Read Zokam Esther 3 Bible Online

Esther 3 - Zokam bible

Esther 3

¹Hih thute khit ciangin Kumpi Xerxes in Agag-te Hammedatha tapa Haman pahtawi a, lamto in ulian dang khempeuh sangin pahtawina tokhom a pia hi.

²Kumpipa thupiaksa ahi manin kumpi kongpi sunga nasem kongpi tawna a pai peuhmah in zahtakin a khukdin uh hi. Ahi hangin Mordecai khukdin loin a zahtakbawl kei hi.

³Tua ciangin kumpi kongpi-a nasemte in Mordecai kiangah, "Bang hangin kumpipa thupiak mang lo na hi hiam?" ci-in a dong uh hi.

⁴Ni khat khit ni khat amah a paupih uh hangin a thukim ding a nial hi. Tua ahi ciangin amah Jew mi ahilam amaute tungah genkhin ahi manin Mordecai gamtatna ahi ding mah hiam, cih Haman tungah a gen uh hi.

⁵Mordecai khukdin loin amah zahtak lo cih a muh ciangin Haman a heh mahmah hi.

⁶Tua banah Mordecai mipihte thu a theih khit ciangin Mordecai guak thahtaak a sa kei hi. Tua sangsikin Haman in Xerxes kumpi-gam sung khempeuh a om Mordecai mipihte - Jew-te khempeuh suksiat nading lampi a zong hi.

⁷Kumpi Xerxes in a uk a kum sawm le nihna a kha masapen ahi Nisan kha a kipan pur (tua pen aisanna) zangin a ni a kha ding teelna-in Haman omin ai a lawn uh hi. Tua ciangin a kha sawm le nihna, Adar kha ah ai a tu a[6] hi.

⁸Tua ciangin Haman in Kumpipa Xerxes kiangah, "Na kumpi-gam sung gamneu tuamtuamte ah kithehthangin a tuam om mi pawlkhat a om hi. Amaute ngeinate adangte aa tawh kibang lo a, kumpipa thukhamte a mang nuam kei uh hi; amaute khahkhong ding kumpipa deihpen ahi kei hi.

⁹Kumpipa na lungkim leh amaute suksiat nading thukip bawl inla, tua tawh kisai nasem dingte adingin na sumkholhna ah talent b[7] tulsawm ka pia ding hi," a ci hi.

¹⁰Tua ciangin kumpipa in a seal tupna zungbuh suahkhia a, Jew-te galpa, Hagag-te beh Hammedatha tapa Haman a pia hi.

¹¹Kumpipa in Haman kiangah, "Na sum nang kem inla na mi gente na lungkim bangin hih in," a ci hi.

¹²Tua ciangin a kha masapen a ni sawm le thumna ni-in kumpi zum lai-atte a kikaikhawm uh hi. Amaute in Haman thupiakna khempeuh a gamgama, amau kam ciatin gelhkhia uh a, kumpipa ukna sunga gamkhen tuamtuama gam-ukte tung, le mi tuamtuama uliante tungah a pia uh hi. Hihte Kumpi Xerxes in ama min mahmah a kigelh lai hi-a a zungbuh seal a tup ahi hi.

¹³Kumpipa gam sung khempeuhah kha sawm le nihna Adar kha a ni sawm le thumna ni, ni khat bek sungin Jew-te a khangmoi, a khangham, numei le naupangnote thatin kisumaimang dinga a neihsate uh kilaksak ding hi, cih thu laitaite a kipuaksak hi.

¹⁴Tua ni-in a baihsa-a a om theih nadingin hih thupiakna lai gam khempeuh ah upadi bangin dal khat ciat kipuak hi - tua pen a gam sung mite theihkimsak nading ahi hi.

¹⁵Kumpipa thupiakna tawh kintakin laitaite a kuankhia uh hi; hih thupiakna kumpipa khua Susa pana kihawmkhia ahi hi. Kumpipa le Haman zu dawn dingin tukhawm uh a, ahi hangin Susa khua sung a buai mahmah hi.