Read Zokam Esther 9 Bible Online

Esther 9 - Zokam bible

Esther 9

¹A kha sawm le nihna Adar kha, ni sawm le thum ni-in kumpipa thupiak banga hih ding hun ahi hi. Tua ni-in Jew-te galte in amaute a zawhgawp ding uh a lamen uh hi. Ahi hangin a hun kilehbulh in amaute a mudahte tungah Jew-te a tungtuang zawsop uh hi.

²Amaute a siasak nuamte a do dingin Kumpi Xerxes gam sunga khuapite khempeuh a Jew-te a kigawm khawm ciat uh hi. Minam dangte khempeuh in amaute kihta uh ahi manin amaute langa ding zo khat beek a om kei hi.

³Gam tuamtuam a uliante, gam tampi ukte, ukpite le kumpipa naseppihte in Mordecai mat ding a lau manun Jew-te a huh uh hi.

⁴Kumpi inn sungah Mordecai thuneipi suaka, ama thuneihna gam khempeuh ah kizelin amah a vanglian semsem hi.

⁵Jew-te in a galte uh namsau-in sattukin that uh a, amaute susia in amaute a mudahte a utut-un a bawl uh hi.

⁶Jew-te in kumpi khua Susa ah mi zanga a sumang uh hi.

⁷Amaute in Parshanatha, Dalphon, Aspatha,

⁸Poratha, Adalia, Aridatha,

⁹Parmashta, Arisai, Aridai le Vaizatha,

¹⁰- Jew-te galpa Hammedatha tapa Haman tapa sawmte zong a that uh hi. Ahi hangin amau vante a sukha kei uh hi.

¹¹Kumpi khua Susa a kithatte tua ni mahin kumpipa tungah a kizasak hi.

¹²Kumpipa in Kumpinu Esther kiangah, "Jew-te in kumpi khua Susa ah mi zanga le Haman tapate sawm a that khin uh hi. Kumpi uk sung gamdangte ah bang a hih lai ding uh hiam? Tu-in bang nong kal lai ding hiam? Nang hong kipia ding hi. Bang nong ngen lai ding hiam? Nong nget lai leh hong kipia lai ding hi," a ci hi.

¹³Esther in, "Kumpipa na lung a kim leh Susa khua sungah Jew-te in tuni-a na thupiakna mah zing ciang zong hong zangsak lai-in Haman tapa sawmte gui-awk khuampi tungah hong khaisak lai in," ci-in a dawng hi.

¹⁴Tua ciangin kumpipa in a hih dingun thu a pia hi. Susa khua sungah thupiakna khat kipia a, amaute in Haman tapa sawmte a khai uh hi.

¹⁵Susa a om Jew-te Adar kha a sawm le li ni-in kikhawm uh a, Susa khua sungah mi zathum a that uh hi, ahi hangin a vante uh a sukha kei uh hi.

¹⁶Tua hun sung mahin kumpi-gam sunga Jew midangte zong a galte uh panin a kihut theih nadingun mun khatah a omkhawm uh hi. Amaute in tul sawmnih le tulnga that uh a, ahi hangin a vante uh a sukha kei uh hi.

¹⁷Hih in Adar kha a sawm le thumna ni-a thupiang hi-a a ni sawm le lina ni tawlnga-in pawi bawl ni le lungnop ni-in a zang uh hi.

¹⁸Tuaci-in Susa a Jew-te a sawm le thumna ni, sawm le lina ni in kigawmkhawm uh a, a sawm le ngana ni pawi bawl ni le lungnop ni-in a zang uh hi.

¹⁹Hih thu hangin khuata a Jew-te - khuaneu-a tengte in Adar kha ni sawm le lina ni, lungnop ni le pawi bawl ni, khat le khat letsong kipiak ni-in a zang uh hi.

²⁰Hih thupiangte Mordecai in ciamteh a, Kumpi Xerxes ukna a nai a gamla mun khempeuh a om Jew-te tungah lai a khak hi.

²¹Amaute in Adar kha a ni sawm le lina ni le a ni sawm le ngana ni pawi bawl uh a,

²²Jew-te a galte uh khut sung pan a suahtakna uh, amaute dahna, nuamna a suah kha le amaute thum ni, pawi bawl ni a suah kha phawkna in a bawl dingun a zasak hi. Amah in amaute tungah tua mite pawi bawl ni le lungnop ni-in zanga khat le khat an kikholhin mizawngte letsong piakni-a a zat dingun a gelh hi.

²³Tua ciangin Jew-te in Mordecai gelh bangin a zatsa uh zomsuak uh hi.

²⁴Ahang in Jew-te khempeuh galpa Agag mi Hammedatha tapa Haman in Jew-te sugawpin a siatsak nading pur (tua pen aisanna) in ai san-a siatsak ding a sawmsim hi.

²⁵Ahi hangin tua sawmsimna kumpipa tung a tun ciangin a[12] Haman in Jew-te tungah gitloh a sawmnate ama lutungah lehtuksakin amah le a tapate gui-awk khuam tungah kikhai hen ci-in lai gelh-a, a hawmkhia hi.

²⁶(Tua ciangin pur kammal pan la in hih nite Purim kici ahi hi) Hih laikhak sunga kigelh khempeuh hang le amaute tunga piangsa le a muhsate uh hangin

²⁷Jew-te in amaute le a suante uh leh amaute a pawlpihte in a kipelh ngei lo ngeina-in nei uh a, kum simin hih ni nihte tangin hih dinga kigelhsa bang le a kisehsa hunte a zang uh hi.

²⁸Hih nite kiphawk den dinga, a gamgam, a khuapi a khuapi ah akhang akhangin a innkuankuanin kizang ding hi. Hih Purim nite in Jew-te in pawi bawl den ding uh a, amau suante tungah a kiciamteh tawntung ding hi.

²⁹Tua ahi ciangin Abihail tanu Kumpinu Esther in Jew mi Mordecai tungah a thuneihpenna tawh Purim tawh kisai laikhak nihna a kipsak nadingin a gelh hi.

³⁰Tuateh Mordecai in Xerxes kumpi-gam 127 a om Jew-te tungah lai khak a - thu hoih le thu kician

³¹Jew mi Mordecai le Kumpinu Esther in amaute a thupiaksa bangin hih Purim nite a sehsa hunin a tan nadingun gelh a, amaute ciat in na kipsakin amau suante in amau hun ciatin an tangin taamlawh hunin a zang uh hi.

³²Hih Purim tawh kisai zuih ding ngeinate Esther thupiakna in kipsaka, ciamtehna sungah a kigelh hi.