Read Zokam Ezra 5 Bible Online

Ezra 5 - Zokam bible

Ezra 5

¹Tu-in kamsangpa Haggai le Iddo suan kamsangpa Zechariah in Judah le Jerusalem a om Jew-te tungah Israel-te’ Pasian minin thu a genkhol uh hi.

²Tua ciangin Shealtiel tapa Zerubbabel le Jozadak tapa Jeshua in Jerusalem a Pasian inn lam kik ding a kipan uh hi. Tuateh Pasian kamsangte amau tawh omin a huh uh hi.

³Tua hunin Euphrates-Gal a ukpipa Tattenai le Shethar - Bozenai le amau a huhte amau kiangah pai uh a, "Hih biakinnpi lamkikna le a khuam a zawlte khun, a ngeina bangin na sep uh kua hong thupiak ahi hiam?" ci-in a dong uh hi.

⁴Amaute in, "Hih innpi a lamte min bang ahi hiam?" a[13] ci-in zong a dong uh hi.

⁵Ahi hangin Pasian mit in Jew upate en gige a, Darius tungah thu va kitunin ama thukkikna lai-a gelhsa in a kingah masiah a tawp tuan kei uh hi.

⁶Hih in Euphrates-Gal gam ukpipa Tattenai le Shethar-Bozenai le amaute a huhte, Euphrates-Gal a uliante in, Kumpi Darius tunga a laikhak uh ahi hi.

⁷Amaute in thuzaksakna a khak uh a nuai-a bang ahi hi. Kumpipa Darius tungah: Itna cing tawh kong hopih hi.

⁸Kote Judah gamah pai-in alian mahmah Pasian biakinnpi a ka pai uh kumpipa in thei ta in. Tua pen mite in suangtum lianpipi tawh biakinnpi lam uh a, singluang golpipi in a kulh bawl uh hi. Tua nasep kizomsuakin kitelh mahmah a, amau makaihna hi-in kinawh sep mahmah hi.

⁹A upate uh ka dong uh a, "Hih biakinnpi lamkikna le a khuam a zawlte khun a ngeina bangin nasep uh kua hong thupiak hiam?" ka ci uh hi.

¹⁰Nang tunga thuzaksakna ah a makaite min kong gelh theih nadingun amaute min ka dong uh hi.

¹¹Amaute hong dawnkikna hih ahi hi: "Kote, leitung le vantung Pasian nasemte ka hi uh hi, kum tampi lai-in alian Israel kumpipa in khat lam khina a zawhsa biakinnpi khat a lam kik ka hi uh hi.

¹²Ahi hangin ka pate un vantung Pasian a hehsakna uh hangin amah in Babylon kumpipa Chaldea-te Nebuchadnezzar khut sungah a pia hi; tuapa in hih biakinnpi susia in a mite Babylon ah a puakmang hi.

¹³"Ahi ta zongin Babylon kumpipa Cyrus, kumpi a suah a kum masa penin kumpipa Cyrus in hih Pasian inn a kilam kik nading thukip a pia hi.

¹⁴Amah in, Jerusalem biakinnpi panin Nebuchadnezzar in la a, Babylon biakinnpi-a a koih Pasian inn b[14] a ngun le khamte nangawn Babylon biakinnpi c[15] panin a hemkhia hi. "Tua ciangin Kumpipa Cyrus in ukpi-a a koihpa a min Sheshbazzar tungah tuate pia-a,

¹⁵ama tungah, ‘Hih nate la-in pai inla Jerusalem biakinnpi sungah va koih kik in. Tuateh tua munah Pasian inn lam kik in,’ ci hi.

¹⁶Tua ciangin hih Sheshbazzar pai-in Jerusalem ah Pasian inn bulpi a va nga hi. Tua ni-a kipan tu hun mahmah ciang dong a kilamlam hi a, ahi hangin a kimansiang nai tuan kei hi," a ci hi.

¹⁷Tu-in kumpipa na lungkim leh Jerusalem ah hih Pasian inn lam kik nading Kumpipa Cyrus in thukip pia taktak hiam cih a kitheih nading Babylon a thu ciamtehnate ah zongsak in. Tua ciangin kumpipa in hih thu-ah na khensatna kote hong khak in.