Read Zokam Paikhiatna 31 Bible Online

Paikhiatna 31 - Zokam bible

Paikhiatna 31

¹Tua ciangin TOPA in Moses tungah,

²"En in, Judah behte Hur tapa, Uri tapa Bezalel

³Pasian Kha tawh dimin siamna khutsiamna khempeuhah hih theihna le theihna -

⁴kham, ngun le sumngo tawh a hoiha zem ding,

⁵suangte atkhama bulh, sing nasep, khut siamna khempeuh a sem thei dingin ka tel zo hi.

⁶Tua tham loin amah a huh dingin Dan beh a, Ahisamach tapa Oholiab ka seh khin hi. Khutsiam mite khempeuh tungah zong siamna ka pia khina, tuate in nang kong thupiak:

⁷Kikhopna Puanbuk, Tecipanna singkuang a tunga thoihdamna sin tawh, le puanbuk-a kizang a dang van khempeuh -

⁸sabuai le a vanzatte, kham citak meivak tunna le a kizang van khempeuh, gimnamtui halna biakna-tau,

⁹meihal biakna-tau le a um a bel teng, kuangpi le a tunna -

¹⁰le a kigan puansilhte, siampi Aaron le a tapate in siampi na a sep uh cianga a puansilh siangtho tuak uh,

¹¹le Mun Siangtho ading nilh sathau le gimnamtuite, na khempeuh a bawl ding uh hi. Amaute in nang kong thupiak bang tektekin a bawl ding uh hi,"a ci hi.

¹²Tua ciangin TOPA in Moses tungah,

¹³"Israel-te kiangah, ‘Ka Sabbath na tang ding uh hi. Keimah in note hong siangthosak a[96]TOPA ka hilam nong theih nadingun hih in, kei le note kikal ah khang sawnsawnte dongin lim ahi ding hi.

¹⁴"Sabbath tang un, bang hang hiam cih leh, no adingin siangtho hi. A ninsak peuhmah kithat pelmawh ding hi; tua ni-a na a sem peuhpeuh a mipihte panin kikhenkhia ding hi.

¹⁵Niguk sungin nasep ding khempeuh kiman dinga, ahi hangin a ni sagihna ni, Sabbath khawl ni, TOPA adingin a siangtho ahi hi. Sabbath ni-a na a sem peuhpeuh kithat ding hi.

¹⁶Israel-te in Sabbath tang ding uh a, khang sawnsawnte dongin tawntung thukhun-in a nei ding uh hi.

¹⁷Tua in a tawntungin kei le Israel-te kikalah lim hi ding hi, ahang in niguk sungin TOPA in vante le lei bawla, a ni sagihna ni-in na sem loin a khawl hi,’ ci in," a ci hi.

¹⁸TOPA in Sinai Vum tunga Moses a hopihna a man ciangin Pasian khutme in a gelhkuak Tecipanna suangpek nih, amah a pia hi.