Read Zokam 2 Khangthute 6 Bible Online

2 Khangthute 6 - Zokam bible

2 Khangthute 6

¹Tua ciangin Solomon in: "TOPA in meii mial lakah ka teng ding hi, ci hi;

²keimah in a lian biakinnpi khat ka lam khin hi, na tenden nading mun khat ahi hi," a ci hi.

³Israel mi a kikhawm buppi tua lai-ah a din laitakun kumpipa nunghei-in amaute thupha a pia hi.

⁴Tua ciangin amah in: "Ka pa David tungah a kama a ciamsa a khutin a tangtungsak TOPA Israel Pasian kiphat ta hen. Ahang in,

⁵amah in, ‘Ka mite Egypt pan ka paikhiatpih a kipan ka Min om nadingin biakinnpi lam nading Israel behte khatpeuh ah khuapi khatpeuh ka teel kei a, ka mi Israel tunga makai dingin zong khatpeuh ka teel tuan kei hi.

⁶Ahi hangin tu-in ka Min om nadingin Jerusalem ka teela ka mi Israel-te uk dingin David ka teel khin ta hi,’ ci hi.

⁷"Ka pa David in TOPA, Israel Pasian Min adingin biakinnpi khat lam ding lungsimin a nei hi.

⁸Ahi hangin TOPA in ka pa David kiangah, ‘Ka Min adingin biakinnpi lam ding lungsim nei na hi manin na lungsimin hih na ngaihsut a pha hi.

⁹Ahi zongin biakinnpi a lam ding nang hi loin, na si le sa ahi na tapa hizaw hi - ka Min adingin biakinnpi lam ding pa amah ahi hi,’ ci hi.

¹⁰"TOPA in a thuciamsa a kiplet hi. Ka pa David za ka luah a, TOPA ciamsa bang tektekin Israel kumpi tokhom tungah ka tu a, TOPA Israel Pasian Min adingin biakinnpi ka lam khin hi.

¹¹Amah in Israel mite tawh a bawl TOPA thukhun kikoihna singkuangpi tua lai-ah ka koih khin hi," a ci hi.

¹²Tua ciangin TOPA biakna-tau mai-a kikhawm Israel mipi bup mai-ah Solomon dinga a khutte a zak hi.

¹³Tu-in amah in tong a[29] nga a sau tong nga a zai tong b[30] thum a sang sumngo tau khat bawlin inntual puanung pen laizangah a koih hi. Amah tau tungah dingin a kikhawm mipi buppi mai-ah khukdina vantung lamah a khut zanto in:

¹⁴"TOPA Israel Pasian aw, vantung ahi a leitung ahi zongin nang bang Pasian a om kei hi - nang in na nasemte tawh na itna thukhun na lungsim neih zahin na hihna a zomsuakpa na hi hi.

¹⁵Nang in na nasem ka pa David tungah na thuciam na lenkip hi; na kamin na ciama, na khutin tuni-a bangin na tangtungsak hi.

¹⁶TOPA Israel Pasian, tu-in na nasem ka pa David tunga na ciamsa, ‘Nang in ka mai-a na hihsa bangin na tapate in kidawm a, ka thukhamte tawh kituakin a kalsuan nak uhleh ka mai-a Israel kumpi tokhom tunga tu ding na kisam ngei kei ding hi,’ na cihsa lenkip in.

¹⁷Tua hi-a TOPA Israel Pasian aw, tu-in na nasem David tunga na kammal tangcingsak in.

¹⁸Ahi hangin leitungah mite tawh Pasian teng khawm takpi ding ahi hiam? Vante, a sang pen vante nangawn ah nang na ta zo kei hi. Hih ka lamsa biakinnpi lah neuzaw tham a!

¹⁹Tua hitaleh TOPA ka Pasian aw, na nasempa in na lainat ding hong ngetna le hong thumna thudon in. Na omna ah na nasempa hong kikona le hong thungetna na za in.

²⁰Na Min na koih nading na cihna mun hih biakinnpi lam sun le zanin hong en in. Hih mun lam nga-a na nasempa thungetna hong za in.

²¹Na nasempa le na mi Israel-te in hih mun lam nga-in hong thumna uh za in. Nangma tenna vantung panin za inla, na zak ciangin a mawhna uh maisak in.

