Read Zokam Paikhiatna 1 Bible Online

Paikhiatna 1 - Zokam bible

Paikhiatna 1

¹Hihte in, Jacob tawh Egypt ah a lutkhawm Israel tapate a innkuan zui-a minte ahi hi:

²Reuben, Simeon, Levi le Judah;

³Issachar, Zebulun le Benjamin;

⁴Dan le Naphtali; Gad le Asher.

⁵Jacob suan-le-khak a vekpi in sawm sagih a[1] ahi hi; Joseph pen Egypt a, a na om kholsa ahi hi.

⁶Tu-in Joseph le a sanggamte khempeuh le amau khanga mite khempeuh a si khin uh hi.

⁷Ahi hangin Israel mite pungin khang mahmah in tampi pha uh a, tua gam leitang dimin a kibehlap uh hi.

⁸Tua ciangin Joseph thu a thei kha lo kumpi thak khat in Egypt uk hi.

⁹Amah in a gam mite kiangah, "En un, Israel mite eite sangin tamzaw lua mahmah ta uh hi.

¹⁰Hong pai un pilvangtakin amau tungah i hih kei leh tu-a sangin tamzaw semsem le uh, gal kidona khat piang leh i galte pawlin hong lehdo ding uh a, i gam a nusia kha ding uh hi," a ci hi.

¹¹Tua ahi manin amaute in nengcipin gimpi-a na a semsak dingin sila ukte amau tungah seh uh a, Pithom le Rameses, te Pharaoh’ van kholna khuapi dingin a lam uh hi.

¹²Ahi hangin a kinak netcip zawk ciangin nak khanzaw uh a, a kizelzaw uh hi; tua ciangin Israel-te hangin Egypt mite patau uh a,

¹³gimpi-in na a semsak uh hi.

¹⁴Amaute in leisek le kultar nasep ah amaute nasep haksa semsak uha, lei nasep namcin zong semsakin, Egypt mite in amaute hehpih loin nasep haksate semsak uh hi.

¹⁵Egypt kumpipa in Hebrew naudomte, Shiphrah le Puah kiangah,

¹⁶"Hebrew numeite nau na suahsak uh ciang le nausuahna tutphahah na huh uh ciangin encian unla pasal ahileh that un; numei ahileh hingkhawi un," a ci hi.

¹⁷Ahi hangin naudomte in Pasian kihta uh a, Egypt kumpipa in hih ding a cihte hih loin pasalnote a hingkhawi uh hi.

¹⁸Tua ciangin Egypt kumpipa in naudomte sama, amaute kiangah, "Bang hanga hici gamtat na hi uh hiam? Bang hanga pasalnote hingkhawi na hi uh hiam?" ci-in a dong hi.

¹⁹Naudomte in Pharaoh kiangah, "Hebrew numeite, Egypt numeite tawh kibang lo uh hi; amaute cidamin thahat uh a, naudomte a tun ma-in suakkhia khin uh hi," a ci uh hi.

²⁰Tua bangin naudomte tungah Pasian migi-a, mite khangin a tam semsem uh hi.

²¹Naudomte in Pasian a kihtakna uh hangin amaute innkuanpihte ding zong amah in pia hi.

²²Tua ciangin Pharaoh in a mite khempeuh tungah hih thupiakna a pia hi: "Nausuak b[2] pasalno peuhmah pel loin Nile gun sungah na pai ding uh a, ahi hangin numei peuhmah na hingkhawi ding uh hi," a ci hi.