Read Zokam Paikhiatna 39 Bible Online

Paikhiatna 39 - Zokam bible

Paikhiatna 39

¹Amaute in munsiangtho sunga biakna nasep nadingin adum, a dupsan, a-ausan khau tawh kigan puansilhte a khui uh hi. Amaute in, TOPA in Moses a thupiak bang tektekin Aaron adingin puansilh siangthote zong a bawl uh hi.

²Amaute f[128] in kham le adum, a dupsan, a-ausan khau le hoihtak-a kikhuk-a kigan puan tawh siampi puan a bawl uh hi.

³Amaute in kham a pa dikdekin a pekin sek uh a, adum, adupsan le a-ausan khaute tawh puan hoih-a a gatkhawm dingun - khutsiamte in a zangin a zen uh hi.

⁴Amaute in siampi puan liangkaihte bawl uh a, a kikhih theih nadingin a kiu nihte ah a bulh uh hi.

⁵TOPA in Moses a thupiak bang tektekin khutsiamtaka kigan kawng-gak zong tua mah bang hi-a - siampi puan tawh sakhatin kibawlin, kham tawh adum, adupsan, a-ausan khau le hoihtaka kikhuk-a kigan puan tawh kibawl hi.

⁶Amaute in onyx suangte tatin min gelhna seal bangin Israel tapate minte khuak uh a, kham kuak sungah a suang uh hi.

⁷Tua ciangin TOPA in Moses a thupiak bang tektekin amaute in Israel’ tapate phawk nadingin tuate siampi puan-ak liangkaihna tungah a khihkip uh hi.

⁸Amaute in awmtuam zem uh a - khutsiamte sep ahi hi. Amaute in siampi puan-ak bangin: kham tawh, adum, adupsan le a-ausan khau le hoihtak-a kikhuk-a kigan puan tawh a bawl uh hi.

⁹Tua pen khap g[129] khat a sau, khap khat mah a zai - a ningkim - khep nih-a kikhep ahi hi.

¹⁰Tua ciangin amaute in tua tungah suangmanpha gual li-in a suang uh hi. A gual masa pen ah ruby khat, topaz khat le beryl khat;

¹¹a gual nihna ah turquoise khat, sapphire h[130] khat, le Emerald khat;

¹²a gual thumna ah jacinth khat, agate khat le amethyst khat;

¹³a gual lina ah chrysolite khat, onyx khat le jasper i[131] khat ahi hi. Tuate kham kuak sunga kisuang ahi hi.

¹⁴Suang sawm le nih hi-a, khat tungah Israel tapate min khat tek, nam sawm le nihte min khat ciat min gelhna seal banga kikhuak ciat ahi hi.

¹⁵Amaute in awmtuam adingin khau bangin kham citak khainiang a bawl uh hi.

¹⁶Amaute in kham kikuaksak nih le kham kual nih bawl uh a, tua awmtuam kiu nihte ah a kualte a bulh uh hi.

¹⁷Amaute in tua kham khainiang nihte, awmtuam kiu-a kualte ah bulh uh a,

¹⁸tua khainiangte mong langkhat, siampi puan-ak liangkaih puan tung, a mailamah a bulh uh hi.

¹⁹Amaute in kham kual nih bawl uh a, awmtuam kiu langkhat lam siampi puan-ak tawh kizopna a nuai lam mongah a bulh uh hi.

²⁰Tua ciangin kham kual nih bawl beh lai uh a, siampi puan liangkaih nihte nuai a mailamah kawnggak tung deuh siampi puan-ak pang khuina kiangah a bulh uh hi.

²¹Amaute in, TOPA in Moses a thupiak bang tektekin awmtuam sikkualte le siampi puan sikkualte khaudumin khihkhawm uh a, siampi puan panin awmtuam a kiveikhiat loh nadingin a kawnggak tawh a zom uh hi.

²²Amaute in siampi puan adum puan bekbek bawl uh a - puangat siamte gat hi-in -

²³puan gawl-an j[132] kihong bangin puantualpi laizang a vang hi; a kikek loh nadingin a vang kimkotah a zimna a om hi.

²⁴Amaute in adum, adupsan, a-ausan khau le limtaka kikhuk-a kigan puan tawh puantualpi mong kimkotah mang kawlsinggah a bawl uh hi.

²⁵Tua ciangin amaute in kham citak longte bawl uh a, a mong kimkot-a mang-kawlsing gahte kikalah a thuah uh hi.

²⁶TOPA in Moses a thupiak bang tektekin biakna nasep cianga silh dingin puantualpi mong a kimkot-a longte le mangkawlsing gahte a kikalhelh dimdiam hi.

²⁷Aaron le a tapate adingin amaute in puangat siamte gat puan hoih tawh puansungsilh khui uh a -

²⁸khau hoih kigan dialkhip, khau hoih tawh kigan lugak limtak-a kikhuk-a kigan pheituam sungtente a khui uh hi.

²⁹TOPA in Moses a thupiak bang tektekin - puan kawnggak pen, hoihtaka kikhuk-a kigan puan le adum, adupsan, a- ausan khau - khutkhui siamte sep ahi hi.

³⁰Amaute in kham citak tawh a pek khat bawlin a siangtho kumpi lukhu khat bawl uh a, tua tungah min gelhna seal bangin khuak in: TOPA TUNGAH SIANGTHO ci uh hi.

³¹Tua ciangin TOPA in Moses a thupiak bang tektekin a amaute in dialkhip tunga a suan nadingin tua tungah khaudum khat a vawh uh hi.

³²Tuaci-in biakbuk le Kikhopna Puanbuk kimansiang hi. TOPA in Moses a thupiak bang tektek in Israel-te in na khempeuh a sem khin ta uh hi.

³³Tua ciangin amaute in Moses kiangah biakbuk puak uh a: puanbuk le a sunga vanzatte khempeuh, a mekkilhte, a singpekte, a zawnna zawlte, a khuamte le a bullente;

³⁴a khuhna asan-a kinim tuutal vunte, tuipi bawngpi a[133] vun-a kibawl khuhnate le a dalna puanzak;

³⁵Tecipanna singkuang, a zawlte le thoihdamna sin;

³⁶sabuai, a nazatte khempeuh tawh, le Ompihna anlum;

³⁷kham citak meivak tunna-a kigual meivakte le a vanzatte, le mei-a kivak ding sathau;

³⁸kham biakna-tau, nilh sathau, gim namtui, le puanbuk lutna ading puanzak;

³⁹sumngo biakna-tau le a sumngo siklen, a khuamte le a vanzatte khempeuh; kuangpi a tunna tawh;

⁴⁰huang puanzakte a khuamte le a bullen tawh; huangsung lut nadinga puanzak; khauhualte le huang ading puanbuk khetphimte; biakbuk-a vanzat dingte khempeuh, Kikhopna Puanbuk;

⁴¹le munsiangtho sunga biakna nasepna-a silh dinga kigan puansilhte, siampi Aaron le a tapate in siampi na a sep uh ciangin a zat ding uh a siangtho puansilhte ahi hi.

⁴²TOPA in Moses a thupiak bang tektekin nasep khempeuh Israel-te in a sem khin uh hi.

⁴³Moses in nasepna vel-a TOPA thupiak bang tektekin amaute in bawl khin zo uh hi, cih a mu hi. Tua hi-a Moses in amaute thupha a pia hi.