Read Zokam Paikhiatna 38 Bible Online

Paikhiatna 38 - Zokam bible

Paikhiatna 38

¹Amaute c[114] in singkha-sing tawh tong d[115] thum a sang, meihal biakna-tau a bawl uh hi; tong nga sau-in tong nga za e[116]-a, a ningkim ahi hi.

²A kiu lite ah ki khat ciat neisak uh a, biakna-tau le a kite sakhatin bawlin, biakna-tau sumngo-in a luan uh hi.

³Amaute in nazatte khempeuh - beelte, vut luahnate, tui thehna kuangkumte, salep-sikka le meiluahnate sumngo tawh a bawl uh hi.

⁴Amaute in biakna-tau ading a zawl nuai-ah a kimciang a pha to a koih ding sumngo siklen a bawl uh hi.

⁵Amaute in tua sumngo siklen kiu lite mongah a zawlte len dingin sumngo kualte a sung uh hi.

⁶Amaute in singkha zawl sui uh a, tuate sumngotui a luan uh hi.

⁷Amaute in a kualte sungah zawlte a khum uh hi; tua ahi ciangin tua puak nadingin tuate a pangah a om hi. Amaute in singpek tawh a vangin a bawl uh hi.

⁸Amaute in Kikhopna Puanbuk lutna-a nasem numeite’ sumngo limlangte panin sumngo kuangpi le a tunna a bawl uh hi.

⁹A zomah amaute in hoihtaka kikhuk-a kigan puanzakte tawh ahuang a bawl uh hi. A leitaw-lam pang tong f[117] za khat sau a,

¹⁰khuam sawm nih le sumngo bullen sawm nih tawh, a khuamah ngun vankhai le a gaknate a nei hi.

¹¹A leilu-lam pang zong tong za khat mah sau-a, khuam sawmnih, sumngo bullen sawmnih a ngun vankhai le a gaknate a khuamte tungah a nei hi.

¹²A nitumna-lam panga puanzakte tong g[118] sawmnga zai-a, khuam sawm le a bullen sawm, khuam tungah a ngun vankhai le a gaknate a nei hi.

¹³Nisuahna-lam mong nisuak lam manawh zong tong sawmnga mah a zai hi.

¹⁴A lutna pang khat-a puanzakte tong h[119] sawm le nga zai in, khuam thum le bullen thum nei in,

¹⁵ahuang lutna a khat lam pangah tong sawm le nga asau puanzakte, khuam thum le bullen thum tawh a om hi.

¹⁶Ahuang kimkot-a puanzakte khempeuh hoihtak-a kikhuk-a kigan puan ahi hi.

¹⁷A khuamte ading bullen sumngo ahi hi. Khuam tunga vankhaite le a khainate ngun hi a, tuate dawnte nguntui kiluan ahi hi; tua ahi ciangin huanga khuamte khempeuh in ngun gakna a nei hi.

¹⁸Ahuang sung lutna-a puanzak, adum, adupsan le a-ausan khau hoihtaka kigan puan - khutkhui siamte khui ahi hi. Tua pen tong i[120] sawmnih sau-a, ahuang puanzakte mah bangin tong j[121] nga sangin,

¹⁹khuam li le sumngo bullen li tawh ahi hi. Tuate’ vankhaite le a gaknate ngun hi-a, a dawnte nguntui kiluan ahi hi.

²⁰Biakbuk le a huang kimkota khetphimte khempeuh sumngo ahi hi.

²¹Moses thupiakna bangin Levi mite in hihte ciamteh uh a, Siampi Aaron tapa Ithamar makaihna nuai-ah biakbuk, Tecipanna, biakbuk adingin a kizang vante hizahtak ahi hi.

²²(Judah beh a, Hur’ tapa Uri’ tapa Bezalel in, TOPA in Moses a thupiak na khempeuh a bawl hi;

²³Dan beh a Ahisamach tapa Oholiab - khutsiam-a a geelsiampa, adum, adupsan, a-ausan khau-a kigan puan khutkhui siampa tawh a semkhawm hi.)

²⁴Munsiangtho bawlna-a kizang vei-a biakna-a kipia kham khempeuh a vekpi in munsiangtho shekel tawh kizui-in talent 29 le shekel 730 k[122] ahi hi.

²⁵Misimna-a kisim mipite pana kingah ngun khempeuh munsiangtho shekel tawh kizui-in talent 100 le shekel 1,775 a[123] -

²⁶mi khat piak beka khat hi-a, tua pen munsiangtho shekel tawh kizui-in shekel b[124] lang hi-in, kum sawmnih le a tungsiah bek a kisim hi-a, a kisim khempeuh pasal 603,550 a pha hi.

²⁷Munsiangtho le puanzak-a kizang dingin ngun talent c[125] 100 - bullen 100 ading talent 100, bullen khatah talent khat ciat ahi hi.

²⁸Amaute in khuam-a vankhaina, khuam dawnte luanna le a gaknate bawlna in shekel d[126] 1,775 a zang uh hi.

²⁹Vei-a biakna panin sumngo talent 70 le shekel e[127] 2,400 ahi hi.

³⁰Amaute in tuate Kikhopna Puanbuk lutna khuam bullente, sumngo biakna-tau-a sumngo siklen le a vanzatte khempeuh,

³¹huang kimkot-a bullente le a lutna ading le biakbuk ading ahuang kimkot-a khetphimte khempeuh dingin a zang uh hi.