Read Zokam Paikhiatna 35 Bible Online

Paikhiatna 35 - Zokam bible

Paikhiatna 35

¹Moses in Israel mihonpi bup kikhawmsak a, amaute tungah, "TOPA in note sep dinga hong thupiak nate, hihte ahi hi:

²Niguk sungin sep ding peuhmah kizo ding hi, ahi hangin a ni sagihna ni note ni siangtho ni hi dinga, TOPA ading khawlna Sabbath ni ahi hi. Tua ni-in na khatpeuh a sem peuhpeuh kithat pelmawh ding hi.

³Na tenna khat peuhpeuhuhah Sabbath ni-in mei tawh kei un," a ci hi.

⁴Moses in Israel mihon buppi tungah, "Hih in TOPA hong thupiaksa ahi hi:

⁵Na neihsate uh panin TOPA adingin biakna pia un. A ut peuhpeuh in TOPA tungah biakna-in - kham, ngun le sumngo;

⁶adum, adupsan le a-ausan khau le hoihtaka kigan puan; keelmul;

⁷a san-a kinim tuutal vun le tuipi bawngpi a[102] vunte; singkha sing;

⁸meivak ading olive thau; nilh sathau ading le gim namtui-a zat ding a namtuite;

⁹le siampi puan le a awmtuam-a bulh ding onyx suang le suang manpha dangte a pia thei hi.

¹⁰"Note lak-a siamna a neite khempeuh hong pai-in TOPA hong thupiaksa a bawl ding uh nate in:

¹¹Biakbuk a puanbuk le a khuhna tawh, mekkilhte, sing pekte, a zawlte, khuamte le bullente;

¹²singkuang a zawlte tawh le thoihdamna sin le tua a liah puanzak;

¹³sabuai a khuamte tawh le a na khempeuh, le Ompihna anlum;

¹⁴mei vak nadinga meivak tunna a vanzatte tawh, khuavak dingin meivakte le meitui;

¹⁵gim namtui halna biakna-tau le a zawlte, nilh sathau le gim namtui; biakbuk lutna kongpi ading puanzak;

¹⁶meihal biakna-tau a sumngo siklen tawh a khuamte le a um-le-bel teng; sumngo kuangpi a tunna tawh;

¹⁷buktual-a puanzakte a khuam le a bullen tawh, le innhuang lutna ading puanzak;

¹⁸biakbuk ading le bukhuang ading khetphimte, le tuate’ khaute;

¹⁹Mun siangtho sunga nasep cianga silh dinga kigan puansilhte- siampi Aaron le a tapate in siampi a sep uh cianga a silh uh puan siangthote ahi hi," a ci hi.

²⁰Tua ciangin Moses omna panin Israel mipi buppi paikhia uh a,

²¹a utte le utna nei peuhmah va pai-in Kikhopna Puanbuk lamna, nasepna khempeuh le puansilh siangtho-a a zat nate TOPA tungah biakna-in a puak uh hi.

²²Numei pasal cih omlo ut peuhpeuh pai uh a, kham-a kizepna namkim: taute, bilbahte, zungbuhte le kizepnate a puak uh hi. Amaute khempeuh in TOPA tungah vei-a biakna in kham a pia uh hi.

²³Amaute, adum, adupsan, a-ausan khau ahikeh hoihtaka kigan puan, keelmul, asan-a kinim tuutal vun le tuibawngpi vunte, a nei peuhpeuh in a puak uh hi.

²⁴Ngun ahi-a sumngo ahi zongin biakna pia peuhmah in TOPA tungah biakna-in pia uh a, nasepna-a kizang ding singkha-sing a nei peuhmah in a puak uh hi.

²⁵Numei khutsiam peuhmah in a khut uh tawh kheek uh a, a khekte uh - adum, adupsan ahikeh a-ausan khaute le hoihtaka kigan puante a puak uh hi.

²⁶Khaukheek a siam, a kheek nuam numei khempeuh in keelmul a kheek uh hi.

²⁷Makaite in siampi puan le a awmtuam tunga suan ding onyx suangte le suang manpha dangte a puak uh hi.

²⁸Amaute in meivak-a vak ding le nilh sathau ding le paknamtui dingin, a namtuite le olive thaute zong a puak uh hi.

²⁹Israel mite numei pasal a ut khempeuh in TOPA in Moses tungtawna amaute sep dinga a thupiaksate khempeuh TOPA tungah utthu-a biakna-in a pia uh hi.

³⁰Tua ciangin Moses in Israel mite kiangah, "En un, TOPA in Judah beh a, Hur’ tapa, Uri’ tapa Bezalel teel khina,

³¹Pasian Kha in khutsiam-na namkim, siamna, hihtheihna le theihna tawh kidimin -

³²kham, ngun le sumngote zanga a zep siam, le a geel siam,

³³suangte at-a bulhin singlam sem ding le siamneltaka van nam tuamtuam bawl dingin teel khin zo hi.

³⁴Amah in Dan-te beh-a Ahisamach’ tapa Oholiab tawh amaute gel, midangte hilh theih nading siamna a pia hi.

³⁵Amah in amaute khutsiam mi, a gelpa, adum, adupsan le a-ausan khau le hoihtaka kigan puan zanga khut-a khuite le a gante - amaute khempeuh khutsiam-na le gelsiamna-a picing dingin siamna tawh a dimsak hi.