Read Zokam Paikhiatna 12 Bible Online

Paikhiatna 12 - Zokam bible

Paikhiatna 12

¹Egypt gam sungah TOPA in Moses le Aaron kiangah,

²"Tu kha, note adingin kha masa pen, note kum a kha masa pen ahi hi.

³Tu kha a ni sawmna ni-in mikim in ama innkuan ading tuuno a[20] khat a lak ciat ding uh Israel-te khempeuh tungah gen in.

⁴Tuuno pum khat gai dingin innkuan a tawm luat leh tua lai-a om a mi tamna tawh kizui-in a kinaipih pen a inn vengte tawh a ne khawm ding uh hi. A ne ding mi le a tuuno sa zah tawh kizui-in na hih ding uh hi.

⁵Na teel uh gante pen kum khat apha, apa, a melhemna om lo hi dinga tuate tuu ahikeh keel lak pan na la ding uh hi.

⁶Tuate, tua kha ni sawm le li ni dong na kem ding uh a, tua ni khuamui ciangin Israel mi khempeuh in a go ding uh hi.

⁷Tua ciangin a sisan pawlkhat la-in tuuno a nekna uh innte’ kongmungte a tung le a pang tuakah a nuh ding uh hi.

⁸Tua ni zan mah in a sa mei-ah hangin lo kha le silngo sawh loh anlum tawh amaute in a ne ding uh hi.

⁹A sa a sial ahikeh tuihuanin na ne kei ding uh a, ahi hangin mei tungah - a lu, a khe le a sungkua-te na hang ding uh hi.

¹⁰Zingsang dong khamval bangmah na sit kei ding uh a zingsang dong a val a om leh na haltum ding uh hi.

¹¹Na nek zia ding uh in: puantualpi kawnggak gaksa, khedap bulhsa le na khut sunguah ciangkhut tawi kawmsa-in na ne ding uh hi. Na nawh nek ding uh hi; tua in TOPA’ Paisan na ahi hi.

¹²"Tua ni zan mah in Egypt gam nawksuakin, mihing, ganhing tacil peuhmah ka sattuk dinga - Egypt a pasiante khempeuh tungah thukhenna ka tungsak ding hi. Keimah TOPA ka hi hi.

¹³Na omna uh inn-a sisan kinuh pen note adingin lim hi ding hi; tua sisan ka muh ciangin note kong paisan ding hi. Egypt-te ka vat ciangin a nasia gimna bangmah in note hong sukha kei ding hi.

¹⁴"Hih in na phawk tawntung ding uh ni khat ahi hi; akhang akhangin TOPA tungah pawi na bawl ding uh a - tua in a kip tawntung thuzek hi ding hi.

¹⁵Ni sagih sung silngo sawh loh anlum na ne ding uh hi. A ni masa ni-in na inn sung panun silngo paikhia un, ahang in, ni khat ni pan ni sagih ni ciang silngo kisawh khatpeuh a ne a om leh Israel panin kikhenkhia ding hi.

¹⁶A ni masa ni-in asiangtho kikhopna khat nei unla, a ni sagihna ni-in adang khat nei un. Note sep theih ding ahi nek ding an huan ding sim loh hih nite in bangmah sem kei un.

¹⁷"Egypt pana a pawlpawl a kong paikhiatpih ni tuani mahmah ahi manin Silngo-sawhloh Anlum Pawi bawl un. Akhang akhangin tua ni-in pawi bawl unla a kip tawntung thuzekin nei un.

¹⁸A kha masa sung, a ni sawm le lina ni nitak panin a ni sawm nih le khat ni nitak dong silngo sawh loh anlum na ne ding uh hi.

¹⁹Ni sagih sung na innsung-uah silngo a kimu kei ding hi. Tua hi a silngo kisawh na khatpeuh a ne a om leh pemta ahi a, tualsuak ahi zongin Israel mipi panin kikhenkhia ding hi.

²⁰Silngo kisawh bangmah ne kei un. Na tenna peuhpeuh uhah silngo sawh loh anlum bek na ne ding uh hi," a ci hi.

²¹Tua ciangin Moses in Israel upate khempeuh sama amaute tungah, "Pai pah unla, no innkuan ading gan telkhia-in Paisan tuuno go un.

²²Puknah lomkhat khiak unla kuang sunga sisan lakah diahin kongmung tung le a pangtuakah sisan nuh un. Zingsang mateng, note khat beek ama inn kong pua-ah a paikhia kei ding hi.

²³Egypt mite satlum dingin gamsung khempeuhah TOPA a pai ciangin kongmung tung le a pangtuaka sisan mu dinga, tua kongvang paisanin, amah in a susiapte na inn sungah tumsak loin no hong kisatlum lo ding hi.

