Read Zokam Paikhiatna 13 Bible Online

Paikhiatna 13 - Zokam bible

Paikhiatna 13

¹TOPA in Moses kiangah,

²"Tacil peuhmah kei tungah hong ap un. Israel-te lakah, naubu sunga piangkhia masa pen peuhmah mihing ahi-a, ganhing ahi zongin kei aa ahi hi," a ci hi.

³Tua ciangin Moses in mite tungah, "Tuni, Egypt pana na paikhiat ni uh, sila suahna gam pana na paikhiat ni uh phawk un; bang hang hiam cih leh TOPA in a thahat khutin tua lai pan hong paikhiatpih hi. Silngo kisawh bangmah ne kei un.

⁴Abib kha tuni-in na nusia uh hi.

⁵TOPA in Canaan-te, Hit-te, Amor-te, Hiv-te le Jebus mite omna gam -na pute uh tunga, no tunga hong piak dinga a ciamsa gam - bawngnawi le khuaizu luanna hong tut ciangin - hih kha in hih pawi na bawl ding uh hi:

⁶Ni sagih sung silngo sawl loh anlum ne unla, a ni sagihna ni-in TOPA tungah pawi bawl un.

⁷Tua ni sagih sung teng silngo sawh loh anlum ne un; note lakah silngo kisawh bangmah a kimuh loh banah note omna huam sung mun khat beekah silngo a kimu kei ding hi.

⁸Tua ni-in na tapa tungah, ‘Egypt pana kong paikhiatpih lai-in TOPA in kei ading nasem ahi manin hih ka sem hi,’ ci-in gen un.

⁹Hih pawibawlna pen, note khut-ah note adingin lim hi henla, na muk-uah TOPA’ thukham hi-in, na taltang-uah phawkkiksakna hi hen. Ahang in, TOPA in a khut thahat tawh Egypt panin hong pikhia hi.

¹⁰Kum khat khit kum khat thuseh hunin hih pawi na bawl tektek ding uh hi.

¹¹"TOPA in no tung le na pute uh tungah tomlo-a a kiciamsa bangin Canaan mite’ leitangah hong puakin nang hong piak ciangin

¹²naubu peuhmah sunga piang masate TOPA tungah na pia ding uh hi. Na ganhingte uh ta apa a suak masa peuhmah TOPA aa ahi hi.

¹³Laa a suak masa pen tuuno khatin tan un, ahi zongin na tat kei uh leh a ngawng kuaitan un. Na tapate uh lakah a suak masa peuhmah tan un.

¹⁴"Mailam hunah na tapa in hong dot-a, ‘Hih bang cihnopna hiam?’ hong cihleh ama kiangah, ‘TOPA in khut thahat tawh Egypt-a sila suahna panin hong paikhiatpih hi.

¹⁵Pharaoh in kote paisak ding a nial tentan ciangin TOPA in Egypt a tacil peuhmah mihing ganhing a nihin that khawm hi. Tua hangin naubu peuhmah-a piangkhia masa pasal peuhmah TOPA tungah biakpiakna in kipia ka tapa a suak masa pen ka tan hi,’ ci in.

¹⁶Tua in na khutah lim bang hi henla, na taltang tungah ciamtehna lim hi hen; ahang in, TOPA in a khut thahat tawh Egypt panin hong paikhiatpih hi," a ci hi.

¹⁷Pharaoh in mipite a paisak ciangin Pasian in, a nai zawk hangin Philistia-te gam lamah amaute a makaih kei hi. Ahang in Pasian in, "Amaute in gal tuak le uh a lungsim uh khel-in Egypt ah ciah kik kha ding uh hi," a ci hi.

¹⁸Tua ahi ciangin Pasian in mite San Tuipi a[22] lam manawh in sehnel gam lampi tawnin a kual paipih hi. Israel mite galsim dingin Egypt pan kithuamsa-in paikhia to uh hi.

¹⁹Joseph in Israel’ tapate tomlo-in kiciamsak ahi manin Moses in Joseph guhte a pua hi. Amah in, "Pasian in note hong huh pelmawh ding hi, tua ciangin hih mun panin ka guhte na pua pelmawh ding uh hi," b[23] a ci hi.

²⁰Succoth a nusiat khit uh ciangin Sehnel-gam nawl Etham ah giahphual a sat uh hi.

²¹Amaute sun le zanin a pai theih nadingun sunin TOPA amai-uah meii khuampi-in pai-in makaih a, amaute khuavak dingin zanin mei khuampi sungah amaute a makaih hi.

²²Sun-a meii khuampi, zan-a mei khuampi in mipite mai-a a omna a lawi kei hi.