Read Zokam Ezra 9 Bible Online

Ezra 9 - Zokam bible

Ezra 9

¹Hih nasepte a man khit ciangin makaite kei kiangah hong pai in, "Israel mite, siampite le Levi-te kigawm in a kihhuai-a gamta: Canaan-te, Hit-te, Periz-te, Jebus-te, Ammon-te, Moab-te Egypt-te le Amor-te bangin gamta uh a gamvengte panin a tuam om kei uh hi.

²Amaute mahmah le a tapate un amau tanute a zi dingun pi uh a, amau kima om mite tawh a minam siangtho uh a helzau uh hi. A uliante le a makaite un hih bang muanhuai lohna-in a makaih uh hi," a ci uh hi.

³Hih thu ka zak ciangin ka puan-tungsilh le ka puantualpi balkekin ka sam le ka khamul botgawpin cih nading thei loin ka tu mawk hi.

⁴Tua ciangin sal-a om hi mite muanhuailohna hangin Israel-te Pasian thu za-a a ling peuhmah ka kimah hong kikhawm uh hi. Tuaci-in nitak biakpiak hun dong tua lai-ah ka tucip hi.

⁵Tua ciangin nitak biakpiak hun teh ka puansilh le ka puantual kikheksa in ka zahlakna mun panin ka tho a, khukdinin TOPA ka Pasian lamah khut zakin

⁶thu ka ngen a: "Ka Pasian aw, ka lu uh sangin ka mawhna uh sangzaw a, ka khialhnate un vantungte ban ahi manin ka mai zum lua-in ka Pasian lamah ka mai kong ngat ngam kei hi.

⁷Ka pute uh khanga kipan tuni dong ka khialhna uh a lian mahmah hi. Ka mawhnate uh hangin kote le ka kumpite uh le ka siampite un namsau thuakin salin kikai-a gamdang kumpite khutlum thuakin tuni dong ka tuaci uh hi.

⁸"Hih bangin tu-in, hun tomkha sung bek TOPA kote Pasian in nong hehpih-a a sibaang hong omsakin na mun siangtho ah panmun kip nong pia hi; tua ciangin kote Pasian in ka mit uh nong vaksak a, ka saltanna panun tawmkha nong kolsak hi.

⁹Kote sila ka hi uh hangin ka Pasian un ka salsuahna panun nong nusia kei hi. Amah in Persia kumpipa muhna ah a migitna hong laka: Amah in Pasian inn lam kik nading le a kisiate puahkik nading a thakin nuntakna hong pia-a, Judah le Jerusalem a i kidal nading kulh khat hong pia hi.

¹⁰"Ahi hangin kote Pasian aw, hihte khit ciang tu-in bang gen thei nawn ding ka hi hiam? Na nasem kamsangte tungtawna na piak

¹¹‘Note luta na neih ding uh gam in a sunga tengsate nitsaksa ahi hi. A kihhuai amau gamtatna ahi siantholohna mong khat pan a mong khat dong kidim khin hi.

¹²Tua ahi ciangin na tanute uh amau tapate zi dingin kha kei unla, na tapate uh zi dingin amau tanute pi kei un; amau phattuam nading le amau mavan nading cikmah hunin zong kei un; tua hileh na tha uh hatin leitanga piang gah hoihte na ne thei ding uh a, a luah tawntung dingun na tate uh na nusiat ding uh hi,’ na cih ka thusim kei uh hi.

¹³Ko tunga hong tungsa gitlohna le khialhna lianpite ka bawl thaman uh hi a, tua hi napi kote Pasian in ka mawhna uh tawh a kituak zah sanga tawmzaw in dan nong tuaksak a, hih bangin a baanglai-in nong omsak hi.

¹⁴Na thukhamte palsat kikin tua banga kihhuai a bawlte tawh kiteng thuk lai ding ka hi uh hiam? A baanglaite, a suakta om lo zah a suksiat dingin ko tungah heh ding hi lo na hi hiam?

¹⁵TOPA Israel-te Pasian aw, nang na thumaan hi! Kote tuni dong a baanglai-in hong kinusia hi. Kote ka mawhna uh hangin khat beek na mai-ah a ding thei lo ding hi napi, a mawhpi mahin na mai-ah kong om uh hi," ka ci hi.