Read Zokam Paikhiatna 18 Bible Online

Paikhiatna 18 - Zokam bible

Paikhiatna 18

¹Tu-in Moses sungpa, Midiante siampipa Jethro in, Pasian in Moses le a mipihte ading a sepna teng le TOPA in Egypt panin Israel-te bangci paikhiatpih cih a na za hi.

²Moses in a zi Zipporah sawla a paisak nungin a sungpa Jethro in amah

³le a tapa nihte a na kem hi. Moses in, "Gamdang ah pemta ka suak hi," a cihna in a tapa khat min Gershon f[39] phuak-a,

⁴"Ka pa’ Pasian kei hong huhpa ahi hi; amah in Pharaoh’ namsau panin hong hon hi," a cihna in a khat pen min Eliezer g[40] a phuak hi.

⁵Moses sungpa Jethro, Moses zi le a tapate tawh, Pasian mual kianga a giahphual satna uh ah a pai uh hi.

⁶Jethro in ama kiangah kam vaikhak a, "Keimah na sungpa Jethro na zi le a tate nih tawh kong pai hi," a ci hi.

⁷Tua ciangin Moses a sungpa tawh kimu dingin paikhia-a, kunin amah a nam hi. Amaute khat le khat kihopih uh a, tua ciangin puanbuk sungah a lut uh hi.

⁸Moses in a sungpa kiangah, TOPA in Israel-te a cihna-a Pharaoh le Egypt-te tunga a bawlna teng le a lampi tawntung-ua amaute tuah haksatna khempeuh le TOPA in amaute a hotkhiatna thute a gen hi.

⁹TOPA in Egypt-te khut sung panin Israel-te hukhia-a, amau ading na hoih tampi a sepsaknate Jethro in a zak ciangin a lungdam hi.

¹⁰Amah in, "Egypt-te le Pharaoh khut pana nang hong hukhiapa le Egypt-te khut pana mipite a hukhiapa, TOPA kiphat ta hen.

¹¹Israel-te tunga a ki-uangsakte tungah hih banga a sem pasian dang khempeuh sangin TOPA a liatzawk lam tu-in ka thei hi," a ci hi.

¹²Tua ciangin Moses sungpa Jethro in Pasian tungah meihal biakna le biakpiakna dangte pia-a, Moses sungpa tawh anlum ne khawm dingin Aaron le Israel upate khempeuh Pasian mai-ah a pai uh hi.

¹³A zing ciangin mipite thukhen-in Moses a tutphah ah tu-a, amaute zingsanga kipan nitak dong a kimkotah a ding uh hi.

¹⁴Moses in mipite ading a sepna khempeuh a sungpa in a muh ciangin, "Mipite ading nasep hih bang ahi hiam? Bang hanga hih mipite khempeuh zingsanga kipan nitak dong na kimah dingsaka, nang kia bek thukhena tu na hi hiam?" a ci hi.

¹⁵Moses in, "Bang hang hiam cih leh Pasian deihna zongin ka kiangah mipite hong pai uh hi.

¹⁶Kisiatna khatpeuh a neih uh ciangin a thu uh kei kiangah hong tun uh a, alang tuakah thu khensakin Pasian thukip le thukhamte ka zasak hi," ci-in a dawng hi.

¹⁷Moses sungpa in, "Tu-a na hih zia hoih lo hi.

¹⁸Nang le na kianga hong pai mite na gim lua ding uh hi. Nang adingin nasep haksa lua hi; nang guakin na len zo kei ding hi.

¹⁹Tu-in ka thugen na ngai inla, ngaihsutna pawlkhat kong pia ding hi, Pasian in nang hong ompih ta hen. Nang pen Pasian mai-ah mipite tang na hi dinga, amaute kisiatnate ama tungah na puak ding hi.

²⁰Amaute, thukham le thukipte hilh inla, amau hih ding tavuan le a nuntakna zia ding uh hilh in.

²¹Ahi zongin mipi khempeuh panin mi kizen - Pasian a zahtak, a muanhuai, thumaan lo-a ngahna a mudah mi - tengkhia inla a tultul, a zaza, a sawmnganga le a sawmsawm ukin koih in.

²²Hun khempeuhah amaute, mipite thu khensak-in, ahi hangin thu haksa peuhmah nang kiangah na tunsak ding hi; a baih thute amaute mah in khenpah ding uh hi. Tua in na van hong zangsak tuam ding hi, bang hang hiam cih leh amaute in hong dawn ding uh hi.

²³Hici-in na sepa, Pasian in thu hong piak leh na sem suak zo dinga, hih mipite khempeuh lah lungkimin innah a ciah ding uh hi," ci-in a dawng kik hi.

²⁴Moses in a sungpa thu mangin a gen khempeuh a hih hi.

²⁵Amah in Israel khempeuh lak pan a kizen mi telkhia-a, a tultul, a zaza, a sawmnga nga le a sawmsawmte tungah ulianin a koih hi.

²⁶Hun khempeuhin amaute in mipite thu a khen uh hi. Amaute in thuhaksate Moses tungah puak uh a, ahi zongin a baihte amau mah in a khen uh hi.

²⁷Tua ciangin Moses in a sungpa kha-a, a gamah Jethro ciah hi.