Read Zokam Ezra 3 Bible Online

Ezra 3 - Zokam bible

Ezra 3

¹A kha sagihna a tun ciangin amau khuapi-a tengsa Israel mihonpite mi khat bangin Jerusalem ah a kikhawm uh hi.

²Tua ciangin Jozadak’ tapa Jeshua, ama siampi-pihte le Shealtiel tapa Zerubbabel le amah a huhte in, Pasian mipa Moses thukham sunga kigelhsa bangin, a tunga meihal biakna piak nading Israel-te Pasian biakna-tau dawh ding a kipan uh hi.

³Amaute kima om mite kihta kawmkawmin a bulkip tung mahah biakna-tau dawh uh a, a tungah zingsang le nitakin TOPA tungah meihal biakna a pia uh hi.

⁴Tua ciangin a kigelhsa bangin nisima zat dinga, kisam zah meihal biaknate tawh nisimin amaute in Biakbuk Pawi a bawl uh hi.

⁵Tua khit ciangin amaute in a hunhunin meihal biaknate, Kha Thak sima biaknate le a kisehsa TOPA pawite bawlin tuate tawh TOPA tungah utthu-a biaknate a puakkhawm uh hi.

⁶A kha sagihna a ni masa pen ni-in TOPA biakinnpi bulpi suang a kingak nai loh hangin TOPA tungah meihal biaknate piak a kipan uh hi.

⁷Tua ciangin amaute in suangseek-te le khut siamte sum pia uh a, Sidon le Tyre mite in Persia kumpipa Cyrus tungpan a thu ngahna bangun tuipi-in Lebanon pan Joppa ah tamtak singluang a puaksuk nadingun annek tuidawn le sathau a pia hi.

⁸Jerusalem a Pasian inn a tun uh a kum nihna, a kha nihna kha in Shealtiel tapa Zerubbabel, Jozadak’ tapa Jeshua le amau sanggamte khempeuh (siampite le Levi-te le saltanna pan Jerusalem a ciah kikte khempeuh) in nasep pan uh a, TOPA inn lamna vaan dingin Levi-te, kum sawmnih pan a tungsiah phate a seh uh hi.

⁹Jeshua le a tapate le a sanggampate le Kadmiel le a tapate (Hodaviah suante) a[6] le Henadad’ tapate le amau tapate, le a sanggampate uh - Levi-te khempeuh kigawmkhawmin Pasian inn sepna a vaankhawm uh hi.

¹⁰TOPA biakinnpi lamte in innbul suang a ngak khit uh ciangin Israel kumpipa David gelkholhsa bangin siampite in a puan uh silh uh a, pengkul tawi kawmin, Levi-te (Asaph tapate) a daltuah uh tawh amau omna munah TOPA phat dingin a om uh hi.

¹¹Phatna le lungdamkohna tawh TOPA la sak uh a: "Amah hoih hi; Israel a itna kip tawntung hi," a ci uh hi. Tua ciangin mipi khempeuh nakpi takin awng uh a TOPA a phat uh hi; bang hang hiam cih leh TOPA innbul suang a kinga khin hi.

¹²Ahi hangin midang tampite lungdama a ot laitakun biakinnpi a masa pen a mu siampite, Levi-te le innkuan lutang a upa zawdeuhte in biakinnpi bul kinga khin a muh uh ciangin nakpi in a kap uh hi.

¹³Mipi gamlum lua ahi manin nuama kikona awging le kahna awging kuamah in a khentel thei kei hi. Tua hi a, gamlapi panin tua awging kiza hi.