Read Zokam 2 Khangthute 32 Bible Online

2 Khangthute 32 - Zokam bible

2 Khangthute 32

¹Hezekiah in muanhuaitakin a sep khempeuh a zawh khit ciangin Assyria kumpipa Sennacherib kuanin Judah a luh hi. Amahmah in zawh sawmin kulh a ki-um khuapite a umcih hi.

²Sennacherib kuanin Jerusalem sim a sawm lam Hezekiah in a muh ciangin,

³khuapi pua-a luang tuinakte panin tui khaktan ding thu a uliante le a galkap uliante kikuppih a, amaute in amah a huh uh hi.

⁴Mi thahat tampi khawm uh a gam sunga a luangkhia tuinakte le luite khempeuh a khaktan uh hi. Amaute in, "Bang hangin Assyria kumpite b[104] hong pai-in tui tampi mu ding uh ahi hiam?" a ci uh hi.

⁵Tua ciangin kulh kitapna munte khempeuh le a tunga tausangte bawlin na nakpi-in a sem uh hi. Amah in a omsa pen pua-ah kulh khat cianbeh a, David Khuapi dinkipna leicialte c[105] a cianbeh lai hi. Galhiamte le lumte zong tampitak a bawl beh hi.

⁶Amah in mite a uk dingin galkap mangte seh a, khuapi kongpi mai-a tual-awng ah amaute kikhawmsakin hanthawn a:

⁷"Hat unla hang un. Assyria kumpipa le ama ompih galkap honpi sangin eite hong ompihpa vanglianzaw ahi manin kihta kei unla lungkia kei un.

⁸Amah a ompih ci-le-sa galhiam hi beka ei hong ompih ahileh eite hong huh i galte hong dosak ding TOPA eite Pasian ahi hi," ci-in thu a gen hi. Tuateh Judah kumpipa Hezekiah gennasa panin mite a lungmuang uh hi.

⁹Tua khit Assyria kumpipa le a galkapte khempeuh in Lachish a umcih uh ciangin Jerusalem ah a uliante sawl-a, Judah kumpipa Hezekiah le tua lai-a om Judah mi khempeuh adingin hih thu khak a:

¹⁰"Assyria kumpipa Sennacherib gen hih ahi hi: A ki-umcih Jerusalem ah na om uh bang bulphuha kimuang na hi uh hiam?

¹¹Hezekiah in, ‘Assyria kumpipa khut panin TOPA eite Pasian in eite hong hon ding hi,’ ci-in hong makaih khial-a, gilkial dangtakin hong sisak ding ahi hi.

¹²Hezekiah mahmah in pasiante munsangte le biakna-taute phiatkhia in Judah le Jerusalem tungah, ‘Note in biakna-tau khat mai-ah bia-in tua tungah biaknate na hal pelmawh ding uh hi,’ ci hi lo ahi hiam?

¹³"Kei le ka pate in gamdanga mite khempeuh tungah ka hihsate uh thei lo na hi uh hiam? Tua minamte’ pasiante in kei khut panin a gam uh hukhia thei ngei uh ahi hiam?

¹⁴Ka pa in a siatsaksa hih minamte’ pasiante khempeuh kua pen in kei panin a mite honkhia thei ahi hiam? Kei khut sung panin note Pasian in bangci-in hukhia zo ding hiam?

¹⁵Tu-in hih bangin Hezekiah kikhemsakin kimakaih-khialsak kei un. Amah um kei un, minam ahikeh kumpi-gam khat pasian khatpeuh in a mite kei khut panin ahi-a, ka pate khut panin ahi zongin a hukhia thei kei uh hi. Na pasian un kei khut panin note hong hu zo ngel ve!"a cisak hi.

¹⁶Sennacherib uliante in TOPA Pasian le a nasem Hezekiah langkhatah a uangzaw thamin kam a pau uh hi.

