Read Zokam Nehemiah 4 Bible Online

Nehemiah 4 - Zokam bible

Nehemiah 4

¹Sanballat in kulh ka cian kik uh a zak ciangin hehin a thangpai mahmah hi. Amah in Jew-te zahpihin

²amah a koppihte le Samaria galkapte omin, "Tua Jew migina lote in bang hih uh hiam? A kulh uh puahphat sawm uh ahi hiam? Biakna pia ding uh ahi hiam? Ni khatin zo ding uh ahi hiam? Amaute mah banga a kihaltumsa nin lompi suangtum suaksak kik thei ding uh ahi hiam?" a ci hi.

³A kianga ding Ammon-te Tobiah in, "Bangbang lam ta le uh - ngia khat a tungah kah bek leh zong kulha a cian uh suangte ciim na ve!" a ci hi.

⁴Kote Pasian aw, hong za in, kote hong kisimmawh hi. Amaute hong engcihna amau lutungah tukiksak in. Gam khatah amaute salin kimansak in.

⁵Amaute in kulh ciangte mai-ah a[9] hong ko uh ahi manin a khialhna uh khuhsak kei inla a mawhna uh na muhna pan sumit kei in.

⁶Tua ciangin mite in a lungsim khempeuh uh tawh na sem uh ahi manin kote in a sanna a kim ciang ka tut mateng uh ka ciang uh hi.

⁷Ahi hangin Sanballat, Tobiah, Arab-te Ammon-te le Ashdod mite in, Jerusalem puahphatna in mainawt mahmah a, a vangte a kihukkhitna a zak uh ciangin a nak heh mahmah uh hi.

⁸Amaute khempeuh kuanin Jerusalem simin buaisak ding a sawm uh hi.

⁹Ahi hangin kote in Pasian tungah thu ngenin hih bang hihna a thei dingin sun le zanin galvil ka koih uh hi.

¹⁰Tua hun laitakin Judah gam sunga mite in, "Nasemte thazaw ta uh a, nin lah tam lua mahmah ta, kulh ciang kik zo kei ni," a ci uh hi.

¹¹Ka galte un zong, "A theih loh kalun, hong muh ma-un amaute lakah va omin amaute thatin a nasep uh khawlsak ni," a ci uh hi.

¹²Tua ciangin amau nai-a teng Jew-te hong pai-in sawmvei val hong ko uh a, "Bangci lamin na hei uh hangin hong sim veve ding uh hi," hong ci uh hi.

¹³Tua ahi ciangin kulh nunglam a niam pen mun-awng tengah a innkuankuanin a namsau uh, a teipi uh le a thal uh tawh mite pawlkhat ka pangsak hi.

¹⁴Nate ka et dimdem khit ciangin ding in zaliante, uliante le mite khempeuh tungah, "Amaute kihta kei un. A lian mahmah a kihtakhuai Topa phawk unla na sanggampate, na tapate, na tanute na zite le na inn uh adingin do un," ka ci hi.

¹⁵Ka galte un amau hong sawmna ka theih lam le Pasian in amaute geelna a phiatsak ciangin kulha ka nasepna ciat uhah ka kuan kik uh hi.

¹⁶Tua ni-a kipan ka mite a langin na sem uh a, a langte teipi, lum, thal le galvante tawh kithawisa-in a om uh hi.

¹⁷Judah mi kulh ciangte khempeuh nungah a uliante uh a pang hi. Van nawnte in a khut langkhatun van lenin a langkhatin galhiam tawi uh a,

¹⁸kulh ciangte in a cian kawmun amau pang ciatah namsau a kuah uh hi. Ahi hangin pengkul mutte kei tawh a omkhawm uh hi.

¹⁹Tua ciangin zaliante, uliante le mipite khempeuh tungah, "I nasepna zai-a i kithehthang hi, kulh dungah gamlapi kihalin i kikhen hi.

²⁰Pengkul gin na zakna mun peuhpeuh panun ko kiangah hong kigawm un. I Pasian in ei tangin do ding hi," ka ci hi.

²¹Tuaci-in mi a lang in teipi tawi kawmin khuavak tunga kipan aksi suah dong na ka semsuak uh hi.

²²Tua hun teh mite kiangah, "Sunin na sema zan ciangin galvil na suah theih nadingun na nasemte ciat uh tawh na vekun Jerusalem sungah om un," ka ci hi.

²³Kei ka hi-a ka sanggampa ahi zongin, ka mite ahi-a kei hong cingte ahi uh zongin ka puan uh ka suah kei uh a; tui ka tawi ciang nangawnun galhiam ka keng ciat uh hi. b[10]