Read Zokam Paikhiatna 2 Bible Online

Paikhiatna 2 - Zokam bible

Paikhiatna 2

¹Tu-in Levi innkuan sung mi khat in Levi numei khat a tenpih hi;

²tuanu gai-a tapa khat a nei hi. Amah in tua naupang ahoih lam a muh ciangin kha thum sung a sel hi.

³Ahi hangin a sel theih nawn loh ciangin pumpeng lawh khat kurtal le buanman tawh bittakin a zut hi. Tua ciangin a sungah naupang siala, Nile gun dung pumpeng lakah a koih hi.

⁴Naupang tungah bang piang hiam, cih a vil dingin naupang’ sanggamnu a gamla simah a ding hi.

⁵Tua ciangin Pharaoh’ tanu kisil dingin Nile gunah paisuka, a nasemte gungei tengah pai uh hi. Amah in pumpeng laka om tua lawh mu a, a silanu tua la dingin a sawl hi.

⁶Amah in tua lawh honga naungek a mu hi. Naungek kapkapa a hehpih hi. Tuanu in, "Hih in Hebrew naungekte laka khat ahi hi," a ci hi.

⁷Tua ciangin a sanggamnu in Pharaoh’ tanu kiangah, "Nau hong donsak ding Hebrew numei khat kong zonsak ding hiam?" ci-in a dong hi.

⁸Amah in, "Hihen, va zong in," ci-in a dawng hi. Tua ciangin tuanu pai-a naungek’ nu a va sam hi.

⁹Pharaoh’ tanu in tuanu kiangah, "Hih naungek la inla kei adingin hong donsak in, kong guai ding hi," a ci hi. Tua ciangin tuanu in naungek la-a a donsak hi.

¹⁰Naupang a liatzawk ciangin amah in Pharaoh tanu kiangah paipiha, a tapa a suak hi. Amah in, "Tui lak pana ka lakkhiat," a cihna in a min Moses a[3] a phuak hi.

¹¹Nikhat Moses a khan khit ciangin, a mipihte omna-ah pai-a haksapi-a na a sepna uh a va en hi. Egypt-te khat in a mipih Hebrew-te khat a sat a mu hi.

¹²Akiim-apam en-a, kuamah a muh loh ciangin Egypt pa thatin, sehnel lakah a phualsel hi.

¹³A zing ciangin vakkhia a, Hebrew-te nih a kilai a mu hi. A khialzawpa kiangah, "Bang hanga nang na mipih Hebrew pa sat na hi hiam?" ci-in a dong hi.

¹⁴Tuapa in, "Ko tunga thukhen dingin kua in nang ukpa-a hong koih ahi hiam? Egypt pa na thah bangin kei thah hong sawm na hi hiam?" a ci hi. Tua cianign Moses lau-a, "Ka gamtatnasa kithei hi pelmawh ding hi," ci-in a ngaihsun hi.

¹⁵Pharaoh in hih thu a zak ciangin Moses thah a sawm hi; ahi hangin Pharaoh kiang pan Moses tai-in Midian ah teng dingin pai-a tuikhuk gei khatah a tu hi.

¹⁶Tu-in Midian siampipa khat in tanu sagih nei-a, tui tawi ding le a pa tuuhonte dawn ding kuangzawn sunga tui dim dingin va kuan uh hi.

¹⁷Tuu cing pawlkhat pai uh a amaute a nawhkhia uh hi. Ahi hangin Moses dingkhia a, amaute hu-in a tuute uh tui a piaksak hi.

¹⁸Tua nungakte a pa uh Reuel kiangah a ciah uh ciangin amah in amaute kiangah, "Bang hanga tuni-in hong hici tunbaih na hi uh hiam?" ci-in a dong hi.

¹⁹Amaute in, "Egypt mi khat in tuu cingte pan hong hu hi. Tui nangawn hong tawisaka tuuhonte tui a pia hi," ci-in a dawng uh hi.

²⁰Amah in a tanute kiangah, "Tu-in amah koi-ah om ahi hiam?" ci-in donga, "Bang dinga amah nusia na hi uh hiam? Hong sam un, bang khatpeuh nesak ni," a ci hi.

²¹Tuapa tawh ten ding Moses thukima tua pa in a tanu Zipporah Moses zi dingin a pia hi.

²²Zipporah in tapa khat nei a Moses in, "Kei gamdangah pemta-in ka om hi," a cihna-in a min Gershom b[4] a phuak hi.

²³Tua hun sawtpi sungin Egypt kumpipa a si hi. Israel mite sila suahna panin kikoin thum uh a, amau sila suahna pan a huh nading a kikona uh Pasian tungah a tungto hi.

²⁴Pasian in amau thumna za a, Abraham tawh Isaac tawh Jacob tawh a thukhun a phawk hi.

²⁵Tua ahi manin Pasian in Israel mite ensuk-a amaute a lunghimawh hi.