Read Zokam 2 Khangthute 31 Bible Online

2 Khangthute 31 - Zokam bible

2 Khangthute 31

¹Hihte khempeuh a ven ciangin tua lai-a om Israel-te, Judah-te’ khuapite ah pai uh a, suang siangthote satzanin Asherah khuamte a phuk uh hi. Amaute in Judah le Benjamin sung le Ephraim le Manasseh sung khempeuh ah munsangte le biakna-taute a susia uh hi. Amaute in tuate khempeuh a suksiat khit uh ciangin Israel-te amau neihsa khuapite ah a ciah kik uh hi.

²Hezekiah in siampite le Levi-te a khenkhenin seh a - siampite le Levi-te amau nasepna ciat - meihal biaknate le kilawmtakna biaknate a[103], biakna nasep le lungdamkohnate le TOPA tenna kongpite ah phatna late a sa dingte a seh hi.

³Kumpipa in zing le nitaka meihal biaknate ading, Sabbath-te, Kha Thakte le TOPA Thukham sunga kigelh a kisehsa pawite adingin ama neihsa panin a pia hi.

⁴TOPA Thukham ah siampite le Levi-te amau le amau a ki-ap theih naidngun Jerusalem a teng mite in amau ngah dinga kilawm zah a piak nadingun thu a pia hi.

⁵Thupiakna a suahkhiat khit phetin Israel-te in a an panun gahmasate, zu thak, sathau le khuaizu le lo-a piang khempeuh phaltakin a pia uh hi. Amaute in na khempeuh-a sawma khat, tampitak a puak uh hi.

⁶Judah khuapite a teng Judah-te le Israel-te in zong a ganhonte uh le a tuuhonte uh sawma khat le TOPA amaute Pasian tunga ki-ap a siangtho nate sawma khat puak uh a, a lompi in a ciang uh hi.

⁷Amaute in hih nasep a kha thumna-in kipan uh a, a kha sagihna-in a man uh hi.

⁸Hezekiah le a uliante pai-in a lompite a muh uh ciangin TOPA phatin Israel mite thupha a pia uh hi.

⁹Hezekiah in siampite le Levi-te kiangah a lompite thu a dong hi;

¹⁰Zadok innkuan pana siampi uk Azariah in, "Mite in TOPA biakinnpi ah a kiseh nate a puak-ua kipan kote in ka nek ding uh a cingin ka ngah uh a, khol ding tampi ka nei uh hi; bang hang hiam cih leh TOPA in a mite thupha pia a, hizah tak aval ahi hi," ci-in a dawng hi.

¹¹Hezekiah in TOPA biakinnpi sungah vankholna inndei bawl dingin thu pia-a a kibawl hi.

¹²Tua ciangin amaute in a kisehte, sawma khat le a ki-ap letsongte muanhuaitakin a puak uh hi. Levi-te khat Conaniah in hih nate uk-a, a sanggampa Shimei ama zoma zalian ahi hi.

¹³Kumpipa Hezekiah le Pasian biakinnpi uk ulianpa Azariah sehna tawh Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath le Benaiah-te Conaniah le a sanggampa Shimei nuai-ah a encik ding ahi uh hi.

¹⁴Nisuahna Kongpi cingpa Levi-te Imnah tapa Kore in Pasian tunga kipia utthu-a biaknate, TOPA tungah piak dinga kisehte le a ki-apsa letsongte zong uk ding hi.

¹⁵Eden, Miniamin, Jeshua, Shemaiah, Amariah le Shecaniah-te in khuapite sunga siampite muanhuaitakin huh ding uh a, amau siampi naseppihte tungah a khenkhen zui-in a moi a hamin amau ngah ding ciat a kibangin a hawmsak ding uh hi.

¹⁶Tua banah, khang ciamtehna sungah a min a kiciamteh kum thum le a tungsiah pasalte - amau hih theihna tawh kizui-in amau khena amau kisapna munah a nisim nasep a sem TOPA biakinnpi sungah a lut peuhmah tanh pia uh hi.

¹⁷Tuateh amaute in khangthu ciamtehna sunga amau innkuan siampi-a kiciamtehte le tua mah tawh kibanga kiciamteh Levi-te kum sawmnih pan a tungsiahte amau khena a nasepna uh tawh kizui-in a pia ciat uh hi.

¹⁸Amaute in a taneute uh, a zite uh, le mihon buppite tanute, tapate - amaute khangsimna sungah min kiguala kiciamteh peuhmah a helkhawm uh hi. Ahang in, amaute amau le amau ki-apna ah a muanhuai uh hi.

¹⁹Khuapi kima lokhawhna mun le khuapi dangte a teng Aaron suan siampite adingin ahileh amaute laka teng pasal khempeuh tung le khang simna sunga min kigelh Levi-te tungah a hawmkhia dingin mi a minin kisehtuam hi.

²⁰Hezekiah in Judah gam sung khempeuh ah hih bangin hih a, TOPA a Pasian mai-ah a hoih a maan le a muanhuai pen-a a hih ahi hi.

²¹Amah in Pasian biakinnpi sunga nasepna ah thukham le thupiakte mangin Pasian zonga a lungsim khempeuhin na a sem hi. A tuaci sep manin a lamzang hi.