¹⁷Kumpipa in TOPA Israel Pasian engkona laikhakte zong gelh a, ama langkhatah: "Adang gammite pasiante in ka khut panin amau mite a hutzawh loh bang tektekin Hezekiah pasian in zong a mite kei khut panin a hukhia zo kei ding hi," a ci hi.

¹⁸Tua ciangin amaute lau uh a, khuapi a lak theih nadingun amaute a linglawngsak dingin kulh tunga om Jerusalem mite tungah Hebrew pau-in nakpi in a genkhia uh hi.

¹⁹Amaute in amau bawltawm - mihingte khuta kibawl leitung midangte pasiante thu bang lelin Jerusalem a Pasian thu a gen uh hi.

²⁰Hih thu tawh kisai-in Kumpi Hezekiah le Amoz tapa kamsangpa Isaiah thungenin van tungah a kiko uh hi.

²¹Tuateh TOPA in Assyria kumpipa giahphual-a om galkapte le makaite le uliante khempeuh a susiamang ding vansawltak khat a sawl hi. Tua ciangin amah lungkia-in a gamah a nungkik ta hi. Tuateh ama pasian biakinn sungah a pai ciangin a tapate pawlkhat in namsau-in amah a thatlum uh hi.

²²Tuaci-in Assyria kumpipa Sennacherib khut pan le a dangte khempeuh khut panin TOPA in Hezekiah le Jerusalem mite a honkhia hi. Amah in amaute a[106] mun citeng panin a don hi.

²³Mi tampi in Jerusalem ah TOPA adingin biaknate puak uh a, Judah kumpipa Hezekiah adingin letsong manphate a puak uh hi. Tua huna kipan minamte khempeuh in amah a sangmuh mahmah uh hi.

²⁴Tua hun lai-in Hezekiah a ci na-in a si dektak hi. Amah in TOPA tungah thu ngen-a, amah in dawngin lim piandang khat a lak hi.

²⁵Ahi hangin Hezekiah lungtang kiphasak a, amah a kilak migitna a dawng nuam kei hi; tua ahi ciangin TOPA thangpaihna ama tung le Judah tung le Jerusalem tungah a tu hi.

²⁶Tua ciangin Hezekiah in a lungsim kiphatsakna kisik-a, Jerusalem mite zong a kisik uh hi; tua ahi ciangin Hezekiah a nuntak sungin TOPA thangpaihna amaute tungah a tung kei hi.

²⁷Hezekiah hau mahmah in kipahtawi mahmah a, a ngun a kham le a suangmanphate, gimnamtuite, lumte le van manpha namkim koih nading vankholnate a bawl hi.

²⁸Amah in an, zu thak le sathau khol nading innte zong a lam hi; tuateh ganhon namkim khum nadingin ganbuk bawl a, tuuhonte adingin tuubukte a lam hi.

²⁹Pasian in hauhna tampitak pia ahi manin amah in khuaneute lam a tuuhonte le ganhonte tampitak a ngah hi.

³⁰Gihon tuinak tungnung khaktan in khekhia a, hawkguam to-in David Khuapi nitumna lamah a luangsakpa Hezekiah mah ahi hi. Amah in a nasepna khempeuh a zo hi.

³¹Ahi hangin a gamsungua piang lim piandang thu a dong dingin Babylon gam-ukte in palai a sawl uh ciangin, ama lungsim-a om khempeuh a theih nadingin a zia-etna-in Pasian in amah a nusia hi.

³²Hezekiah uk sunga a sepsa dangte le a ki-ap zawhna dangte Judah le Israel kumpite laibu sunga Amoz tapa kamsangpa Isaiah mangmuhna sungah kigelh hi.

³³Hezekiah a pate tawh tawlnga khawm a David suante han omna mualtung ah a kivui hi. Amah a sih ciangin Judah khempeuh le Jerusalem a mite in a pahtawi uh hi. Tuateh a tapa Manasseh in a kumpi za luaha kumpi a suak hi.