Read Zokam Paikhiatna 17 Bible Online

Paikhiatna 17 - Zokam bible

Paikhiatna 17

¹Israel mipi bup Sin Sehnel-gam panin dingkhia uh a, TOPA thupiak bangin mun khat pan mun khatah a zin uh hi. Rephidim ah giahphual sat uh a, ahi hangin mipite tui dawn ding tui a om kei hi.

²Tua ciangin Moses tawng uh a, "Ka dawn ding uh tui hong pia in," a ci uh hi. Moses in, "Bang hanga kei hong tawng na hi uh hiam? Bang hanga TOPA zia-et na hi uh hiam?" ci-in a dawng hi.

³Ahi hangin tua lai-ah mipite dangtak uh a, Moses a phunsan uh hi. Amaute in, "Bang hanga dangtaka si dingin kote, ka tate uh le ka ganhingte uh Egypt pan hong paikhiatpih na hi hiam?" a ci uh hi.

⁴Tua ciangin Moses in TOPA ko a, "Hih mipite bang cih ding ka hi hiam? Amaute in suangin hong deng dekdek uh hi," a ci hi.

⁵TOPA in Moses kiangah, "Mipite mai-ah pai in. Israel upate pawlkhat tonpih inla, na khutin Nile na satna ciangkhut tawi kawmin pai in.

⁶Horeb a suangpi gei na mai-ah ka na ding ding hi. Suangpi sat lecin mite dawn ding tui hong phulkhia ding hi," a ci hi. Tua ciangin Moses in Israel upate muh in tua bangin a hih hi.

⁷Amah in tua mun Massah c[36] le Meribah d[37] min a phuak hi, bang hang hiam cih leh Israel-te in tawng uh a, amaute in TOPA zia-et in, "TOPA eite lakah om hiam, om lo hiam?" a ci uh hi.

⁸Amalek-te kuanin Rephidim a Israel-te sim uh hi.

⁹Moses in Joshua kiangah, "I mite pawlkhat tengkhia inla Amalek mite do dingin va kuan un. Zing ciangin mual tungah ka khutah Pasian ciangkhut tawisa in kei ka na ding ding hi," a ci hi.

¹⁰Moses thupiak bangin Joshua in Amalek-te do-a, mualdawn ah Moses, Aaron le Hur a kah to uh hi.

¹¹Moses in a khut a liiktoh laisiah Israel-te gualzo uh a, ahi hangin a khut a niamkhiat suk ciangin Amalek-te in a zo uh hi.

¹²Moses khut a kham ciangin amaute suang khat la in a nuai-ah koih uh a, amah a tungah a tu hi. Nitum dong a khut a zan suak zawh nadingin Aaron le Hur - khat langkhatah pangin, a lang khatah khat pang uh a, a khutte a domsak uh hi.

¹³Tua ci-in Joshua in Amalek galkapte namsau in a zo hi.

¹⁴Tua ciangin TOPA in Moses kiangah, "A kiciamteh den dingin hih thu laizial tungah gelh inla, Joshua zasak pelmawh in, bang hang hiam cih leh van nuai panin Amalek mite phawkna ka phiatsiang kiuhkeuh ding hi," a ci hi.

¹⁵Moses in biakna-tau khat dawh a, TOPA ka Dialkhai ahi hi, ci-in min a phuah hi.

¹⁶Amah in, "TOPA kumpi tokhom dongah khutte kilaamto hi. TOPA in khang sawnsawnte dongin Amalek-te a do ding hi," e[38] a ci hi.