Read Zokam Paikhiatna 28 Bible Online

Paikhiatna 28 - Zokam bible

Paikhiatna 28

¹"Kei tunga siampi nasem dingin Israel-te lak panin na sanggampa Aaron in a tapate Nadab le Abihu, Aleazar le Ithamar na kiangah tonpihsak in.

²Amah zahtak a baangsak ding le pahtawi nadingin na sanggampa Aaron puansilh siangthote bawlsakin.

³Amah in kei ading siampi na a sep theih nading le amah a ki-aptuam theih nadingin hih bang nate a bawl dinga pilna ka guat mite tungah Aaron puansilhte a bawlsak dingun gen in.

⁴Amaute in hih kizepnate: awmtuam khat, siampi puan-ak khat, puantualpi khat, a kigan puantungsilh khat, dialkhip khat le dial kawnggak khat a bawl ding uh hi. Na sanggampa le a tapate in ka siampi na a sep theih nadingun amaute in hih puansilh siangthote a bawlsak ding uh hi.

⁵Tuate kham, adum, adupsan, a- ausan khau le hoihtaka kigan puan zangin bawlsak in.

⁶"Siampi puan-ak, kham, adum, adupsan, a-ausan khau le hoihtaka kikhuk-a kigan puan tawh - khutsiamte bawl hi ding hi.

⁷A liangko-a khihkip nadingin a kiu nihte tawh kizomin liangkaih nih nei ding hi.

⁸Khutsiamte gat kawnggak zong tua mah bang hi dinga - siampi puan-ak tawh sa khat hi-in, kham le adum, adupsan a-ausan, khau le hoihtaka kikhuk-a kigan puan hi ding hi.

⁹"Onyx suang nih la inla, Israel tapate’ minte khuakin gelh in,

¹⁰amau suah hun tawh kizui-in - suang khat tungah min guk, suang dang khat tungah min guk mah gelh in.

¹¹Suang manpha at pa in seal a khuak bangin Israel tapate’ minte tua suang nihte tungah khuakin gelh in. Tua ciangin khamin a geivial bawl inla,

¹²Israel tapate mualsuang ahi dingin siampi puan-ak liangkaihna tungah khihkip in. Aaron in phawk tawntungna ahi dingin TOPA mai-ah tua minte a liangko tungah pua ding hi.

¹³Kham geivialin zem inla,

¹⁴khau banga kihual kham khainiang kiphek nih bawlin tua suang bulhnate tungah na bulh ding hi.

¹⁵"Thukhensatnate bawl nadingin awmtuam khat zem in - khutsiampa bawl hi ding hi. Siampi puan-ak bangin: kham, adum, adupsan, a-ausan khau le limtaka kikhuka kigan puan tawh bawl in.

¹⁶A ningkim hi dinga - khap a[84] khat sau-in khap khat zai-in - khep nihin kikhep ding hi.

¹⁷Tua ciangin a tungah suangmanpha gual li-in suang in. A gual masa pen ah ruby khat, topaz khat, le beryl khat;

¹⁸a gual nihna ah turquoise khat, sapphire b[85] khat, le emerald khat;

¹⁹a gual thumna ah jacinth khat, agate khat, le amethyst khat;

²⁰a gual lina ah chrysolite khat, onyx khat le jasper c[86] khat hi ding hi. Kham geihualte sungah tuate suang in.

²¹Suang sawm le nih hi dinga, khat Israel’ tapate’ min khat gelhna hi-in seal bangin kikhuakin nam sawm le nihte min khat ciat kigelh ding hi.

²²"Awmtuam-a dingin khauhual bangin kham citak khainiang kiphek bawl in.

²³Tua adingin kham kual nih bawl inla tuate awmtuam kiu nih ah khihkip in.

²⁴Awmtuam kiu-a kham kualte ah khainiang nihte khihkip inla

²⁵tua khainiang mong langkhat pen siampi puan-ak liangkaihna a ang lampanga, a liangko-a kaisuk pen tawh zom in.

²⁶Kham kual nih bawl inla siampi puan-ak tawh kizom awmtuam sunglam kiu nihte ah bulh in.

²⁷Kham kual nih mah bawl inla, siampi puan-ak anglam a, a liangkaih na taw-a apang khuina kiang kawnggak pek tung santakah bulh in.

²⁸Awmtuam sikkualte le siampi puan-ak sikkualte khaudumin khihkhawm inla, awmtuam pen siampi puan-ak pana kiveikhiat loh nadingin kawnggak tawh khihcip in.

²⁹"Mun Siangtho ah Aaron a lut peuhpeuh ciangin TOPA mai-ah phawkdenna ahi, thukhensatna awmtuam tunga Israel’ tapate’ minte a lungtang tungsan takah a pua ding hi.

³⁰TOPA omna sungah a lut peuhpeuh ciangin Aaron lungtang tung san taka om dingin Urim le Thummim zong awmtuam tungah koih in. Aaron in TOPA mai-ah Israel-te ading thukhensatna a bawl theih nadingin a lungtang tung santakah tua bangin a pua gige ding hi.

³¹"Adum bekbek tawh siampi puan-ak tualpi bawl inla,

³²a laizangah lu khum nading vangsak in. A kikek loh nadingin a vang kimkotah gawl-an d[87] bangin a gei zimna kigan ding hi.

³³Puantualpi mong kimkotah adum, adupsan le a ausan khau tawh mangkawlsing gahte bawl inla, tuate kikalah kham longte khai in.

³⁴Kham longte le mangkawlsing gahte puantualpi mong kimkotah kikalhelh dimdiam ding hi.

³⁵Aaron in biakna na a sep ciangin tua silh tektek ding hi. Amah a sih loh nadingin Siangtho Mun TOPA mai-ah a sungtum ciang le a pusuah ciangin tua longte gin kiza ding hi.

³⁶"Kham citak pek khat bawlin seal tunga a kuaka kigelh bangin: TOPA TUNGAH SIANGTHO ci-in a tungah a kuakin gelh in.

³⁷Dialkhip tunga khih nadingin khaudum a tungah khih in; tua pen a dialkhip mailamah om ding hi.

³⁸Tua pen Aaron taltangah om dinga, Israel-te in bang khatpeuh letsongin a piak uh a, amau ap letsong siangthote a paubanna khat a om leh aman khu ding hi. TOPA in tuate a san theih nadingin Aaron taltang tungah tuate om gige ding hi.

³⁹"Khau hoih tawh puantungsilh gan inla, hoihtaka kigan puan tawh dialkhip bawl in. Puan kawnggak pen khutkhuisiamte bawl hi ding hi. Amaute a zahtak baangsak ding le a pahtawihuaisak dingin

⁴⁰Aaron tapate ading puantungsilhte, puan-kawnggakte le dialkhipte bawlsak in.

⁴¹Hih puansilhte na sanggampa Aaron le a tapate na silhsak khit ciangin amaute sathau nilh inla siansuah in. Kei ading siampi na a sep theih nadingun siangthosak in.

⁴²"Pumpi tuam nadingin kawng pan a phei ciang a ban puan hoih kigan pheituam sungten khat bawl in.

⁴³Aaron le a tapate kimawhsak-a a sih loh nadingun, Kikhopna Puanbuk-a a pai ciang uh ahi a, Mun Siangtho-a biakna nasem dinga biakna-tau a naih ciang uh ahi zongin amaute in teng pelmawh ding uh hi. "Hih in Aaron le a suan-le-khakte adingin a tawntunga khang kivai-khakna thuzek hi ding hi.