Read Zokam Paikhiatna 34 Bible Online

Paikhiatna 34 - Zokam bible

Paikhiatna 34

¹TOPA in Moses tungah, "A masate tawh kibang suangpek nih sui in; tuate tungah na sukkhap sa a masa suangpekte tunga kigelhte ka gelh ding hi.

²Zingsangin kithawi inla tua ciangin Sinai Vum dawnah kahto in. Mual dawnah kei kiangah nang mahmah hong kilak in.

³Kuamah nong tonpih kei dinga, mual tungah kuamah a om kei ding hi; tuuhonte le bawnghonte nangawn mual mai ah a gamta kei ding hi," a ci hi.

⁴Tua ciangin Moses in a masate tawh a kibang suangpek nih sui a, TOPA in amah a thupiaksa bangin zingsang tungin Sinai Vum tungah a kah to hi; amah in a khutin suangpekte gel a tawi hi.

⁵Tua ciangin meiipi lakah TOPA kumsukin amah tawh tua lai-ah ding khawma, ama min TOPA a tangko hi.

⁶Tua bangin Moses maitang nawkin, "TOPA, TOPA, khuatuah siam le hehpih siam Pasian, a hehhak, itna le muanhuaina tawh kidim,

⁷a tul tampite a it pa, gitlohna, langdona le mawhna a maisakpa ahi hi. Tua hi napi amah in mawhna a bawlte dan tuaksak loin a om kei hi. Amah in pate mawhna tate tung le amaute tate tung, khang thum khang lina dongin dan a tuaksak hi," ci-in a tangko hi.

⁸Thakhat-in Moses lei lakah kunsuk pah-a, a bia hi.

⁹Amah in, "TOPA aw, na mai-ah maipha ka ngah leh Topa ko tawh hong ton- sak in. Hih mipite ngawngkhauh ahi ta zongin ka gitlohnate uh le kote mawhna hong maisak inla, nang luah dingin hong sang in," a ci hi.

¹⁰Tua ciangin TOPA in, "Nang tawh thukhun khat ka bawl ding hi. Na mite khempeuh mai-ah leitung khempeuh a, minam khatpeuh tunga ka bawl nai loh a lamdangte ka bawl ding hi. Amaute laka na tenna mite in, nang adinga keimah TOPA in ka hih dingte a kihtakhuai mahmahna a mu ding uh hi.

¹¹Tuni-a nang kong thupiak hong mang in. Na mai-a Amor mite, Canaan mite, Hit mite, Periz mite, Hiv mite le Jebus mite ka hawlkhia ding hi.

¹²Note pai nading gama teng mite tawh thukimna bawl ding na kidop kei uh leh note lakah, amaute thang kamsa ahi ding uh hi.

¹³A biakna-taute uh suksiatsakin a suang siangthote uh sutam unla, a Asherah khuamte a[100] uh phukpai un.

¹⁴Ama min Aam ahi TOPA, a aam Pasian ahi manin pasian dang khatpeuh bia kei un.

¹⁵"Tua gam sunga teng mite tawh thukimna bawl ding kidawm un; ahang in, a pasiante uh kiangah, kizuakin kitoihna-a a kipiak uh ciangin amaute in note hong sam ding uh a, a kitoihnate uh na ne kha ding uh hi.

¹⁶Na tapate uh zi dingin amaute tanu pawlkhat na tel uh a, tua tanute, amau pasiante tungah a kizuak uh ciangin amau hih mah a hih dingin na tapate uh a makaih ding uh hi.

¹⁷"A kisung milimte bawl kei in.

¹⁸"Silngo-sawhloh Anlum Pawi bawl un. Note kong thupiaksa bangin ni sagih sung silngo sawh loh anlum ne un. Hih pen Abib kha a kiseh hunin hih un, ahang in, tua kha-in Egypt pan na paikhia uh hi.

¹⁹Naubu a hong masa pen - na ganhingte uh ta masate bawnghonte le tuuhonte dongin a pa peuhmah kei aa ahi hi.

²⁰Laa tacil tuuno khatin tan un, ahi zongin na tat kei uh leh a ngawng kuaitan un. Na tapa uh a upa pente khempeuh tan un. "Ka mai-ah khutguakin kuamah hong pai kei ding hi.

²¹"Niguk sung na na sem ding uh a, ahi hangin a ni sagihna ni-in na khawl ding uh hi; lokhawh hun le anlak hun nangawnin na khawl pelmawh ding uh hi.

²²"Mangbuh a gahmasa pen tawh Nipikalte Pawi le kum kihei hun b[101] ciangin Ansangkhum Pawi na bawl ding uh hi.

²³Na mite pasal khempeuh Thuneipen TOPA Israel-te’ Pasian mai-ah kum khatin thumvei a kilak ding hi.

²⁴Na mai-ah mi namte ka hawlkhia dinga, na gamgi khanin TOPA note Pasian mai-ah kilak dinga kum sima thumvei na paitoh uh ciangin na gam uh kuamah in hong deihgawh kei ding hi.

²⁵"Silngo kihel na khatpeuh biakpiakna sisan tawh kei tungah hong piakhawm kei inla, Paisan Pawi-a biakna-a kipia khamval khatpeuh zingsang dong omsak kei un.

²⁶"Na leitang panua piang anpal a limci pen TOPA note Pasian, tungah hong puak un. "Keelno a pi nawizu in huan kei un," a ci hi.

²⁷Tua ciangin TOPA in Moses tungah, "Hih thute tawh kizui-in nang le Israel tawh kikalah thukhun khat bawl khin ka hi manin hih thute gelh in," a ci hi.

²⁸Moses tua lai-ah an ne lo, tui dawn loin ni sawmli le zan sawmli sung TOPA tawh a omkhawm hi. Amah in thukhun kammal - Thupiak Sawmte suangpekte tungah a gelh hi.

²⁹Sinai Vum pan, Tecipanna suangpek nihte tawi kawmin Moses a paisuk ciangin, TOPA tawh a kiho mana a maitang atee a hilam a thei kei hi.

³⁰Aaron le Israel mite khempeuh in Moses a muh uh ciangin a maitang tee-a, a kiangah a pai ngam kei uh hi.

³¹Ahi hangin Moses in amaute a sam hi; tua ciangin Aaron le mihonpite’ makaite khempeuh ama kiangah kileh kik uh a, amah in amaute a hopih hi.

³²Tua khit ciangin Israel-te khempeuh in a kiang va naih uh a, amah in Sinai Vum tunga TOPA in a thupiaksate khempeuh amaute a pia hi.

³³Moses in amaute a hopih khit ciangin a maitang maikhuhna khat a khuh hi.

³⁴Ahi hangin TOPA omna-ah a hopih dinga a lut ciangin a paikhiat dong tua maikhuhna a hemkhia hi. Amah paikhia-a, amah thu a kipia teng Israel-te tungah a gen ciangin,

³⁵amaute in atee ama maitang a mu uh hi. Tua ciangin Moses in TOPA hopih dinga a lut kik mateng a maitang maikhuhna in a khuh kik hi.