Read Zokam Paikhiatna 33 Bible Online

Paikhiatna 33 - Zokam bible

Paikhiatna 33

¹Tua ciangin TOPA in Moses kiangah, "Nang le Egypt pana na paikhiatpih mipite tawh hih mun nusia inla, Abraham, Isaac le Jacob-te tungah, ‘Na suan-le-khakte tungah ka pia ding hi,’ ci-in tomlo-a, ka khapsa gamah pai to in.

²Na mai-ah vansawltak khat ka sawl dinga Canaan mite, Amor mite, Hit mite, Periz mite, Hiv mite le Jebus mite ka hawlkhia ding hi.

³Bawngnawi le khuaizu a luanna gamah pai to in. Ahi hangin nang tawh kong ton kei ding hi, bang hang hiam cih leh note ngawngkhauh mite na hi uh a lamkal ah kong thatmang kha ding hi," a ci hi.

⁴Mipite in hih a lungdonhuai mahmah kammal a zak uh ciangin thumin khat beek in kizepnate zang lo uh hi.

⁵Ahang in TOPA in Moses kiangah, "Israel-te tungah, ‘Note ngawng khauh mite na hi uh hi. Note tawh tawm vei sung nangawn ton leng kong susia kha ding hi. Tu-in na kizepnate uh suahkhia un, note bang kong lawh ding hiam, cih ka khensat ding hi,’ ci in," ci-in a gensa ahi hi.

⁶Tua ahi ciangin Israel mite in a kizepnate uh Horeb Mual ah a suahkhia uh hi.

⁷Tu-in Moses in puanbuk khat la-in giahphual pua a gamla simna ah zala, tua pen "kikhopna puanbuk" a ci hi. TOPA kianga thu dong nuam khempeuh giahphual pua-a kikhop-na puanbuk ah a pai uh hi.

⁸Tua hi-a puanbuk ah Moses a pai simin mipite khempeuh amau puanbuk kong tekah dingin puanbuk sungah Moses a lut mateng a vil uh hi.

⁹Puanbuk sungah Moses a lut ciangin meii khuampi tuaksukin TOPA in Moses a hopih lai teng a kongah a om hi.

¹⁰Puanbuk konga meii khuampi ding a muh peuhmah uh ciangin amau puanbuk kong ciatah dingin a bia uh hi.

¹¹Mi khat a lawmpa tawh a kiho bangin TOPA in Moses maituahin a hopih hi. Tua ciangin giahphualah Moses ciah kika, ahi hangin amah a huh a khangmoi Nun tapa Joshua in puanbuk a nusia kei hi.

¹²Moses in TOPA kiangah, "Kei tungah, ‘Hih mite makaih in,’ ci-in nong gen zo a, ahi hangin kei tawh kua ton ding hiam, cih nong theisak nai kei hi:’ Na minin kong thei a, ka maipha na mu khin zo hi,’ nong ci zo hi.

¹³Na mitah maipha ka muh khit leh, nang kong theih nading le na maipha ka ngah den nadingin na zia hong hilh in. Hih minam nangma mite ahilam phawk in," a ci hi.

¹⁴TOPA in, "Ka Ompihna nang tawh ton dinga, tawldamna nang kong pia ding hi," a ci hi.

¹⁵Tua ciangin Moses in a kiangah, "Na Ompihna ko tawh a ton kei ding leh hih panin hong sawlkhia to kei in.

¹⁶Ko tawh nang nong tonkhawm loh ngalin kua in, kei le na mite tunga na lungkim lam thei ding ahi hiam? Lei maitanga midangte khempeuh panin kei le na mite ka tungnunna uh bang dang om ahi hiam?" a ci hi.

¹⁷Tua ciangin TOPA in Moses kiangah,"Nong ngetsa tektek mah kong hihsak ding hi, bang hang hiam cihleh nang tungah ka lungkima, na minin kong thei hi," a ci hi.

¹⁸Tua ciangin Moses in, "Tu-in na minthanna kei hong lak in," a ci hi.

¹⁹Tua ciangin TOPA in, "Ka hoihna khempeuh note mai-ah kong lakkhia dinga, note omna-ah ka min TOPA ka thangsak ding hi. Ka lainatnop mite ka lainat dinga, ka khuatuah nop mite ka khuatuah ding hi."

²⁰Ahi hangin amah in, "Kei hong mute kuamah nungta lo ahi manin ka maitang na mu thei kei ding hi," a ci hi.

²¹Tua ciangin TOPA in, "Ka kiangah na din theih nading suangtung munkhat a om hi.

²²Ka minthanna in hong nawk ciangin suangpi kitam sungah kong koih dinga, kong khen khit matengin ka khutin nang kong liah ding hi.

²³Tua ciangin ka khut ka lakhia dinga, ka nung na mu ding hi; ahi hangin ka maitang a kimu peuhmah kei ding hi," a ci hi.