Read Zokam Paikhiatna 10 Bible Online

Paikhiatna 10 - Zokam bible

Paikhiatna 10

¹Tua ciangin TOPA in Moses tungah, "Pharaoh kiangah pai in, ahang in, amaute lakah hih a piandang ka limte ka bawlbawl theih nadingin,

²na tu na tate uh tungah Egypt mite ka gimbawlzia le amaute laka limte ka bawlzia le keimah TOPA ka hilam na theih nadingun amah le a uliante’ lungsim ka khauhsak hi," a ci hi.

³Tua ciangin Pharaoh kiangah Moses le Aaron pai uh a ama kiangah, "Hih in TOPA Hebrew-te’ Pasian, gen ahi hi: ‘Ka mai-ah kiniamkhiat ding bangtan vei nial lai ding na hi hiam? Kei hong bia dingin ka mite paisak in.

⁴Amaute na paisak nop kei leh zing ciangin na gam sungah kauphe kong puak ding hi.

⁵Tuate in a kimu thei lo zahin lei maitang tuam ding uh hi. Tuate in na lo sung-ua po peuhmah singkungte a kipan gialpi denbaang a themte nemang ding uh hi.

⁶Na mite le na uliante’ innte khempeuh le Egypt mite’ innte khempeuh dim ding uh a - na pute na pate uh hih gam sunga a ten tung-ua kipan tu dong a muh ngei nai loh uh na ahi ding hi,’ ci hi," ci-in a gen uh hi. Tua ciangin Moses kihei-in Pharaoh a nusia hi.

⁷Pharaoh’ uliante in ama kiangah, "Hih mipa ei adingin bangtan vei thang hi ding hiam? TOPA amaute Pasian bia dingin tua mite paisak in. Egypt a kisiat khit lam phawk nai lo na hi hiam?" a ci uh hi.

⁸Tua ciangin Pharaoh kiangah Moses le Aaron a paipih kik uh hi. Amah in, "Pai in, TOPA note Pasian bia un. Ahi hangin kua teng pai ding ahi hiam?" a ci hi.

⁹Moses in, "Kote in ka TOPA uh kiangah pawi bawl ding ka hi manun a moi a ham, ka tanu ka tapate uh, ka tuuhon ka ganhonte uh tawh ka pai ding uh hi," ci-in a dawng hi.

¹⁰Pharaoh in, "Note tawh TOPA om khawm ta hen - na numei na naupangte uh tawh kong paisak leh bel! Gitloh a sawm taktak na hi uh hi. a[18]

¹¹Hi thei kei! Pasalte bek pai un; tu tanvei nong nget buangun TOPA va bia un," a ci hi. Tua ciangin Pharaoh kiang pan Moses le Aaron a kihawlkhia hi.

¹²Tua ciangin TOPA in Moses kiangah, "Gamsungah kauphe dim a, gialpi dengawp baang, lo-a po peuhmah a kheuh mang nadingin Egypt gam tungah na khut zankhia in," a ci hi.

¹³Tua ciangin Moses in Egypt tungah a ciangkhut vikkhia-a, TOPA in tua ni sun tawntung le zan tawntung tua gam tungah nisuahna huih a nungsak hi. Zingsang ciangin huih in kauphe a puak hi;

¹⁴Egypt gam khempeuh dima, gam sung mun khempeuhah tampitak a om hi. A om ngei nai lo, zong a om kik nawn lo ding kauphe gimna ahi hi.

¹⁵Leilak khempeuh tuamcipin vom liang hi. Tuate in gialpi den gawp baang khempeuh - lo sunga singkung, a gah nei khempeuh a kheuh siang uh hi. Egypt gam khempeuh ah singkung le ankung hing peuhmah a om kei hi.

¹⁶Pharaoh in Moses le Aaron manlangin sama, "TOPA note Pasian tung le note tungah ka mawh zo hi.

¹⁷Tu-in ka mawhna khatvei hong maisak lai unla, sihgimna kei kiang pan a lakkhiat nadingin TOPA, note Pasian tungah thu ngen un," a ci hi.

¹⁸Tua ciangin Moses in Pharaoh paisan a TOPA tungah thu a ngen hi.

¹⁹Tua ciangin TOPA in tua huih, nitumna huih khauhin kheka, tua in kauphete lenin San Tuipi b[19] sungah a puak hi. Egypt mun khempeuh ah kauphe khat beek a sit kei hi.

²⁰Ahi hangin TOPA in Pharaoh lungsim khauhsaka, Israel-te a paisak nuam kei hi.

²¹Tua ciangin TOPA in Moses kiangah, "Egypt ah khuamial - a kilawng thei zah a khuamial in Egypt a tuam nadingin na khut van lamah zan in," a ci hi.

²²Tua ciangin a khut van lamah vaan to-a, Egypt gam khempeuh nithum sung khuamial in a tuamcip bikbek hi.

²³Kuamah in bangmah mu thei lo-a, a omna mun pan nithum sung kuamah a paikhia thei kei hi. Tua hi napi Israel-te tenna mun khempeuh khua a vak hi.

²⁴Tua ciangin Pharaoh in Moses sama, "Pai un, TOPA va bia un. Na numei na naupangte uh na tonpih thei uh hi; na tuuhonte uh le na ganhonte bek uh nusia un," a ci hi.

²⁵Ahi hangin Moses in, "TOPA kote Pasian tungah biakpiakna pia ding le meihal biakna pia dingin kote nong phal pelmawh kul hi.

²⁶Ka ganhingte uh tawh zong ka pai uh kul hi; gan khecin khat zong a kinusia kei ding hi. TOPA kote Pasian, biak nadingin pawlkhat ka zang ding uh a, a mun ka tun matengun TOPA biak nadingin bang kizang lai ding hiam cih ka thei nai kei uh hi," a ci hi.

²⁷Ahi hangin TOPA in Pharaoh lungsim khauhsaka, amaute pai ding a phal kei hi.

²⁸Pharaoh in Moses kiangah, "Ka muhna ah om ke’n! Ka mai-ah hong kilak nawn peuhmah kei in! Ka mai na muh ni le na sih ni hi ding hi," a ci hi.

²⁹Moses in, "Na cih bang tektekin na mai-ah kong kilaak kik nawn kei ding hi," ci-in a dawng hi.