Read Zokam Paikhiatna 3 Bible Online

Paikhiatna 3 - Zokam bible

Paikhiatna 3

¹Tu-in Moses in a sungpa, Midian siampipa Jethro’ tuute cinsaka, sehnel gam khenah a tuute paipih in Pasian mual Horeb ah a tung hi.

²Tua lai ama kianga sawlbawk lak meikuang sung panin TOPA vansawltak kilang hi. Moses in sawlbawk kuang napi kangtum lo-a om a mu hi.

³Tua ciangin Moses in, "A kiangah pai-in hih alamdang ka muh pen ka va en ding hi - bang hanga hih sawlbawk kangtum lo ahi hiam?" ci-in a ngaihsun hi.

⁴A en dinga tua lai-a a pai TOPA in a muh ciangin Pasian in, "Moses, Moses!" ci-in sawlbawk kawm panin a sam hi. Tua ciangin Moses in, "Hih lai-ah ka om hi," a ci hi.

⁵Pasian in, "Hong naih beh nawn kei in. Tu laitak-a na dinna mun siangtho ahi manin na khedapte suah in," a ci hi.

⁶Tua ciangin amah in, "Keimah na pa’ Pasian, Abraham’ Pasian, Isaac’ Pasian le Jacob’ Pasian ka hi hi," a ci hi. Tua laitakin, Moses in Pasian en ngam lo ahi manin a maitang a sel hi.

⁷TOPA in, "Egypt-a ka mite gentheihna ka mutel khin hi. Amau sal ukte hanga a kikona uh ka za zo a, amaute thuakna ka lunghimawh hi.

⁸Tua ahi ciangin Egypt mite khut pan hukhia-in, tua gam pan amaute Canaan-te, Hit-te, Amor-te, Periz-te, Hiv-te le Jebus-te - gam hoih gam zai bawngnawi le khuaizu luanna gamah a pi dingin kong tuaksuk zo hi.

⁹Tua hi a tu-in Israel-te kikona ka kiang hong tungin Egypt mite in amaute a netcipna zia uh ka mu zo hi.

¹⁰Tua ahi manin tu-in pai in. Pharaoh kiangah pai-a ka mi Israel-te Egypt pana pikhia dingin nang kong sawl hi," a ci hi.

¹¹Ahi hangin Moses in Pasian kiangah, "Pharaoh kiangah pai-a Israel-te a pikhia dingin kei kua hi lel ka hi hiam?" a ci hi.

¹²Tua ciangin Pasian in, "Nang kong ompih ding hi. Nang hong sawl keimah ka hina na theih nading lim hih ahi hi: Tua mite Egypt panin na paikhiatpih khit ciangin hih mual tungah Pasian na a[5] bia ding hi," a ci hi.

¹³Moses in Pasian kiangah, "Israel-te kiangah va pai-in amaute kiangah, ‘Na pate uh Pasian in note kiangah kei hong sawl hi, ‘va ci-in amaute in, ‘Ama min bang hiam?’ ci-in hong dong le uh, tua ciangin amaute kiangah bang ka gen ding hiam?" a ci hi.

¹⁴Pasian in Moses kiangah, "Keimah ahi keimah ka hi hi. Hih in Israel-te kianga na gen ding ahi hi: ‘KEIMAH b[6] in note kiangah hong sawl hi, ‘ ci in," a ci hi.

¹⁵Pasian in Moses kiangah, "Israel-te tungah, ‘TOPA c[7] na pate uh Pasian- Abraham’ Pasian, Isaac le Jacob’ Pasian in note kiangah kei hong sawl zo hi,’ ci in. Hih in khang khat pan khang khat dongin a kiphawk gige ka min ahi tawntung hi.

¹⁶"Pai in, Israel upate khawm inla amaute tungah, ‘TOPA, na pate uh Pasian, Abraham, Isaac le Jacob-te’ Pasian kei tungah hong kilanga: Note kong cinga, Egypt a note tungah hong kibawlnate ka mu khin zo hi.

¹⁷Egypt a na gentheihna uh pan hong lakhia-in Canaan-te, Hit-te, Amor mite, Periz-te, Hiv-te le Jebus-te gam bawngnawi le khuaizu a luanna gamah kong puak ding ka ciamsa ahi hi,’ va ci in.

¹⁸"Israel upate in na thu hong ngai ding uh hi. Tua ciangin nang le upate Egypt kumpipa kiangah na pai ding uh a, ama kiangah, ‘TOPA Hebrew-te’ Pasian ko tawh ka kimu khin uh hi. Gamsung ni thum paina-ah TOPA kote Pasian biakpiakna pia dingin hong paisak in,’ va ci un.

¹⁹Ahi hangin khut thahat khat tawh hihsak teitei ahi kei ngal leh Egypt kumpipa in hong paisak lo ding hi, cih ka thei hi.

²⁰Tua ahi ciangin ka khut zankhia in, amaute laka ka hih ding nalamdangte khempeuhin Egypt mite ka vat ding hi. Tua khit nungin amah in hong paisak ding hi.

²¹"Tua ciangin na nusiat uh cianga khutguaka na pai loh nadingun hih Egypt-te tungah angvan nopna ka neisak ding hi.

²²Numei peuhmah in a vengte uh leh amau inn sunga om numei peuhmah tungah kham le ngun tawh kibawl vante le nikten puansilh na ngen ding uh a, tuate na tanu na tapate uh na silhsak ding uh hi. Tua bangin Egypt-te na lawk ding uh hi,’ a ci hi.