Read Zokam Nehemiah 8 Bible Online

Nehemiah 8 - Zokam bible

Nehemiah 8

¹Tui Kongpi mai-a tual-awng ah mi khat bangin mi khempeuh a kikhawm uh hi. Amaute in Israel-te adingin TOPA thupiaksa omna Moses Thukham Laibu a lakkhiat nadingin Ezra tungah a gen uh hi.

²Tua ciangin a kha sagihna a ni masa pen ni-a kipan numei pasal, a thei dinga kilawm khempeuh theih dinga kibawl Thukham, siampi Ezra in mipite mai-ah a paipih hi.

³Tui Kongpi mai tual-awnga om numei pasal le adang a thei dingte omna maingatin khuavak tunga kipan sun dong nakpipi in a sim hi. Mite khempeuh in Thukham Laibu-a thu limtakin a ngai uh hi.

⁴Tua ding mah a kibawl sing tausang khat tungah laitheipa Ezra a ding hi. Ama kiang a taklam ah Mattithiah, Shema, Anaiah, Uriah, Hilkiah le Maaseiah dinga a veilam ah Pedaiah, Mishael, Malkijah, Hashum, Hashbaddanah, Zechariah le Meshullam-te a ding uh hi.

⁵Ezra in laibu a hong hi. Amaute khempeuh sanga sangzaw in amah ding ahi manin mi khempeuh in amah mu thei uh a, a laibu a hon phetin mi khempeuh a ding uh hi.

⁶Ezra in a lian mahmah TOPA phat a; mi khempeuh in a khut uh lamto in, "Amen, Amen!" ci-in a dawng uh hi. Tua ciangin a mai uh lei lamah kunsukin TOPA a bia uh hi.

⁷Levi-te - Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan le Pelaiah-te in - tua lai-a ding mipite a din laitakun Thukham khiatna a telgen uh hi.

⁸Mipite in a theihtel nadingun amaute in Pasian Thukham Laibu sung panin simin, a khiatna genin a na kitelsak f[21] uh hi.

⁹Tua ciangin ukpipa Nehemiah, laithei siampipa Ezra le mite tunga a telgen Levi-te in mite tungah a vekun, "TOPA note Pasian adingin tuni a siangtho hi. A kap a mau om kei un," a cihuan uh hi. Ahang in, mite khempeuh in Thukham kammal a ngaih kawmkawmun a kapkap uh hi.

¹⁰Nehemiah in, "Pai-in an lim ne-in a khum dawn unla a huan ding uh a nei lote puak un. Tuni eite Topa adingin a siangtho hi. TOPA lungnopna in note hatna ahi manin dah kei un," a ci hi.

¹¹Levi-te in mite khempeuh kho in, "Dai un, tuni ni siangtho ahi hi. Dah kei un," a ci uh hi.

¹²Tua ciangin mi khempeuh a ne a dawn ding, mi a kholh ding le lungtaitaka pawibawl dingin a paikhia uh hi; bang hang hiam cihleh amau a kitheisak kammalte a theitel ta uh hi.

¹³Tua kha a ninihna ni-in innkuan lutang khempeuh Levi-te le a siampi ciat uh tawh Thukham kammalte sin dingin laithei Ezra kimkotah a kikhawm uh hi.

¹⁴Amaute in Moses tungtawna TOPA in a thupiaksa, a kha sagihna kha-a pawi hun ciangin sawlpaang buka om nading le

¹⁵amaute in, "Mualtung gamte ah pai-a olive hiangte - gam olive kungte, muikungte le nisuh hiangte le a tehpha sawlbawkte sat-a a ciah kik nading uh thu" amaute khuapi khempeuh le Jerusalem ah a tangko nading uh a kigelhsa-a a[22] a om lam a mu uh hi.

¹⁶Tua ciangin mite kuankhia uh a, singhiangte pua-in amau innkhum tung, amau inntual tung, Tui Kongpi tual-awng tung le Ephraim Kongpi gei-ah sawlbuk a lam ciat uh hi.

¹⁷Sal pana a ciah kik mipi bup in sawlpaang buk lamin a sungah a teng uh hi. Nun’ tapa Joshua huna kipan tua ni dong Israel-te in hih bangin pawi a bawl ngei kei uh hi. Amaute in nuam a sa mahmah uh hi.

¹⁸A ni masa pen ni-a kipan a ni nunung pen ni dong ni khat khit ni khat Ezra in Pasian Thukham Laibu a sim hi. Amaute in ni sagih sung pawi bawl uh a, a nigiatna ni-in zuih ding ngeina-a om bangin mipi kikhopna khat a nei uh hi.