Read Zokam Esther 8 Bible Online

Esther 8 - Zokam bible

Esther 8

¹Kumpipa Xerxes in tua ni mah in Jew-te galpa Haman neihsa teng Kumpinu Esther a pia hi. Esther in amah tawh a kitanauna uh gen ahi manin kumpipa omna ah Mordecai a teng hi.

²Kumpipa in Haman tung pana a lakkhiatsa seal zungbuh lakhia in Mordecai a pia hi. Tua hi-a Esther in Haman neihsa khempeuh Mordecai a uksak hi.

³Kumpipa khephungah kapsa in Esther puk a thu khat a ngen kik hi. Agag-te Haman in Jew-te a langbawlna-a a sawmsimnate a beisak nadingin a thum hi.

⁴Tua ciangin kumpipa in Esther lamah a kham ciangkhut vana tuanu dingto in a mai-ah a ding hi.

⁵Tuanu in, "Kumpipa na lung kim a, kei hih dinga kilawm na sak leh, hih dingin man na saka kei tungah na lung a kim leh na gam sunga om Jew-te khempeuh Agag beh Hamedatha tapa Haman laigelhsate lehkik nadingin lai khat gelhsak in.

⁶Ahang in, ka mipihte tungah hih siatna a tun ka muh ding thuak zo peuhmah ding ka hi hiam? Ka innkuanpihte siatna ka muh ding bangci thuakzawh ding ka hi hiam?" a ci hi.

⁷Kumpipa Xerxes in Kumpinu Esther le Jew mi Mordecai kiangah, "Haman in Jew-te a do manin a neihsate Esther tungah ka pia khina, amah gui-awk khuampite ah kikhailum khin hi.

⁸Tu-in Jew-te adingin hoih pen dinga na ngaihsut thukip dang khat kumpipa minin gelhin kumpipa seal zungbuh in tum in - ahang in, kumpipa mina thupiakna kigelh seal zungbuh kitumsa khat kimawk dawhkik thei lo hi," ci-in a dawng hi.

⁹A kha thumna Sivan kha a ni sawmnih le thumna ni-in kumpi thuvante a kisam pah hi. Amaute in Mordecai thupiakna khempeuh Jew-te tungah gelhkhia uh a, gam tampi ukte, ukpite le India pan Cush c[11] dong gam 127 a uliante tungah a hawm pah uh hi. Hih thupiaknate a gam ciata mite kampau ciat, Jew-te zong amau kam mah in amau lai ciatin a kigelhsak hi.

¹⁰Mordecai in Kumpi Xerxes minin gelh a kumpipa seal zungbuh kitumin kumpi adingin a kituam koih sakol taihatte tunga tuangte lai a kitaisak hi.

¹¹Kumpipa thupiakna in khuapi khempeuh a Jew-te kipawlkhawmin amau le amau a kihut theih nading; minam khatpeuh pana galkapte ahikeh amaute sima a numei a naupangte uh thatin su maimangin a siatsak dingte uh leh a galte un a neihsate uh a laksak ding dalsakna ahi hi.

¹²Kumpi Xerxes ukna gam khempeuh a Jew-te in hih banga a hih nadingun a kiciangtan kha sawm le kha nihna Adar kha ni sawm le thum ni ahi hi.

¹³Tua ni-in Jew-te a kiginkholh theih nading le a galte uh a thuk kik theih nadingun tua thupiakna lai kumpi-gam tengah upadi bangin a kihawmkhia hi.

¹⁴Laitaite kumpi sakol ah tuang uh a, kumpipa thupuak kintaka puak dingin a taikhia uh hi. Tua hi-a thupiakna kumpi khua Susa ah zong a kihawmkhia hi.

¹⁵Mordecai in adum le akang kumpi puan silh a, kham kumpi lukhu a lian deda khat khu in saihadial puan hoih le puansan silhsa in kumpipa omna panin a paikhia hi. Tua hi-a Susa khuapi ah lungnuamtakin pawi a kibawl hi.

¹⁶Jew-te adingin tua hun lungdam ni, gualnop ni, kipahni le kipahtawi ni ahi hi.

¹⁷Kumpipa thupiakna a tunna gam teng le khuapi tengah Jew-te lungnuam in kipakin pawi bawlin a ai uh hi. Tua hi-a minam dang tampite in Jew-te a kihtak manun Jew-te a suak uh hi.