Read Zokam Paikhiatna 36 Bible Online

Paikhiatna 36 - Zokam bible

Paikhiatna 36

¹Tua ahi ciangin Belzalel, Oholiab le mun siangtho lamna ah nasepna khempeuha kizang dinga TOPA in siamna le khutsiamna a piakte khempeuh in TOPA thupiaksa bang tektekin na a sem ding uh hi," a ci hi.

²Tua ciangin Bezalel, Oholiab le TOPA in khutsiamna a piaksa khutsiam mi peuhmah a pai nuamte pai-a a sep nadingun Moses in a sam hi.

³Amaute in Moses tung panin, Israel-te in munsiangtho lam nadinga a piakte khempeuh a sang uh hi. Tua hi a mipite in utna tawh zingsang khat khit zingsang khat biakna a puakpuak lai uh hi.

⁴Tua ciangin munsiangtho lamna-a sep ding khempeuh a sem khutsiam mi khempeuh in a nasep uh nusia uh a,

⁵Moses kiangah, "TOPA in sep dinga a thupiakna nasep nadinga kisam zah sanga tamzaw mipite in hong puak uh hi," a ci uh hi.

⁶Tua ciangin Moses in, "Numei pasal kuamah in munsiangtho ading biakna bangmah piakbeh nawn kei un," ci-in thu pia-a, amaute in tua thu giahphual sung khempeuhah a zasak uh hi. Tua hi a, tua ciangin mipite in adang a puak beh nawn loh nadingun kikham hi;

⁷bang hang hiam cih leh amau neihkholhsate nasep nadinga kisam zah sangin a tamzaw hi.

⁸Nasem mite laka khutsiam mi khempeuh in hoihtaka kikhuk adum adupsan le a-ausan khau tawh khutsiamte in cherubim-a a zep uh puanzak sawmin biakbuk a bawl uh hi.

⁹Puanzak khempeuh a kikim hi a - tong sawmnih le giat sau in tong li a zai a[103] hi.

¹⁰Amaute in tuate nga peh uh a, adang ngate zong tua mah bangin a hih uh hi.

¹¹Tua ciangin a kipehkhawm puanzak kop khatte nawl zui-ah adumin a bilte bawl uh a, tua mah bangin puanzak a kop dang penah zong a bawl uh hi.

¹²Amaute in puanzak khatah a bil sawmnga zong bawl uh a, a kop khat pena a bil sawmnga mah tawh khat le khat a kigalsai dimdiam in a bawl uh hi.

¹³Tua ciangin amaute in kham mekkilh sawmnga bawlin biakbuk bup khat a suah nadingin tuate zangin puanzak kop nihte a peh khawm uh hi.

¹⁴Amaute in biakbuk tungkhum dingin keelmul tawh puanzakte bawl uh a - a vekin sawm le khat ahi hi.

¹⁵Puanzak sawm le khatte kikim a - tong sawmthum sau-in tong li a za b[104] hi.

¹⁶Amaute in puanzakte nga ciangin kop khatin zom uh a, adang gukte a kop dang khatin a zom uh hi.

¹⁷Tua ciangin amaute in puanzak kop khat mong gei zui-ah abil sawmnga bawl uh a, puanzak a kop khat pen mong gei zui-ah zong a bawl uh hi.

¹⁸Amaute in puanbuk bup khat suahsak nadingin sumngo mekkilh sawmnga a bawl uh hi.

¹⁹Tua ciangin amaute in puanbuk tung khuh nadingin asan-a kinim tuutal vun bawl uh a, tua tunga khuh sawn nadingin tuipi bawngpi c[105] vun a bawl uh hi.

²⁰Amaute in biakbuk adingin singkha singin singpek kitungte a bawl uh hi.

²¹Singpek khat tong sawm sau-in tong khat le alang ciat zai d[106] a,

²²a bulh nadingin singpek khatah a zang nih ta a nei hi. Amaute in biakbuk singpekte khempeuh a kibangin a bawl uh hi.

²³Amaute in biakbuk leitaw-lam panga dingin singpek sawmnih bawl uh a,

²⁴tuate nuai-a om ding ngun bullen sawmli -singpek khatah bullen nih ta -khuam zang khatah khat ciat a bawl uh hi.

²⁵Apang khat biakbuk leilu lampang adingin amaute in singpek sawmnih,

²⁶le ngun bullen sawmli - singpek khat nuai-ah nih ciat a bawl uh hi.

²⁷Amaute in a phaitam lam mong, tua pen biakbuk a nitumna-lam mongah singpek guk le

²⁸biakbuk a phaitam lam kiute adingin singpek nih a bawl uh hi.

²⁹Hih a kiu nihte ah a bula kipan a dawn dong nih hi a, sikkual khatin kihen khawm hi; a nih in a kibanga kibawl ahi hi.

³⁰Tua hi a, singpek giat le ngun bullen sawm le guk - singpek khat nuai-ah nih ta ahi hi.

³¹Amaute in singkha-sing zawl: biakbuk pangkhata singpekte adingin nga;

³²apang langkhat adingin nga mah le a nitumna lam biakbuk a phaitam lam kiu-a singpekte adingin zong nga mah a bawl uh hi.

³³Amaute in singpekte kimtanah mong khat pan mong khat a tungsuak dingin a zawl laita a bawl uh hi.

³⁴Amaute in singpekte khamtui luan uh a, a zawlte khum nadingin kham kualte a bawl uh hi. Amaute in a zawlte zong khamtui a luan uh hi.

³⁵Amaute in hoihtaka kikhuk adum, adupsan le a-ausan khau tawh khutsiamte in Cherubim-a a zep uh puanzak a bawl uh hi.

³⁶Amaute in tua-a zat ding singkha sing li sui uh a, khamtui a luan uh hi. Amaute in tuate ading kham vankhaite bawl uh a, tuate ading ngun bullen li a sung uh hi.

³⁷Puanbuk lutna-a dingin amaute in adum, adupsan le a-ausan khau, hoihtaka kikhuka kigan puan tawh - khutkhui siampa khui-in a bawl uh hi;

³⁸amaute in tuate ading khuam nga a vankhaite tawh a bawl uh hi. Amaute in khuam dawnte le a gaknate khamtui luan uh a, a bullen ngate sumngo tawh a bawl uh hi.