi.

¹³Amaute in, "Tua thongkiate hih lai-ah hong puak peuhmah kei un, nong puak uh leh TOPA mai-ah i mawh ding hi. I mawhna le i khialhna behlap lai sawm na hi uh hiam? I khialhnasa lian mahmah khin ahi manin amah Israel tungah heh lua khin ta hi," a ci uh hi.

¹⁴Tua ciangin galkapte in thongkiate le a vanlakte uh uliante le a kikhawm mipite muhna ah a nusia uh hi.

¹⁵A mina kilote in thongkiate la uh a guaktanga omte khempeuh vanlak pana puante a silhsak uh hi. Amaute in puansilhte le khedapkaihte, annek tuidawnte, le damna zatuite a sik uh hi. A hatlote laa tungah a tuangsak uh hi. Tua bangin amaute gammite kiang Nisuh Khuapi Jericho ah paipih kik uh a, tuateh Samaria ah a ciah kik uh hi.

¹⁶Tua hun laitakin Kumpi Ahaz in Assyria kumpipa c[96] kiangah huhna ngen ding a sawl hi.

¹⁷Edom-te kuan kikin Judah sim uh a thongkiate a puamang uh hi,

¹⁸tua hun laitakin Philistia-te in mualbul-a khuapite le Judah a Negev a luh uh hi. Amaute in Beth Shemesh, Aijalon le Gederoth tawh Soco, Timnah le Gimzo a kima khuaneute tawh lakhawmin a teng uh hi.

¹⁹Israel d[97] kumpipa Ahaz in Judah sungah gitlohna khangsak a, TOPA tungah muanhuai lo lua ahi manin TOPA in Judah a niamkhiat ta hi.

²⁰Assyria kumpipa Tiglath-Pileser e[98] ama kiangah a pai hangin a huh sangsikin lungkhamna a guanzaw hi.

²¹Ahaz in TOPA biakinnpi pan le kumpi inn pan le uliante panin na tawmciat la a, tuate Assyria kumpipa a piak hangin tua in amah a huh zo tuan kei hi.

²²Kumpi Ahaz a lungkham hun sung nangawn in TOPA tungah a muanhuai kei zaw lai hi.

²³Amah in, "Aram kumpipa’ pasiante in amaute huh ahi nungsang amaute in kei hong huh nadingin amaute tungah biakna ka pia ding hi," ci-in ngaihsun ahi manin amah a zo Damascus pasiante tungah biakna a pia hi. Ahi hangin amaute ama pukna le Israel khempeuh pukna a suak uh hi.

²⁴Ahaz in Pasian biakinnpi pana vanzatte kaikhawm-a a lakhia-mang f[99] hi. Amah in TOPA biakinnpi kongkhakte khak a, Jerusalem kongzing kiu tengah biakna-taute a omsak hi.

²⁵Judah khuapi sung tengah munsangte bawlin pasian dangte tungah biakna hal-a, TOPA a pate uh Pasian heh nadingin a phin hi.

²⁶Ama uk sunga a nasepte le ama lampi khempeuh a kipatna pan a tawpna dong Judah le Israel kumpite laibu sungah kigelh hi.

²⁷Ahaz a pate tawh tawlnga khawma Jerusalem khuapi sungah a kivui hangin Israel kumpi han sungah a kikoih kei hi. Tuateh a tapa Hezekiah in a kumpi za luah a kumpi a suak hi.