Read Zokam Nehemiah 3 Bible Online

Nehemiah 3 - Zokam bible

Nehemiah 3

¹Siampi Eliashib le a lawm siampite nasem dingin kuan uh a, Tuu Kongpi a ciangpha uh hi. Amaute in ap uh a, a kongkhakte a munah thuahin a apsa uh Zakhat Tausang dong tun uh a, Hananel Tausang dong a zo uh hi.

²Jericho mite in a ban zomto uh a, amau zomah Imri’ tapa Zaccur in a ciang hi.

³Hassenaah’ tapate in Ngasa Kongpi a ciangkik uh hi. Amaute in a zawlte, khung uh a, a kongkhakte, a kalhna le a kalhna zawlte a munah a thuah uh hi.

⁴Hakkoz’ tapa Uriah, tapa Meremoth in a zomah a puah hi. Ama zomah Meshezabel’ tapa Berekiah tapa Meshullum in puahpha a, tuateh ama zomah Baana’ tapa Zadok in zong a puahpha hi.

⁵Tua ban zomah Tekoa mite in puahpha uh a, ahi hangin amau ukte b[2] sawl bangin a uliante un a hanciam nuam kei uh hi.

⁶Paseah’ tapa Joiada le Besodeiah’ tapa Meshullam in Jeshanah c[3] Kongpi a ciang kik hi. Amaute in a zawlte khung uh a, a kongkhakte a kalhnate, a kalhna zawlte a munah a thuah uh hi.

⁷Amaute zomah Gibeon le Mizpah pana mite - Gibeon mi Melatiah le Meronoth mi Jadon-te in Euphrates-Gal gamkhen ukpa thuneihna nuai-a omte in a puahpha uh hi.

⁸Harhaiah’ tapa Uzziel, kham seekpa in a zom puahpha a; tua ban zomah paknamtui bawlte khat Hananiah in a puahpha hi. Amaute in Kulh Zai ciang dong a ngeina a bangsak d[4] uh hi.

⁹Jerusalem gam phelkhat ukpa Hur’ tapa Rephaiah in a zom puahpha hi.

¹⁰Hih zomin Harumaph’ tapa Jedaiah in ama inn galsantak puahpha a, ama zomah Hashabneiah’ tapa Huttush in puahpha hi.

¹¹Harim’ tapa Malkijah le Pahath-Moab’ tapa Hassub in a khen tuam khat le Meikhuk Tausang a puahpha hi.

¹²Jerusalem gam phelkhat a ukpa Hallohesh tapa Shallum, a tanute in huh a, a zom a puahpha uh hi.

¹³Hanun le Zanoah a tengte in Kuam Kongpi a puahpha uh hi. Amaute in lam kik uh a, a kongkhakte a kalhnate le a kalhna zawlte a munah a thuah uh hi. Amaute in Ek Kongpi dong kaih e[5] zanga sung zong a puahpha uh hi.

¹⁴Beth Hakkerem gam ukpa Recab’ tapa Malkijah in Ek Kongpi a puahpha hi. Amah in ciangpha-a a kongkhakte, a kalhnate le a kalhna zawlte a munah a thuah hi.

¹⁵Mizpah gam ukpa Col-Hozeh’ tapa Shallun in Tuikhuk Kongpi a puahpha hi. Amah in ciangpha-a a tung khuhin a kongkhakte a kalhnate le a kalhna zawlte a munah a thuah hi. Amah in Kumpipa’ Huan gei-a Siloam f[6] Bual kulh zong David Khuapi pana paisuak kahlei dong a puahpha hi.

¹⁶Ama galah, Beth Zur gam phelkhat ukpa Azbuk’ tapa Nehemiah in David hante tawh g[7] kigalsai san, bawltawm bual le Galhang Inn dong a puahpha hi.

¹⁷Ama zomah Levi-te in Bani’ tapa Rehum khutnuai-ah a puahpha uh hi. Ama pangah Keilah gam phelkhat ukpa Hashabiah in ama gam tangin a puahpha hi.

¹⁸Ama zomah Keilah gam a phel dangkhat ukpa Hanadad’ tapa Binnui h[8] ukna nuai-ah a khuaneu mite in a puah uh hi.

¹⁹Amau zomah Mizpah ukpa Jeshua’ tapa Ezer in galvan koihna kahtohna maisan panin a kiu dong khen dangkhat a puahpha hi.

²⁰Ama zomah Zabbai’ tapa Baruch in a kiu panin tulpi Eliashib lutna dong aamtakin a puahpha hi.

²¹Ama zomah Hakkoz’ tapa, Uriah’ tapa Meremoth in Eliashib inn lutna panin tua mong dong khen dangkhat a puahpha hi.

²²Ama zoma puahphate a kimkota om siampite ahi uh hi.

²³Amaute galkhatah Benjamin le Hasshub in amau inn maisan puahpha uh a; amaute zomah, Azariah’ tapa Maaseiah, tapa Ananiah in a inn gei puahpha hi.

²⁴Ama zomah, Henadad’ tapa Binnui in Azariah’ inn pan a kiu le kulh kiu ciang khen dang khat puahpha a,

²⁵Uzai’ tapa Palal in a kiu galsan teng le kumpi inn tungnung pana dawkkhia zum cingte omna kiang tausang teng a puahpha hi. Ama zomah Parosh’ tapa Pedaiah

²⁶le Ophel mualneu tunga teng biakinnpi-a nasemte in nisuahna lam manawhin Tui Kongpi gal santak dong le tausang dawk a puahpha uh hi.

²⁷Amaute zomah Tekoa mite in tausang dawkpi panin Ophel kulh dong a khen dang khat a puahpha uh hi.

²⁸Sakol Kongpi tunglam teng ahileh siampite in amau inn mai ciat uh a puah uh hi.

²⁹Amaute zomah Immer’ tapa Zadok in ama inn galsan tak teng a puahpha hi. Ama zomah Nisuahna Kongpi cing Shecaniah’ tapa Shemaiah in a puahpha hi.

³⁰Ama zomah Shelemiah’ tapa Hananiah, le Zalaph’ tapa gukna Hanun in a khen dang khat puahpha uh hi. Amaute zomah Berekiah’ tapa Meshullam in ama omna inndei maisan teng a puahpha hi.

³¹Ama zomah kham seekpa Malkijah in Etcianna Kongpi galsan-a biakinnpi nasemte le sumbawlte inn dong le kulh kiu tunga inndei dong puah a;

³²tuateh kulh kiu tunga inndei le Tuu Kongpi kikal kham seekte le sumbukte in a puahpha uh hi.