Read Zokam Ezra 7 Bible Online

Ezra 7 - Zokam bible

Ezra 7

¹Hih teng khit ciang Persia kumpipa Artaxerxes in a uk laitakin Seraiah tapa Ezra, Azariah tapa Seraiah, Hilkiah tapa Azariah,

²Shallum tapa Hilkiah, Zadok tapa Shallum, Ahitub tapa Zadok,

³Amariah tapa Ahitub, Azariah tapa Amariah, Meraioth tapa Azariah,

⁴Zerahiah tapa Meraioth, Uzzi tapa Zerahiah, Bukki tapa Uzzi,

⁵Abishua tapa Bukki, Phinehas tapa Abishua, Eleazar tapa Phinehas, siampi makai Aaron Eleazar-

⁶hih Ezra pen Babylon pana paito ahi hi. Amah, TOPA Israel Pasian in a piaksa Moses Thukham a thei mahmah sia khat ahi hi. TOPA ama Pasian khut in amah ompih ahi manin a nget khempeuh kumpipa in a pia hi.

⁷Kumpi Artaxerxes in a uk a kum sagihna kumin Israel-te pawlkhat, siampite, Levi-te, lasate, kongpi cingte le biakinnpi nasemte tawh Jerusalem ah a paito khawm uh hi.

⁸Kumpipa uk a kum sagihna kum, a kha ngana-in Jerusalem ah Ezra a tung hi.

⁹A kha masapen a ni masapen ni-in Babylon panin khualzin kipankhia-a a hoih ama Pasian khutin ompih ahi manin a kha ngana a ni masapen ni-in Jerusalem ah a tung hi.

¹⁰Ahang in, TOPA Thukham sin ding, tang ding, ama thukipte le thukhamte Israel-te laka hilh dingin amah a kipia khin zo hi.

¹¹Israel-te adingin TOPA thupiakte le thukipte tawh kisai a, laisiampa siampi Ezra - siapa tungah Kumpi Artaxerxes in a laikhak hih ahi hi:

¹²a[17] Artaxerxes, kumpite’ kumpipa, Siampi Ezra, vantung Pasian Thukham siapa tungah: Kong hopih hi.

¹³Tu-in ka kumpi gam sungah om Israel-te, siampite, Levi-te zong a ut peuhpeuh, Jerusalem a nang hong zui nuamte a pai theih nading uh thukip ka pia hi.

¹⁴Kumpipa le ama thudot mi sagihte in na khut sunga om na Pasian Thukham tawh kisai-in Judah le Jerusalem a thupiang kan dingin nang kong sawl uh hi.

¹⁵Tua banah Jerusalem a teng kumpipa le a thudotte in Israel Pasian tungah utthu-a a piak uh ngun le khamte tawh gawmin puak unla,

¹⁶Babylon gamkhen pana kingah ngun le khamte khempeuh leh mite le siampite in Jerusalem a amau Pasian biakinnpi dinga utthu-a a piakte uh tawh gawmkhawm un.

¹⁷Hih sumte tawh Jerusalem a note Pasian biakinnpi-a biakna-tau ah piak dingin bawngtalte, tuutalte le tuuno apate, an-a biaknate le dawntheih-a biakna bekin na zang ding uh hi.

¹⁸A val lai ngun le khamte note Pasian deih bangin nang le na sanggam Jew-te in a hoih pen dinga na ngaihsut bangun na hih ding uh hi.

¹⁹Na Pasian biakinnpi sunga biak nadingin nang tunga hong kipia sawn vanzatte khempeuh Jerusalem a Pasian tungah pia in.

²⁰Tuateh na Pasian biakinnpi dinga kisam dang khatpeuh piak nop na neih leh kumpi sumkholna panin na zang thei ding hi.

²¹Tu-in kumpipa keimah Artaxerxes in Euphrates-Gal gama sumkem khempeuh tungah siampi Ezra, vantung Pasian Thukham, siapa in no tungah hong nget peuhpeuh -

²²ngun talent a[18] zakhat ciang, mangbuh cor b[19] zakhat ciang, lenggahzu bath c[20] zakhat ciang, olive thau bath d[21] zakhat ciang le ci a deih zahzah hong sik nadingun thu ka pia hi.

²³Vantung Pasian biakinnpi dingin vantung Pasian deih zahzah kihih ta hen. Bang hangin kumpipa le a tapate gam tungah thangpaihna tung zenzen ding ahi hiam?

²⁴Note in siampite, Levi-te, lasate, kongpi cingte, biakinnpi nasemte le hih Pasian inn a nasem dangte tungah siah, mangmu le a sap peuhpeuh lak nading thu na neih loh lam uh zong kong theisak hi.

²⁵Tuateh nang Ezra in nangma neihsa na Pasian pilna tawh kizui-in, Euphrates-Gal a om mite na Pasian thukham a thei khempeuh, thutanga a uk ding thu vaihawmte le thukhente seh in. A thei lote na hilh ding hi.

²⁶Na Pasian thukham le kumpipa thukham a mang lo peuhpeuh sihna, hawlkhiatna, neihsa matsakna ahikeh thong kiatsakna dan kithuaksak pelmawh ding hi.

²⁷Jerusalem a TOPA’ inn a kizahtak theih nadingin hih banga kumpipa lungsim a guan i pate Pasian TOPA kiphat ta hen. Amah in

²⁸kumpipa le a thudotte le a vanglian kumpipa uliante mai-ah ama angvanna hoih kei hong ngahsak hi. Bang hang hiam cih leh TOPA ka Pasian khut in kei hong ompih ahi manin ka lungsim thakhauh a, Israel panin kei hong zui ding makai ka khawm hi.