Read Zokam Nehemiah 13 Bible Online

Nehemiah 13 - Zokam bible

Nehemiah 13

¹Tua ni-in mipite zakin Moses Laibute ngaihtakin kisim-a, Pasian mite kikhopna ah Ammon-te ahikeh Moab-te a kihel ngei loh lam kimu hi;

²bang hang hiam cih leh amaute in Israel-te an le tui in vai-dawn uh a, amaute a hamsiat dingin Balaam a cialzaw uh hi. (Bangbang ahi zongin, eite Pasian in hamsiatna thupha-in hong heisak hi.)

³Mipite in thukham a zak uh ciangin gamdang mite suan khempeuh Israel-te panin a khenkhia uh hi.

⁴Hih ma-in, eite Pasian inn a van kholna inndei ukin siampi Eliashib kikoih hi. Amah Tobiah tawh a semkhawm helhel hi uh a,

⁵tununga an-a biakna antangte le biakinnpi vanzatte, le sawma khata kipia an; Levi-te, lasate le kongpi cingte, siampite adingin a kipiakhawm nate a kholna uh inndei lianpi khat ama sik ahi hi.

⁶Ahi hangin Babylon kumpipa Artaxerxes hun a kum sawmthum le nihna kumin kumpipa kiangah hong ciah pan ka hi manin hih thu khempeuh a pian laitakin Jerusalem ah ka om kei hi. Tua nung deuhin ama phalna ngenin

⁷Jerusalem ah ka ciah kik pan hi. Hih munah Eliashib in Pasian inn huang sunga inndei khat Tobiah a sikna hanga na hoih lo a piang khat ka phawk hi.

⁸Ka lungkim lo lua mahmah a, Tobiah-te inn sung vanzat khempeuh inndei pualam ah ka lawnkhia hi.

⁹Inndei sung siansuah dingin thu ka pia a, tua khit ciangin Pasian inn sung vanzat teng, an-a biaknate le gimnamtui tawh tuate ka koih khawm hi.

¹⁰Levi-te tanh dinga kisehte amau kipia lo-a, nasepna-a nasem Levi-te le lasate khempeuh amau lo ciatah a ciah kik uh zong ka phawkkhia hi.

¹¹Tua ciangin uliante tai-in amaute kiangah, "Bang hangin Pasian inn kithusim lo ahi hiam?" ci-in ka dong hi. Tua ciangin amaute khempeuh ka kaikhawm a, amau mun ciatah ka pangsak hi.

¹²Judah-te khempeuh in an pan sawma khat, lenggahzu thak le sathau, vankholna inndei ah a puak uh hi.

¹³Siampi Shelemiah, laithei Zadok le Levi-te khat a min Pedaiah, vankholna inndei ka uksak a, Mattaniah’ tapa, Zaccur tapa Hanan amaute ka huhsak hi, bang hang hiam cih leh hih mite a muantakin kingaihsun hi. A sanggamte uh tunga amau tanh ciat a piakkhiat ding uh amau nasep ahi hi.

¹⁴Ka Pasian aw, hih thu-ah kei hong phawk gige inla, ka Pasian inn le a sunga nasepnate ah muanhuaitaka ka sepsate maimangsak kei in.

¹⁵Tua hun laite in Judah gam ah, Sabbath ni-in lenggah cilna ah lenggah a cil, lenggahzu, lenggah, theigah le van nam khempeuh laate suana van nawn mi ka mu hi. Amaute in Sabbath ni-in hihte khempeuh Jerusalem ah a puak uh hi. Tua ahi ciangin tua ni-a an a zuak uh ka vauhilh hi.

¹⁶Jerusalem a teng Tyre mite in ngasa le sumbuk-van namkim Jerusalem ah puak uh a Sabbath ni-in Judah-te tungah a zuak uh hi.

¹⁷Judah uliante kiangah, "Hih nasep uh gitlohna bang ahi hiam - Sabbath ni-in zehphi hi lo na hi uh hiam?

¹⁸Eite Pasian in hih tuahsiatna khempeuh ei tung le Jerusalem tungah a tunsak nadingin na pute un zong tua bangin sem uh hi lo ahi hiam? Tuni-in note in Sabbath ni-a zehphitna tawh Israel tungah a nasiazaw thangpaihna na tungsak uh hi," ci-in ka tai hi.

¹⁹Nitaklam, Sabbath kipat ma, Jerusalem kongpite a liap ciangin kongpite khaksakin Sabbath a bei ma-in a hon dingun thu ka pia hi. Sabbath ni-in van a kitumpih theih loh nadingin kongpite ah keima mite ka pangsak hi.

²⁰Khatvei nihvei bang sumbukte le van namkim zuakte Jerusalem pualam ah a giak uh hi.

²¹Ahi hangin amaute ka vauhilh a, "Bang hangin zan ciangin kulh bulah giak na hi uh hiam? Na hicih lai uh leh no tungah khut kong nga ding hi," ka ci hi. Tua ni-a kipan amaute Sabbath ni-in hong pai nawn kei uh hi.

²²Tua ciangin Levi-te amau le amau kisiansuah uh a, Sabbath a kisianthosak theih nadingin pai-a kongpite a cin nadingun thu ka pia hi. Ka Pasian aw, hih thu ah zong hong phawk inla, a lian mahmah na itna tawh kizui-in kei tungah na lainatna hong lak in.

²³Tua tham loin tua hun lai-in Ashdod, Ammon le Moab pana numeite a tenpih Judah mite ka mu hi.

²⁴A tate uh alang Ashdod pau le adangte pau-in pau uh a, Judah pau-a a pau zia ding a thei kei uh hi.

²⁵Amaute tai-in ka hamsiat hi. Pasalte pawlkhat te sat-in a humsam uah manin ka bawhsak hi. Pasian minin ka kiciamsaka, "Note in na tanute uh amaute na tenpihsak kei ding uh a, a tanute uh zong no le na tapate uh zi dingin na pi tuan kei ding uh hi.

²⁶Israel kumpipa Solomon mawhna zong hih bangte a tenpih hangmah hi lo ahi hiam? Minamte tampi lakah amah bang kumpi a om kei hi. A Pasian in amah it a, Pasian in Israel-te khempeuh kumpi a suaksak hi; ahi hangin gamdang numeite in amah nangawn a khialsak uh hi.

²⁷Gamdang numei tenpihna tawh note in zong a lauhuai gitlohna bawlin eite Pasian tungah na muanhuai lohna uh tu-in i vekin za pelmawh ding hi lo i hi hiam?" ka cisak hi.

²⁸Siampi Eliashib’ tapa Joiada’ tapate khat Haron-te Sanballat makpa ahi hi. Tuateh amah ka hawlkhiamang hi.

²⁹Ka Pasian aw, amaute in siampite zum, siampi’ thukhun le Levi-te ninsak uh ahi manin amaute ciamteh gige un.

³⁰Tua ciangin gamdang nate tawh a kizom siampite le Levi-te ka siansuahsak a, amaute nasepna ciatah na sem dingin ka seh hi.

³¹A kiseh huna cih ding sing le biakna le gahmasa-a biakna ding zong ka vaihawmsak hi. Ka Pasian aw, hong angvan inla hong phawk in.