Read Zokam Paikhiatna 26 Bible Online

Paikhiatna 26 - Zokam bible

Paikhiatna 26

¹"Hoih taka kikhuk adum, a dupsan, a ausan khau tawh kigan puanzak sawm, khutsiamte in a bawl cherub-te tawh biakbuk na bawl ding hi.

²Puanzak khempeuh kikimin - tong sawm nih le giat sau dinga, tong li a zai g[71] ding hi.

³Puanzak ngate peh inla, adang ngate zong tua mah bangin hih in.

⁴Puanzak kimatna mong dungah adumin bilvang bawlin puanzak dangte zong tua bangin na bawl ciat ding hi.

⁵Puanzak nga kipehte khatah a bil sawmnga guan inla, a khat penah zong sawmnga mah guanin a bil tuak khat le khat kitangsak in.

⁶Tua ciangin kham mekkilh sawm nga bawl inla, biakbuk bupkhat a suah theih nadingin tua puanzakte gawmkhawmna-in zang in.

⁷"Biakbuk tung khuhna puante keelmul hi dinga, a vekpi-in sawm le khat hi ding hi.

⁸Puanzak sawm le khatte a vekin kikim dinga, tong sawmthum sau-in tong li zai h[72] ding hi.

⁹Kop khat dingin nga zom inla, a kop dang khat dingin guk zomin. Puanzak a gukna pen puanbuk mai-ah khep nihin na khep ding hi.

¹⁰A kipehkhawm puanzak khat mong zui-in a bil gual inla, puanzak a kop khat pen mong zui-in zong a bil gual in.

¹¹Tua ciangin sumsan mekkilh sawm nga bawl inla, puanbuk bupkhat a suah nadingin a bilte ah mekkilh thuahin gak in.

¹²Puanbuk puanzak a valkhia a lang pen biakbuk nung lamah kaisuk ding hi.

¹³Puanbuk puanzakte a pang tuakah tong i[73] khat tuak sauzaw ding hi; tua aval pen biakbuk pang tuak khuhna hi ding hi.

¹⁴Puanbuk khuh nadingin a san-a kinim tuutal vun, le tua tunga khuh sawn nadingin tuipi bawngpi a[74] vunte bawl in.

¹⁵"Biakbuk dingin singkha singpek kitung lem in.

¹⁶Tua singpek tong sawm sau in tong khat le alang zai b[75] ding hi.

¹⁷Khat le khat a kibang a khun theih dingin a bulhna azang nih ciat om ding hi. Biakbuk singpek khempeuh hih banga na hih ding ahi hi.

¹⁸Biakbuk leitaw-lam ading singpek sawmnih bawl inla,

¹⁹tuate tun nading a nuai-ah ngun bullen sawmli bawl inla, singpek khat ading bullen nih ciat, azangte ah bullen khat ciat om ding hi.

²⁰Apang khat lam biakbuk leilu-lam pangah, singpek sawmnih le

²¹ngun bullen sawm nih - singpek khat nuai-ah nih ta na bawl ding hi.

²²A phaitam lam, tua pen biakbuk nitumna lam mongah

²³a phaitam lam kiute ading singpek nih bawl in.

²⁴Hih a kiute tuakah alu pan ataw dongin tuate nih paikhawm dinga, sikkual khat sungah kikhum khawm ding hi. A nihin tua bang hi ding hi.

²⁵Tua ahi ciangin singpek giat le ngun bullen sawm le guk - singpek khatah nih ciat a om ding hi.

²⁶"A khilna singkha zawlte zong bawl in: a singpekte adingin biakbuk pang khatah nga,

²⁷apang lang khata ding nga mah le biakbuk phaitam lam, a nitumna lam adingin nga mah bawl in.

²⁸A laizanga kilhna zawl pen, a singpek kim tanah mong khat pan mong khatah paisuak ding hi.

²⁹Singpekte khamtui luan inla, a khilna zawlte a len dingin kham kualte bawl in. A khilna zawlte zong khamtui luan in.

³⁰"Mual tunga nang hong kilak gelna bangin biakbuk lem in.

³¹"Hoihtaka kikhuk adum, adupsan, a-ausan khau tawh hoihtaka kigan puan, khutsiamte in a bawl cherub-te tawh kizem puanzak khat bawl in.

³²Ngun bullen lite tung ading, khamtui kiluan singkha khuam lite tungah kham vankhaina in khai in.

³³Puanzak a kilhnate-in khai inla, puanzak nungah Tecipanna singkuang koih in. Puanzak in Mun Siangtho Pen panin Mun Siangtho khenkhia ding hi.

³⁴Mun Siangtho Pen sunga Tecipanna singkuang tungah thoihdamna sin koih in.

³⁵Biakbuk leilu-lam pang puanzak pua ah sabuai koih inla, tua tung a leitaw-lam pangah a kigalsai-in meivak tunna koih in.

³⁶"Puanbuk kongkhak dingin a adum, adupsan, a-ausan khau, limtaka kikhuk-a kigan puan - khut tawh phima kikhui puanzak khat bawl in.

³⁷Hih puanzak adingin kham kualte le khamtui kiluan singkha khuam nga bawl in. Tuate tun nading sumngo bullen nga sung in.