Read Zokam 2 Khangthute 7 Bible Online

2 Khangthute 7 - Zokam bible

2 Khangthute 7

¹Solomon a thunget a man ciangin van panin meikuang hong paisuk-a, meihal biakna le biakna-a kipiate hultumin TOPA minthanna biakinnpi sungah a dim hi.

²TOPA biakinnpi sungah TOPA minthanna dim ahi manin a sungah siampite a lut thei kei uh hi.

³Israel khempeuh in meikuang hong tuaksuk le biakinnpi tungsana TOPA minthanna a muh uh ciangin suangphah tungah leilam nga-in kunsuk uh a TOPA bia-in lungdam ko uh a: "Amah hoih hi; ama itna kip tawntung hi," a ci uh hi.

⁴Tua ciangin kumpipa le mite khempeuh in TOPA mai-ah biakna a pia uh hi.

⁵Tuateh Kumpi Solomon in bawngtalpi tul sawmnih le tul nih le keel tul za le tul sawmnih biakna piak khatin a pia hi. Tuaci-in kumpipa le mite khempeuh in Pasian biakinnpi a ap uh hi.

⁶Siampite amau panmun ah pang uh a, tua mah bangin Levi-te zong TOPA tumtheih vante tawh panmun a la uh hi. Tua tumtheihte pen, Kumpi David in TOPA phat nadinga a bawl hi a, amah in lungdam a koh ciangin tuate zangin, "Ama itna kip tawntung hi," a ci uh hi. Levi-te tawh kigalsai-in siampite in pengkul mut uh a, Israel-te khempeuh a ding uh hi.

⁷Solomon in TOPA biakinnpi tual laizang teng ap a, tua lai-ah meihal biaknate le kilawmtakna biakna a[31] thau a pia hi; bang hang hiam cih leh ama bawlsa sumngo biakna-tau ah meihal biaknate, an-a biaknate le a thaute a ta zo kei hi.

⁸Tua hun mahin Solomon in ni sagih sung pawi bawla, Israel khempeuh amah tawh omkhawmin - a kikhawm mihonpite, Lebo b[32] Hamath pan Egypt Wadi dong a dim hi.

⁹A nigiatna ni-in mipite a kikhawm uh hi, ahang in, amaute in ni sagih sung biakna-tau pawi pawl khin uh a, pawibawlna-in adang ni sagih sung a zang lai uh hi.

¹⁰A kha sagihna a ni sawmnih le thumna ni-in TOPA in David le Solomon le ama mi Israel tungah a hoih a bawlnate hangin lungnuamtak le kipaksa in amaute inn ah a ciahsak hi.

¹¹Solomon in TOPA biakinnpi le kumpi in lam man khina, TOPA biakinnpi sung le ama kumpi inn sungah hih dinga a ngaihsut khempeuh a man khit ciangin,

¹²zanin ama tungah TOPA kilang a: "Na thungetna ka za-a keimah biak piakna biakinnpi mun dingin hih lai ka teel khin hi.

¹³"Guah omloh nadingin vante ka khakcip ciang, gamsung a netum dingin kauphete thu ka piak ciang, mite lakah pulpi ka tunsak ciang,

¹⁴ka mina kilo ka mite amau mah kiniamkhiatin thu hong nget uh a, ka maitang hong zongin amaute a gitlohna panun a kihei uh leh tua ciangin vantung panin ka za dinga a mawhna uh maisakin a gam uh ka damsak ding hi.

¹⁵Tu-in ka mitte hakin hih muna thungetna-a kigente ka bil ka ngat ding hi.

¹⁶Tua lai-ah ka Min a om den nadingin hih biakinnpi teel khinin ka ap khin hi. Ka mitte le ka lungsim tua lai-ah a tu tawntung ding hi.

¹⁷"Nang adingin ahileh na pa David hih bangin ka mai-ah na kalsuan a, kong thupiak khempeuh hih in ka thukipte le ka thukhamte na zuih leh,

¹⁸na pa David tawh thu khungin, ‘Israel a uk ding mi na kisam kei ding hi,’ ka cih bangin na kumpi tokhom ka kipsak ding hi.

¹⁹"Ahi hangin kihei-in nang a[33] kong piak thupiakte le thukipte na b[34] taisan a pasian dangte na sem dingin paikhia-a tuate na biak leh

²⁰tua ciangin amaute ka piaksa ka leitang panin Israel ka botkhia dinga ka Min a ka apsa hih biakinnpi kong nolh ding hi. Mite khempeuh lakah thugentehna le ciamnuihna ka suaksak ding hi.

²¹Tua hi-a tu-in hih biakinnpi hoih a kisak mahmah hangin a tawnkha mi khempeuh in mulkim lua-in, ‘Bang hangin TOPA in hih gam le hih biakinnpi tungah hih bangin na sem ahi hiam?’ ci ding uh hi.

²²Mite in, ‘Bang hang hiam cih leh amaute in Egypt pana a paikhiatpih TOPA a pate uh Pasian taisan uh a, pasian dangte kawi-in amaute na semin bia uh a - tua ahi manin amaute tungah hih siatna khempeuh a tung ahi hi,’ ci-in dawng ding uh hi," a ci hi.