²⁴"Nang le na suan-le-khakte adingin hih lamlahnate a kip tawntung thuzek bangin zui un.

²⁵TOPA in piak dinga hong ciamsa tua leitangah na lut uh ciangin hih ngeina pawi-in bawl un.

²⁶Na tate un, ‘Hih ngeina-pawi bang deihna-a bawl na hi uh hiam?’ ci-in hong dot uh ciangin,

²⁷amaute kiangah, "TOPA tungah Paisan biakpiakna ahi hi; amah in Egypt-te a satlup lai-in Egypt a om Israel-te’ innte hong hawi hi,’ ci un," a ci hi. Tua ciangin mipite kunin a bia uh hi.

²⁸Israel mite in, TOPA in Moses le Aaron a thupiak bang tektek in a hih uh hi.

²⁹Zan kim laitakin TOPA in Egypt gam sunga tacil khempeuh kumpi tokhom tunga tu Pharaoh’ tapa a kipan thong-hawmpi sunga om thong kiate’ tacil le ganhingte’ tacilte dongin a satlum khin hi.

³⁰Pharaoh le a uliante khempeuh le Egypt-te khempeuh zanin tho uh a, misi om lohna inn khat beek om lo ahi manin Egypt ah kahna nasiapi a tung hi.

³¹Pharaoh in azan azanin Moses le Aaron sama, "Dingkhia un! Nang le Israel mite in ka mite nusia un! Pai un, nong ngetsa bangun TOPA bia un.

³²Na gensa bangun na tuuhonte uh le na ganhonte uh hawlin pai un. Kei zong thupha hong pia un," a ci hi.

³³Tua mite in manlanga a gam uh a paisan nadingun Egypt mite in a sawl uh hi. Amaute in, "Tua hi kei leh eite i si khin ding hi!" a ci uh hi.

³⁴Tua ciangin mipite in a annel mekmansa uh silngo sawh ma-in la uh a, a mekna kuang sungah puan khuhin a liangko-uah a pua uh hi.

³⁵Moses lamlah bangin Israel-te in Egypt mite tungah ngunle kham-a kibawl vante le puansilhte a ngen uh hi.

³⁶TOPA in Egypt mite tungah mipite’ deihsakna guan-a, amaute nget peuhpeuh a pia uh hi; tua bangin amaute in Egypt-te a lawk uh hi.

³⁷Israel-te, Rameses pan Succoth ah a zin uh hi. Numei naupang simloh pasal khe-a pai, tul zaguk bang a pha hi.

³⁸Midang tampi in zong amaute zui uh a, ganhon tampi hawlin tuuhon le bawnghonte a tonpih khawm uh hi.

³⁹Egypt pana a puak uh annel meksate silngo sawh loh anlum khomunin a em uh hi. Annel meksate silngo a kisawh kei hi, bang hang hiam cih leh amaute Egypt panin kinawhkhia a, amau an ding kigin hun ding a nei kei uh hi.

⁴⁰Egypt a[21] sunga Israel-te a ten sung uh kum 430 a sawt hi.

⁴¹Kum 430 a bei ni lianin TOPA’ mi khempeuh in Egypt a nusia uh hi.

⁴²Amaute Egypt pan a pikhia dingin tua ni zanin TOPA zanhak ahi manin Israel mite khempeuh akhang akhangin TOPA pahtawina in hih zanin a zanhak uh hi.

⁴³TOPA in Moses le Aaron tungah, "Hihte Paisan’ na tawh kisai ngeinate ahi hi. "Gamdang mipa in tua a ne kei ding hi.

⁴⁴Na leisa uh silate a vun na atsak khit uh ciangin a ne thei ding uh hi;

⁴⁵ahi hangin khualzin-a hong tamte le sum thalawh-a omte in a ne thei kei ding uh hi.

⁴⁶"Inn khat sungah kine ding hi; a sate khat beek inn pua-ah kipusuah lo ding hi. A guhte khat beek sutan kei un.

⁴⁷Israel mihon buppi in hih pawi a bawl ding uh hi.

⁴⁸Note laka teng pemta khat in TOPA Paisan Pawi a bawl nop leh a inn sunga pasal khempeuh in vun a at ding uh hi; tua ciangin gammi khat bangin a kihel thei ding hi. Pasal vun at lote in a ne kei ding uh hi.

⁴⁹Note laka a teng pemtate le tualsuak mite in a kibangin a zui ding uh hi," a ci hi.

⁵⁰Israel-te khempeuh in, TOPA in Moses le Aaron a thupiak bang tektekin a hih uh hi.

⁵¹Tua ni tektek mah in TOPA in Israel-te a pawlpawl in Egypt pan a paikhiatpih hi.