Read Zokam 2 Khangthute 35 Bible Online

2 Khangthute 35 - Zokam bible

2 Khangthute 35

¹Josiah in Jerusalem ah TOPA Paisan-pawi bawl-a a kha masa pen a ni sawm le lina ni-in Paisan tuuno kigo hi.

²Amah in siampite amau nasepna mun ah seh a, TOPA biakinnpi sunga amaute nasepna ah a hanthawn hi.

³Amah in Israel khempeuh lam a lak TOPA tunga a ki-apsa Levi-te tungah: "Israel kumpipa David tapa Solomon lamsa biakinnpi sungah a siangtho singkuangpi koih un. Na liangko un na pua kei ding hi. Tu-in TOPA note Pasian le ama mi Israel na sem un.

⁴Israel kumpipa David le a tapa Solomon in lamlahna a gelhsa bangin a khenkhenin a innkuan zui-in kithawikhol ciat un.

⁵"Na gam mipihte uh a khentuam-te minautang ahi manin Levi-te pawlkhat tawh mun siangtho ah dingkhawm un.

⁶Na gam mipihte uh adingin Paisan tuunote go unla, no le no ki-apin tuunote sa bawl unla Moses tunga TOPA thupiak bangin sem un," a ci hi.

⁷Tua lai-a om minautangte khempeuh in Paisan pawi-a biakna-a a zat ding uh tuu le keel a kigawmin tul sawmthum Josiah in sik a, bawngtal tulthum zong a sik lai hi - a vekpi in kumpipa neihsate pan ahi hi.

⁸A uliante in zong amau utthu-in mipite le siampite le Levi-te tungah a khenkhia uh hi. Pasian biakinnpi a, a saipite ahi Hikiah, Zechariah le Jehiel-te in Paisan pawi-a biakna gante tulnih le zaguk le bawng zathum siampite a pia uh hi.

⁹Conaniah in zong a sanggamte Shemaiah, Nethanel le Levi-te makaite Hashabiah, Jeiel, le Jozabad-te tawh Paisan pawi-a biakna gan tulnih le zaguk le bawngtalpi zanga Levi-te a sik uh hi.

¹⁰Kikhop nading kithawi khina, kumpipa thupiaksa bangin siampite amau munah dingin, Levi-te amau khenkhen ah a om dimdiam uh hi.

¹¹Paisan tuunote kigo a, Levi-te in ganhingte vunte a hawk laitakun, amaute a kipia sisante siampite in a theh uh hi.

¹²Amaute in Moses laibu sunga kigelh bangin, a innkuan zui-a a khenkhena om mite in meihal biakna-a a piak dingun a kipia dingte a tuamkoih uh hi. Amaute in bawngte zong a kibangin a hih uh hi.

¹³A kigelkholsa bangin amaute in Paisan gante mei-ah hang uh a, a siangtho biaknate, beelte, taubeelpi-te le sikbeelpite in huan uh a, mipite khempeuh tungah manlangin a lui uh hi.

¹⁴Hihte khit ciangin amaute le siampite ading a bawl uh hi; bang hang hiam cih leh Aaron suan siampite in meihal biakna le sathaute zan hun dongin a hal uh hi. Tua ahi ciangin Levi-te in amau ading le Aaron siampigui-te adingin sa a bawl uh hi.

¹⁵David, Asaph, Heman le kumpipa thumupa Jeduthun-te gualhsa munah Asaph suan tumtheih siamte a om uh hi. Kongpi cingte tangin a lawmte un bawlsak khin uh ahi manin amaute in a omna uh a laih ding uh a kisam kei hi.

¹⁶Tuaci-in Kumpi Josiah thupiak bangin Paisan pawi bawl nading le TOPA biakna-tau tungah meihal biakna piak nadingin tua hunin TOPA nasep nading buppi kimansiang hi.

¹⁷Tua hunin tua lai-a Paisan pawi a bawl Israel-te in Silngo-sawhloh Anlum Pawi ni sagih sung a bawl uh hi.

¹⁸Kamsang Samuel huna kipan Israel sungah tua bangin Paisan pawi a kibawl ngei nai kei hi; tuateh Josiah bawl bangin siampite, Levi-te le Jerusalem mite tawh tua lai-a omkhawm Judah le Israel khempeuh tawh Paisan-pawi a bawl khawm Israel kumpi khat beek a om nai kei hi.

¹⁹Josiah kumpi a suah zawh a kum sawm le giatna kumin hih Paisan pawi kibawl hi.

²⁰Hihte khempeuh khit Josiah in biakinnpi a ngei a batsak khit ciangin Euphrates gei-a Carchemish ah do dingin Egypt kumpipa Neco kuanto a, amah tawh gal kido dingin Josiah a kuankhia hi.

²¹Ahi hangin Neco in ama tungah kamtai sawl a, "Judah kumpipa aw, nang le kei kikalah i kitot nading bang om ahi hiam? Tu hunin nang sim dinga hong kuan hi loin ka galte innkuan sim ding ka hizaw hi. Pasian in ka kinawh ding hong gen khin hi; kei hong ompih Pasian na langpanna khawl in; na khawl kei leh nang hong susia ding hi," a cisak hi.

²²Ahi zongin Josiah kileh kik nuam lo a, gal sungah amah tawh kido dingin a meel a seel hi. Amah in Pasian thupiak Neco gensa ngai nuam lo a, Megiddo zanglei ah amah tawh kido dingin a kuan hi.

²³Thal tawite in Kumpi Josiah kap uh a, amah in a uliante kiangah, "Hong paikhiatpih un; ka nak liam mahmah hi," a ci hi.

²⁴Tua ciangin amaute in a leng sung pan amah lakhia uh a, leng dang khatah koihin Jerusalem ah puak uh a, tua lai-ah a si hi. Amah a pate hanah kivui-a, Judah le Jerusalem khempeuh ama hangin a thum uh hi.

²⁵Jeremiah in Josiah tamlawhnate phuaka, numei le pasal lasate in a taamlawh uh ciangin tuni dong Josiah a kahtap uh hi. Hihte Israel ah tang ngeina suaka tamlawhna ah a kigelh hi.

²⁶Josiah in a uk sung thupiang dangte le TOPA Thukham sunga kigelh tawh kizui-in ki-ap a, a septe -

²⁷a nasep khempeuh a kipatna pan a tawpna dong Israel le Judah kumpite laibu sungah kigelh hi.