Read Zokam Nehemiah 5 Bible Online

Nehemiah 5 - Zokam bible

Nehemiah 5

¹Tu-in pasalte le a zite un a Jew sanggamte uh tungah lungkim lohna lian khat gingkhiasak uh hi.

²Pawlkhatte in ko le ka tanu ka tapate uh tawh tampi ka hi uh hi; ka nuntak nading uh an ka zon uh kul ding hi," a ci uh hi.

³Adangte in, "Kote in kialpi tun sungin antang khekna-in ka lote uh, ka lenggui lote uh leh ka innte uh ka pong mang khin uh hi," a ci uh hi.

⁴Adang pawlkhat leuleu in, "Ka lote uh le ka lenggui lote uh ai-a kumpipa siah piak nadingin sum ka leitawi uh hi.

⁵Eite gammi hihna-ah sikhat sakhat hi-in, ka tapate uh amau aate zah mahin hoih napi ka tanu ka tapate uh sal suaksak ding ka hi ta uh hi, tua hi-a ka lote uh le ka lenggui lote uh mi aa suak khin ahi manin thu ka nei zo nawn kei uh hi," a ci uh hi.

⁶Amaute kikona le hih ngawhnate ka zak ciangin ka heh mahmah hi.

⁷Ka lungsimin ka khinkhai-a, tua ciangin upate le uliante ka ngawh hi. Amaute kiangah, "No mi le no mi summet tam na kila lua uh hi," ka ci hi. Tua ciangin amaute lungsim zawh nadingin khawmin kikhop lianpi khat ka bawla,

⁸"Gentile-te tunga kizuaksa i Jew sanggamte ahi zo zahzah i lei kik ding hi. Ei tunga hong zuak kik ding bekun na sanggamte uh tungah a zuak na hi uh hi!" ka ci hi. Amaute in a gen ding uh bangmah thei loin a pau a ham om lo uh hi.

⁹Tua ciangin, "Na nasep uh maan lo hi. I gal Gentile-te hong mawhsak loh nadingin i Pasian kihta kawmin kalsuan lo na hi uh hiam?

¹⁰Kei le ka sanggampa le ka mite in zong midangte sum le an ka leitawisak uh hi. Ahi hangin summet tam lak khawl ta ni.

¹¹A lote a lenggui lote uh, a olive lote a innte uh - a seh zakhat khat met-a na lak uh sum, an, lenggahzu thak le sathaute tu mahmah in amaute pia kik un," ka cihbeh lai hi.

¹²Amaute in, "Ka pia kik ding uh hi. Amaute tung pan tuate banah bangmah ka kal kei ding uh hi. Na gen bangin ka hih ding uh hi," a ci uh hi. Tua ciangin siampite ka khawma, hih dingin a kiciamsa bangun a hih nading uh miliante le uliante ka kiciamsak hi.

¹³Kei zong ka puan tualpi mongteep ka singkhia a, "Hih kiciamna a tungsak lo peuhmah Pasian in a inn le a neihsa panin hih bangin singkhia ta hen. Hih bangin tua bang mite kisingkhia in hawmsuak ta hen!" ka ci hi. Hih teng ka cih khit ciangin a kikhawm mi buppi in "Amen" ci-in TOPA a phat uh hi. Tuateh mite in a kiciam bangun a hih uh hi.

¹⁴Tua banah Kumpi Artaxerxes a kum sawmnihna kum, kei Judah gamah amau gam ukpa dingin hong koihua kipan a kum sawmthum le nihna dong kum sawm le nih sung - kei le ka sanggampate in ukpipa ngah ante ka ne kei uh hi.

¹⁵Ahi hangin gam uk masate - kei hun ma-ate in - mite tungah vangikpi suan uh a, amaute tung panin an le lenggahzu banah ngun shekel a[11] sawmli a la uh hi. Amaute huhpate nangawn zong mite tungah a kiliansak uh hi. Ahi hangin Pasian adingin a siangtho zah val tua bangin ka sem kei hi.

¹⁶Tua sangsikin, hih kulh cianna ah kei le kei ka kipumpiak zaw hi. Ka mite khempeuh nasepna ah kikhawm uh a; kote b[12] in leitang mun khat beek ka tang kei uh hi.

¹⁷Tua ban lai-ah a kima minamte pan ko kianga hong paite simloh Jew-te za le sawmnga le uliante in ka sabuai a um den uh hi.

¹⁸Nisimin bawngtal khat, tuu limci guk le kei adingin vasa pawlkhat zong kibawl a, nisawm simin lenggahzu namkim tampitak hong kipuak hi. Hih mite tunga nget dingin gik lua ahi manin hizahta a bei hangin ukpipa ngah theih ante ka ngen ngei kei hi.

¹⁹Ka Pasian aw, ka hih khempeuh hih mite ading ahi manin kei hong angvanin hong phawk in.