Read Zokam 2 Khangthute 36 Bible Online

2 Khangthute 36 - Zokam bible

2 Khangthute 36

¹Tuateh a gam mite in Josiah tapa Jehoahaz la in Jerusalem ah a pa tangin kumpi a suaksak uh hi.

²Jehoahaz a[116] kumpi a suahin kum sawmnih le thum hi-a, Jerusalem ah kha thum sung a uk hi.

³Egypt kumpipa in Jerusalem ah a kumpi za kiasak a, Judah tungah ngun talent b[117] zakhat le kham talent c[118] khat, siah in a kipiasak hi.

⁴Egypt kumpipa in Jehoahaz sanggampa Eliakim, Judah le Jerusalem kumpi suaksak a, Eliakim min Jehoiakim in a kheksak hi. Ahi hangin Neco in Eliakim sanggampa Jehoahaz la-in Egypt ah a paikhiatpih hi.

⁵Jehoiakim kumpi a suahin kum sawmnih le nga hi-a, Jerusalem ah kum sawm le khat sung a uk hi. Amah TOPA a Pasian muhna ah a sia-in gamta hi.

⁶Babylon kumpipa Nebuchadnezzar amah sim dingin kuanto-a Babylon a paipih dingin kol a bulh hi.

⁷Babylon kumpipa Nebuchadnezzar in TOPA biakinnpi d[119] sunga vanzatte zong Babylon ah la a, tua lai-a ama biakinnpi ah a koih hi.

⁸Jehoiakim uk sunga a sep dangte a kihhuai na a sepnate le amah pana kimu a ginatlohnate khempeuh Judah le Israel kumpite laibu sungah kigelh hi. Tuateh a tapa Jehoiachin in a kumpi za a luah hi.

⁹Jehoiachin kumpi a suahin kum sawm le giat e[120] hi a, Jerusalem ah kha thum le ni sawm sung a uk hi. Amah TOPA muhna ah a sia-in gamta hi.

¹⁰Khuakhal hun ciangin kumpi Nebuchadnezzar in amah vaikhak a, TOPA biakinnpi pana van manphate tawh Babylon ah puakhawmin, Jehoiachin pano f[121] Zedekiah, Judah le Jerusalem kumpi a suaksak hi.

¹¹Zedekiah kumpi a suahin kum sawmnih le khat hi a, Jerusalem ah kum sawm le khat sung a uk hi.

¹²TOPA ama Pasian muhna ah a sia-in gamta a, TOPA kammal a genpa kamsang Jeremiah mai-ah a kiniamkhiat kei hi.

¹³Amah Pasian mina a kiciamsak Nebuchadnezzar zong a lehdo hi. Amah ngawngkhauh a lungtang khauhsakin TOPA, Israel Pasian lamah a kihei nuam kei hi.

¹⁴Tua ban lai-ah siampi makaite khempeuh le mipite muanhuai lo semsem uh a, minamte kihhuai gamtatnate khempeuh zui-in amah in Jerusalem a, a apsa TOPA biakinnpi a buahsak hi.

¹⁵TOPA a pate uh Pasian in ama mite le a tenna mun tungah hehpihna nei ahi manin a kamtaite tungtawnin amaute tungah thu a khak kikkik hi.

¹⁶Ahi hangin TOPA thangpaihna mite tungah tungin a kidamsak zawh loh dong amaute in Pasian kamtaite zahko-in a kammalte simmawh uh a, ama kamsangte a zahpih uh hi.

¹⁷Amah in amaute langkhatah Babylon-te a[122] kumpipa puak a, amah in mun siangtho sungah khangnote namsau-in thata numeino pasalnote, le a tek a khang sit a nei kei hi. Pasian in amaute khempeuh Nebuchadnezzar tungah a pia khin hi.

¹⁸Amah in Pasian biakinnpi pan, TOPA biakinnpi goukholnate le kumpipa le a uliante goukholna-a vante aneu alianin Babylon ah a pua hi.

¹⁹Amaute in Pasian biakinnpi hal uh a, Jerusalem kulh phelkhia-in; kumpi-inn khempeuh haltum uh a, tua lai-a na manpha peuhmah a susia uh hi.

²⁰Amah in namsau pana suakta a baanglaite Babylon ah sal-in kai a, Persia kumpi-gam in vang a neih matengin amaute amah le a tapate nasem a suak uh hi.

²¹A gam in Sabbath tawlngakna nuamsa a; Jeremiah in TOPA kammal a gen a tangtun nadingin kum sawm sagih a cin dipdep matengin a kinusiat hun sungteng leitang a tawlnga hi.

²²Persia kumpipa Cyrus kumpi a suah a kum masapenin, Jeremiah gen TOPA kammal a tangtun theih nadingin TOPA in Persia kumpipa Cyrus lungsim hei-a a kumpi-gam sung tengah tangkosakin lai-in zong koihsaka tua lai sungah:

²³"Persia kumpipa Cyrus gen hih ahi hi: "‘TOPA vantung Pasian in leitung kumpi-gam khempeuh kei hong pia khina, Judah gam Jerusalem ah ama ading biakinnpi khat a lam dingin kei hong seh hi. Note lakah ama mi a om peuhmah - TOPA ama Pasian in ompih henla, amah paitosak hen,’ ci, hi." ci-in a gelh hi.