²²"Mi khat a vengpa tungah khialin kiciamna a kisap a, hih biakinnpi sung na biakna-tau mai-ah a kiciam ciangin

²³vantung panin na za inla na sem in. Na nasemte kikal ah thu khen inla a khialpa mawhpaih in ama gamtatna ama lutungah tusak in. Mawhpengpa mawh-paih kei inla ama mawhpenna kipsak in.

²⁴"Na mi Israel-te nang tungah hong mawhna uh hangin gal khatpeuh in a zawh a, nang kiangah hong kileh kikin hih biakinnpi sunga na mai-ah na min pulakin thu hong ngenin hong thum uh leh

²⁵tua ciangin vantung panin na za inla na mi Israel a mawhna maisakin amaute pate tunga na piaksa gamah amaute puak kik in.

²⁶"Nang tungah na mite hong mawhna uh hangin vante kikhakin guah a zuk kei-a a mawhna uh hangin gimna na thuaksak a, amaute hih mun lam nga-in na min hong pulak uh leh,

²⁷tua ciangin van panin na za inla na nasemte, na mi Israel mawhna maisak in. Amaute nuntakna lampi man hilh inla na mite luah dinga na piaksa leitang ah guah zusak in.

²⁸"Hih gamah kialpi ahi-a pulpi ahi zongin a tuna, ahikeh ankung cinghteekna, ankung maibuakna, kaukhup, kauphe tunna ahikeh amau khuapite galte khatpeuh in umciha, haksatna, natna khatpeuh a tuah uh a

²⁹na mi Israel-te khatpeuh in thungetna ahi-a thumna ahi zongin hong bawl uh a - ama lungsim gimna kithei-in hih biakinnpi lamah a khut hong zak uh leh -

³⁰tua ciangin na tenna mun vantung panin na za in. Maisak-in ama lungsim na theihsa ahi nungsang ama sepsa khempeuh tawh kizui-in ama tungah tungsak in, (ahang in, nang bek in mihing lungsim khempeuh na thei hi),

³¹tua ciangin ka pate uh na piaksa gamah a ten laitengun nang hong kihta in na thu hong mang ding uh hi.

³²"Na mi Israel-te tawh a kisaikha lo ahi hanga na min liatna le na khut thahatna le na ban zankhiatna - hanga mun gamla pana hong pai gamdang mite hong pai-in hih biakinnpi lam nga-in thu hong nget uh ciangin,

³³na mi Israel-te theih bangin hih ka lamsa na inn in na Min a puak lam leitung mi khempeuh in thei-a, nang hong kihtak nadingin na tenna mun vantung panin na za inla gamdang mite hong nget peuhpeuh pia in.

³⁴"Na sawlna peuhah a galte uh sim dingin na mite a kuan uh ciangin na teelsa khuapi le nangma Min-a kilamsa biakinnpi lam nga-a thu hong nget uh ciangin

³⁵amaute thungetna le thumna vantung panin za inla amaute thu panpih in.

³⁶"Mawhna bawl lo mi khatbeek om lo ahi manin - amaute nang tungah hong mawh uh ciangin - amaute tungah nang heh-a a galte uh tungah pia-in a nai a gamla amaute gamah sal-in a kaih uh ciangin;

³⁷saltangin a omna uh gamah a lungsim uh kikhel-a amau saltanna gamah kisikin, ‘Ka mawh zo uh hi. Ka takhial khin uh a, gilo in ka gamta khin uh hi,’ hong cih uh a;

³⁸amaute sal-in a kikaihna gamah a lungsim khempeuh uh le a hinna uh tawh nang tungah hong kihei kik uh a, a pate uh na piaksa leitang lam, na Min a ka lamsa biakinnpi lam nga-in thu hong nget uh leh;

³⁹tua ciangin na omna mun vantung panin amau thungetna le amau thumnate za in, amaute thu panpih in. Tua teh nang tungah hong mawh na mite maisak in.

⁴⁰"Tu-in ka Pasian aw, na mit hong hakin hih muna thunget-nate na bil hong ngat in.

⁴¹"Tu-in TOPA Pasian aw, ding inla na khawlna munah hong pai in, nang le na thahatna singkuangpi pai ta un. TOPA Pasian aw, na siampite in hotkhiatna silh uh henla, nangma hoihna-ah na misiangte nuamsa uh hen.

⁴²TOPA Pasian aw, na sathau nilhpa nolh kei in. Na nasempa David tunga na ciamsa itna lianpi phawk gige in," a ci hi.