Read Zokam Nehemiah 2 Bible Online

Nehemiah 2 - Zokam bible

Nehemiah 2

¹Kumpi Artaxerxes in kumpi a sep a kum sawmnihna kumin amah kipia ding lenggahzu hong kipaipih ka la a, kumpipa ka pia hi. Tua ma-in a maiah ka dah ngei kei hi;

²tua ciangin kumpipa in, "A cina lah hi lo cin-a bang hangin dahmai na hi hiam? Na lungsim dahna lo adang hi lo ding hi," ci-in hong dong hi. Ka lau lua mahmah a,

³ahi hangin kumpipa kiangah, "Kumpipa nungta tawntung hen! Ka pate kivuina khuapi kisia in a kongpite mei-in kisusia ahi ciangin bang hangin ka mai dahmai lo ding ahi hiam?" ka ci hi.

⁴Kumpipa in, "Na deih bang ahi hiam?" hong ci hi. Tua ciangin vantung Pasian kiangah thu ka ngen a,

⁵tuateh kumpipa dawngin, "Kumpipa na lungkim a, nang muhna ah maipha ka ngah leh ka pate kivuina Judah khuapi ka lam kik theih nadingin kei hong sawl in," ka ci hi.

⁶Tua ciangin a gei-ah kumpinu tu kawmin, "Na pai nading bangtan sawtin cik ciangin hong tung kik ding na hi hiam?" ci-in hong dong hi. Kei hong paisak ding kumpipa lungkima, tua ciangin hun khat ka seh hi.

⁷Kei zong ama kiangah, "Kumpipa na lungkim leh Judah gam ka tun dong lungmuangtaka ka pai theih nading amaute in hong huh theih nadingun Euphrates-Gal gamkhen ukte ka piak ding laikhak nong pia thei ding hiam?

⁸Tuateh kumpipa tulak kempa Asaph in, biakinnpi kianga kumpi khua kongpite khuam ding, khuapi kulh ading le kei omna inn dingin singluang hong piak nadingin laikhak nong pia thei diam?" ka ci hi. Tua ciangin hehpih-siam ka Pasian khut kei tungah om ahi manin kumpipa in ka ngetnate hong pia hi.

⁹Tua ciangin Euphrates-Gal gamkhen ukte kiangah pai-in kumpipa laikhak ka pia hi. Kumpipa in galkapmangte le sakol galkapte zong kei hong khasak hi.

¹⁰Horon-te Sanballat le Ammon-te Tobiah hih uliante in, Israel mite phattuam nading a sem dingin mi khat kuan hi, cih a zak uh ciangin a lungbuai mahmah uh hi.

¹¹Jerusalem ka tunga, ni thum ka tam khit ciangin

¹²mi tawmkha tawh zanin ka vakkhia hi. Ka Pasian in Jerusalem a ka sep ding ka lungsima hong guat thu kuama kiangah ka gen kei hi. A tunga ka tuanna longal tuanna dangin hong zui lo hi.

¹³Kuam Kongpi tawnin Se-al a[1] Tuikhuk le Ek Kongpi manawhin a kicimsa Jerusalem kulhte le mei siatsak kongpite ka veel hi.

¹⁴Tua ciangin Tuikhuk Kongpi le Kumpipa Bual lam manawhin ka pai-a ahi hangin ka tuanna thawl zawh nading a om kei hi;

¹⁵tua ciangin kuam ah ka zan paitoh a kulh ka velvel hi. A tawpna-ah kileh kikin Kuam Kongpi tawnin ka lut kik hi.

¹⁶Uliante in ka paina ahikeh ka sep a thei kei uh hi, bang hang hiam cih leh Jew-te’ siampite, uliante, khua upate le nasem dangte hitaleh tua na a sem dingte tungah bangmah ka gen nai kei hi.

¹⁷Tua ciangin amaute kiangah, "I lungkhamna na mu uh hi: Jerusalem kisiagawp-a a kongpite mei-in kihal hi. Hong pai un, Jerusalem kulh ciang kik ni, tuateh hong kizahko nawn lo ding hi," ka ci hi.

¹⁸Hehpih siam Pasian khut kei tunga a om lam le kumpipa in kei tunga hong gente amaute tungah zong a vekpi in ka gen hi. Amaute in, "Kulh cian kik kipan ni," ci-in hong dawng uh hi. Tua ciangin amaute hih nasep hoih a kipan uh hi.

¹⁹Ahi hangin Horon-te Sanballat le Ammon-te Tobiah hih uliante le Arab-te Geshem in hih thu a zak uh ciangin hong simmawh in hong zahko uh a, "Na na sep uh hih bang ahi hiam? Kumpipa lehdo na hi uh hiam?" ci-in hong dong uh hi.

²⁰Amaute ka dawnna-in, "Vantung Pasian in kote hong zosak ding hi. Ama nasem kote in a cian kik ka kipan ding uh hi; no na hi uh leh Jerusalem ah tanh na nei kei uh a, gam thukhun lampan ahi-a, tangthu lampan ahi zongin thuneihna na nei kei uh hi," ka ci hi.