Read Zokam 2 Khangthute 30 Bible Online

2 Khangthute 30 - Zokam bible

2 Khangthute 30

¹Hezekiah in Israel le Judah khempeuh ah kam paisak a, Ephraim le Manasseh ah zong lai khakin, Jerusalem a TOPA biakinnpi ah pai-in TOPA Israel Pasian tungah Paisan pawi bawl dingin amaute a sam hi.

²Kumpipa le a uliante le Jerusalem a om kikhawm mi buppi in Paisan pawi bawl hun ding a kha nihna kha dingin a khensat uh hi.

³Siampite a kicing ding zah ki-ap zo nai lo uh a, Jerusalem ah mite kikhawm zo den lo uh ahi manin amaute in hun manin pawi a bawl zawh lohsa uh ahi hi.

⁴Kumpipa le a kikhawm mipite geelkhawmna ah man le kilawm hi.

⁵Amaute in Beersheba pan Dan ciang dong Israel buppi ah tangko sawlin, Jerusalem ah mite pai-in TOPA Israel Pasian tungah Paisan pawi bawl dingin sap dinga a khensat uh ahi hi. A kigelhsa tawh kizui-in pawi a bawl loh uh sawtpi hi khin hi.

⁶Kumpipa thupiakna tawh, laitaite in kumpipa le a uliante tung pana laikhakte; Israel le Judah buppi-ah paipih kawikawi uh a, tua laite sungah: "Israel mite aw, Assyria kumpite khut sung pana note hong suaktasakpa, TOPA Abraham, Isaac le Israel Pasian, hong kinusia note lamah hong kihei theih nadingin ama lamah kihei kik un.

⁷Note in na muh uh bangin a lauhuai-a nasemte a suah nadingun TOPA a pate uh Pasian tunga a muanhuai lo na pate uh le a sanggampate uh bang kei un.

⁸Na pate uh bangin ngawngkhauh kei un; TOPA tungah kipumpiak un. Amah in a tawntung adingin a apsa munsiangtho hong zuan un. Note panin a hehluatna a kiheimang theih nadingin TOPA note Pasian na sem un.

⁹TOPA note Pasian hehpih siamin khuatuah thei ahi manin TOPA lamah na kihei uh leh na sanggampate uh le na tate uh a mante in khuatuah ding uh a, hih gamah hong kileh kik ding uh hi. Ama lamah na kihei uh leh amah in hong lehngatsan kei ding hi," ci-in kigelh hi.

¹⁰Ephraim le Manasseh sung khuapi khat pan khuapi khatah laitaite pai uh a, Zebulun dong a tung uh hi, ahi hangin mite in amaute zahpihin a nuihsan uh hi.

¹¹Tua hi napi Asher, Manasseh le Zebulun a mi pawlkhat kiniam-khiatin Jerusalem ah a pai uh hi.

¹²TOPA kammal zui-in kumpipa le a uliante thupiaksa a tangtun nadingin Judah sungah zong Pasian khut in kigawm khawm nopna lungsim a guan hi.

¹³A kha nihna sungin Silngo - sawhloh Anlum Pawi bawl dingin mihon tampitak Jerusalem ah a kikhawm uh hi.

¹⁴Amaute in Jerusalem sunga biakna-taute phelkhia uh a, gimnamtui-taute hemmangin Kidron Kuam sungah a pai uh hi.

¹⁵Amaute in a kha nihna a nisawm le lina ni-in Paisan tuuno a go uh hi. Siampite le Levi-te maizum uh a amau le a mau ki-ap tawmin TOPA biakinnpi ah meihal biakna a puak uh hi.

¹⁶Tua ciangin amaute in Pasian mipa Moses Thukham sunga kilak bangin a panmun ngei uh a luah uh hi. Levi-te in amaute a piak uh sisante siampite in a theh uh hi.

¹⁷Mihonte lakah amau le amau a ki-ap nai lo tampi om a, biakna ngeina-in a sianglo khempeuh adingin Levi-te in Paisan tuunote a gawhsak kei uh leh a tuuno uh TOPA tungah a pia thei kei uh hi.

¹⁸Tua a kisiansuah lo tampite a tampen Ephraim, Manasseh, Issachar le Zebulun pana paite hi a, tua hi napi a kigelhsa tawh kilehbulhin Paisan a ne uh hi. Ahi hangin Hezekiah in amaute adingin thu ngen a, "A hoih TOPA aw,

¹⁹a lungsima Pasian zong peuhmah - TOPA amaute Pasian aw - munsiangtho ngeina tawh kituakin amah a sian loh hangin maisak in," a ci hi.

²⁰Tuateh TOPA in Hezekiah ngetna za a, mite a damsak hi.

²¹Jerusalem a om Israel mite in ni sagih sung Silngo-sawhloh Anlum Pawi gualnuamtakin bawl uh a, tua hun sungin Levi-te le siampite in TOPA phatna tumtheihte tawh thuahin nisimin TOPA tungah la a sa uh hi. b[101]

²²Hezekiah in TOPA nasepna hoihtaka a lak thei Levi-te khempeuh tungah hanthawnna kam a gen hi. Tua ni sagihte sung teng amaute in amau tanh dinga kiseh ciat ne uh a, kilawmtakna biaknate c[102] pia-in TOPA a pate uh Pasian a phat uh hi.

²³Tua ciangin a kikhawm mihonpi bup in ni sagih sung pawi bawl lai ding thukim uh a, tua ciangin amaute in adang ni sagih sung gualnuamtakin pawi a bawl lai uh hi.

²⁴Judah kumpipa Hezekiah in a kikhawm mipi adingin bawngtal tulkhat le tuu le keel tul sagih sik a, uliante in bawngtal tulkhat le tuu le keel tulsawm a sik uh hi. Siampite tampitak amau le amau a ki-ap uh hi.

²⁵A kikhawm Judah mi buppi - siampite le Levi-te tawh, Israel pana kikhawmte, Israel pana pemtate le Judah a teng pemtate khempeuh tawh a gualnuam khawm uh hi.

²⁶Israel kumpipa David tapa Solomon huna kipan hih bang om ngei nai lo ahi manin Jerusalem a lungnopna a lian mahmah hi.

²⁷Mite thupha pia dingin siampite le Levi-te ding uh a, amaute thungetna ama munsiangtho - vantung ah tunga Pasian in a za hi.