Read Zokam Esther 5 Bible Online

Esther 5 - Zokam bible

Esther 5

¹A nithumna ni-in Esther in a kumpi puantual silhin kumpi inntual sunglam kumpipa innpi mai-ah a ding hi. Innpi sungah innsung lutna lam nga-in kumpipa a tokhom tungah a tut laitak ahi hi.

²Amah in huang sungah Esther ding a muh ciangin a lungkima a khut sunga a tawi kham ciangkhut ama lam ngatin a tawi hi. Tua ciangin Esther in zuana a ciangkhut dawn a lawng hi.

³Tua ciangin Kumpipa in, "Kumpinu Esther aw, bang a hiam? Bang hong ngen na hiam? Nong nget peuhpeuh kumpi-gam phellang dong kong pia ding hi," ci-in a dong hi.

⁴"Kumpipa na lungkim leh ama adingin ka kiginsa pawi tuni-in Haman tawh hong simkhawm un," ci-in a dawng hi.

⁵Kumpipa in, "Esther hong nget ka hihsak theih nadingin Haman hong paipih pak un," a ci hi. Tua ciangin Esther bawlsa pawi sim dingin kumpipa le Haman a pai uh hi.

⁶Lenggahzu a dawn laitakun kumpipa in Esther kiangah, "Nong nget bang ahi hiam? Nang kong pia ding hi. Tu-in nong nget bang hiam? Kumpi-gam phelkhat dong nangawn hong kipia ding hi," ci-in a dong kik hi.

⁷Esther in, "Kong nget nop, kong thum nop in:

⁸Kumpipa in nong angvan zawh a, kong ngetna lungkimin kong thumna nong tangtunsak leh zing ciangin kumpipa le Haman in ka pawi hong sim lai un. Tua ciangin kumpipa dotna kong dawng ding hi," ci-in a dawng hi.

⁹Tua ni-in Haman lungdam-a, ki-angtangsakin a paikhia hi. Ahi hangin kumpipa kongpi-ah amah a pai ciangin Mordecai ding beek lo-a, kihtakna lim a lah loh ciangin a heh lua mahmah hi.

¹⁰Tua hi napi Haman ki-ip tentansa in inn ah a ciah hi. A lawmte le a zi Zeresh samkhawm a,

¹¹a hauhna, a tapate, a munmuna kumpipa pahtawina, kumpi nasemte khempeuh tunga a kitawisangnate hangin a kisial hi.

¹²"Tua teng bek hi lo hi," Haman in, "Kumpinu Esther in kumpipa tawh pawisim dinga a sapkhawm kei bek ka hi hi. Amah in kei le kumpipa zing ciangin hong samkhawm lai hi.

¹³Ahi hangin kumpipa kongpi ah Jew pa Mordecai ka muh laiteng ka lung a kim thei kei hi," a cih beh lai hi.

¹⁴A zi Zeresh le a lawmte khempeuh in, "Pi a[8] sawmsagih le nga a sang gui-awk khuampi phut inla, Mordecai tua tungah kumpipa khaisak lel ve. Tuateh kumpipa tawh nitak-an ne in pai le uh cin na lung nuampah ding hiven," a ci uh hi. Haman in hih ngaihsutna hoih sa-a, gui-awk khuampi a phutsak hi.