Read Zokam Paikhiatna 23 Bible Online

Paikhiatna 23 - Zokam bible

Paikhiatna 23

¹Zuauthu gen kei un. Elna hanga tecipanna tawh migilopa huh kei un.

²"Khialhna bawl dingin mihonpi nung na zui kei un. Thusia kineihna-ah teci-a na pan ciangun mi tam lamlamah kopin thutang deihkaih kei un;

³ama thuneihna ah mizawngpa na angvan tuan kei un.

⁴"Na galte bawngtal ahikeh laa khat, a gammang na tuah khak uh leh ama kiangah hawl kik pelmawh un.

⁵Nang hong mudah mipa laa van pua-a tuk na muh uh leh nusia mawk kei un; tua gan tungtawnin amah na huh ding uh hi.

⁶"Na mipih a zawngte thu kineihna tungtangah thutang gen ding na nial kei un.

⁷Zuauthu-a kingawhna-ah kikum kei unla, mawhpengpa le midikpa thatsak kei un, ahang in, a mawh mi ka suaktasak kei ding hi.

⁸"Golhsum in amaute mit humsaka thumaan thu kawnghek ahi manin golhguk sum na la kei ding uh hi.

⁹"Pemta khat nengcip kei un. Egypt ah pemta-a omngei na hi manun note mahmah in pemtate thuakzia ding na thei uh hi.

¹⁰"Na lote uhah kum guk sung khaici vawhin an na la ding uh hi;

¹¹ahi hangin a kum sagihna kumin na lo kho loin khul in. Tua ciangin na mite laka mizawngte in tua lai pan an a ngah thei ding uh hi; amaute nusiatte gamsate in a ne thei ding uh hi. Na lenggui huan le na olive huangah zong tua bangin hih un.

¹²"Niguk sung na sem in, ahi hangin na bawngtal le na laate a tawlngak theih nading le na inn sunga suak silate le pemtate in thathak a ngah theih nadingun a ni sagihna ni na sem kei un.

¹³"Nang tunga kong gensa thu limtakin thudon in. Adang pasiante min lo kei un; na muk pan un tuate kizasak kei un.

¹⁴"Kum khatin kei ading pawi thumvei na bawl ding uh hi.

¹⁵"Silngo-sawhloh Anlum Pawi na bawl un. Kong thupiaksa bangin ni sagih sung silngo sawh loh anlum na ne un. Abib kha a kiseh hunin na hih un, ahang in, tua kha-in Egypt pan a paikhia na hi uh hi. "Ka mai-ah kuamah khutguakin hong kilaak kei ding hi."

¹⁶"Lo sunga na tuh uh gahmasate tawh Anlak Pawi na bawl ding uh hi. "Lo-a ansang kaihkhop khit kum bei ciangin Ansangkhum Pawi na bawl ding uh hi.

¹⁷"Kum khat sungin thumvei Thuneipen TOPA mai-ah mite khempeuh a kilaak ding uh hi.

¹⁸"Biakpiakna sisan tawh silngo kisawh na khatpeuh piakhawm kei un. "Keima pawi-a kipiate’ thau zingsang dong a kikem peuhmah kei ding hi.

¹⁹"Note leitang pana piang a gahmasa a hoih pen, TOPA note Pasian, innah hong puak un. "Keelno a pi nawizu-in huan kei un.

²⁰"En un, ka bawlsa munah hong tung ding lampi tawntungah hong cing dingin note mai-ah vansawltak khat ka sawl hi.

²¹Amah thusimin a genna ngai un. Amah langdo kei un; amah ah ka Min a om nungsangin hong maisak lo ding hi.

²²Ama thugen limtakin na ngaih uh a ka gen khempeuh na sep uh leh na galte’ gal ka hi dinga nang hong langdote’ ka do ding hi.

²³Na mai uhah ka vansawltak pai-in Amor-te, Hit-te, Periz-te, Canaan-te, Hiv-te le Jebus-te gam hong tun dinga keimah in amaute ka phiatmang ding hi.

²⁴Amaute’ pasiante’ mai-ah kun kei unla, tuate bia kei un; amau hih bang zui kei un. Tuate sucim in a suang siangthote uh na satnen pelmawh ding uh hi.

²⁵TOPA, note Pasian bia un; tua hileh na an uh le na tui uh tungah thupha hong pia ding hi. Note lak pan cinatna ka lakhiamang dinga,

²⁶na gam-uah nausia kuamah om loin tasel zong a om kei ding hi. Tekkut vuaikutin kong nungtasak ding hi.

²⁷"Na mai uhah ka lauhuaina ka sawl dinga, na phutkhak uh minam peuhpeuh ka buaisak ding hi. Na galte khempeuh uh ka lehtaisak khin ding hi.

²⁸Hiv-te, Canaan-te le Hit-te na lampi pan a hawlkhia dingin na mai uh ah zanta ka sawl ding hi.

²⁹Ahi hangin tua gam hawmmang in no adingin gamsa tam lua ding ahi manin kum khat sung bekin ka hawlmang kei ding hi.

³⁰Tua gam a luah khom dinga na khan matengun note mai-ah tawmtawmin ka hawlkhia ding hi.

³¹"Na gamgi uh San Tuipi a[59] pan Philistia b[60] Tuipi le sehnel-gam pan Gun c[61] dong ka kipsak ding hi. Tua gama teng mite note khut sungah kong pia dinga, amaute na hawlmang ding uh hi.

³²Amaute ahi zongin amau pasiante tawh ahi zongin thukhun bawl kei un.

³³Na gam sunguhah amaute tengsak kei un, tua hi kei leh a pasiante uh a biakna un no adingin thangzak suak ding ahi manin amaute in note, kei tungah mawhna hong bawlsak taktak ding uh hi," a ci hi.