Read Zokam Paikhiatna 11 Bible Online

Paikhiatna 11 - Zokam bible

Paikhiatna 11

¹Tu-in TOPA in Moses kiangah, "Pharaoh tung le Egypt tungah gimna khat ka tungsak lai ding hi. Tua khit ciangin amah in hih lai pan hong paikhiasak dinga, hong paisak ciangin note hong hawlkhia siang ding hi.

²Mipite tungah gen in, numei pasal cih om loin a vengte uh tungah ngun le kham-a kibawl vante a ngen ding uh hi," a ci hi.

³(TOPA in Egypt-te in, mipite tungah deihsakna a neih nading uh lungsim guanin, Moses mahmah zong Egypt ah Pharaoh’ uliante le mite in a sangmuh mahmah uh hi).

⁴Tua hi-a Moses in, "Hih in TOPA thugen ahi hi: ‘Zankim pawlin Egypt gam ka siksuak ding hi.

⁵Kumpi tokhom tunga tu Pharaoh tapa upa pena kipan angawi-a om sila numei’ tapa upa pen le ganhonte’ tacil dongin Egypt-a tacil peuhmah a si ding hi.

⁶Egypt gam sung khempeuhah kahna nasia - tua bang a om ngei nai lo, a om ngei nawn lo ding a tung ding hi.

⁷Ahi hangin Israel mite lakah mi ahikeh ganhing tawngin ui khat zong a ham kei ding hi,’ ci hi. Tua ciangin Egypt-te le Israel-te kikalah TOPA in deidanna a neih lam na thei ding uh hi.

⁸Hih na uliante khempeuh uh ka kiangah hong pai ding uh a, ka mai-ah kunin, ‘Nang le nang hong zui mite khempeuh pai un!’ hong ci ding uh hi. Tua khit ciangin ka paikhia ding hi," a ci hi Tua ciangin Moses in heh mahmah sa-in Pharaoh a paisan hi.

⁹TOPA in Moses kiangah, "Egypt ah a lamdang a ka bawlte a tamzaw a kibawl theih nadingin Pharaoh in na thu hong nial ding hi," a ci hi.

¹⁰Moses le Aaron in Pharaoh mai-ah hih a lamdangte khempeuh bawl uh a, ahi hangin TOPA in Pharaoh lungsim khauhsak-in, Israel-te ama gamsung pan a paikhiat ding a phal kei hi.