Read Zokam Paikhiatna 40 Bible Online

Paikhiatna 40 - Zokam bible

Paikhiatna 40

¹Tua ciangin TOPA in Moses kiangah,

²"Kha masa a ni masa ni-in biakbuk ahi, Kikhopna Puanbuk dingsak in.

³A sungah Tecipanna singkuang koih inla, puanzakin singkuang dal in.

⁴A sungah sabuai tum inla, tua tawh a kisai teng a tungah koih in. Tua ciangin meivak tunna sungtum inla, a meivakte thuah in.

⁵Tecipanna singkuang mai-ah gim namtui halna kham biakna-tau koih inla, biakbuk lutna-ah puanzak khai in.

⁶"Biakbuk ahi, Kikhopna Puanbuk lutna mai-ah meihal biakna-tau koih in;

⁷Kikhopna Puanbuk le biakna-tau kikalah kuangpi koih inla, a sungah tui koih in.

⁸Tua kimkotah a huang bawl inla, a huang lutna-ah puanzak khai in.

⁹"Nilh sathau la inla, biakbuk le a sunga na khempeuh nilh in; biakbuk le a na zat khempeuh siansuah in, a siangtho ding hi.

¹⁰Tua ciangin meihal biakna-tau le a vanzat khempeuh sathau nilh inla, biakna-tau siansuah in; a siangtho pen ahi ding hi.

¹¹Kuangpi le a tunna sathau nilh inla, tuate siangthosak in.

¹²Aaron le a tapate, Kikhopna Puanbuk lutna-ah paipih inla amaute tui-in sil in.

¹³Tua ciangin a siangtho puansilhte Aaron silhsak in, sathau nilh inla, ka siampi na a sep theih nadingin amah siangthosak in.

¹⁴A tapate paipih inla, amaute puansungsilh silhsak in.

¹⁵Amaute in ka siampi na a sep theih nadingun a pa uh sathau na nilh bang tektekin amaute nilh in. Amaute sathau kinilhna, khang sawnsawnte khempeuh adingin a kizom dena siampi suahna hi ding hi," a ci hi.

¹⁶TOPA in amah a thupiak bang tektekin Moses in na khempeuh a sem hi.

¹⁷Tua hi-a, a kum nihna a kha masa pen a ni masa ni-in biakbuk kidingsak hi.

¹⁸Moses in biakbuk a dinsakin, a bullente a mun tekah koiha, singpekte tungin, a khilna zawlte khumin a khuamte a phut hi.

¹⁹Tua ciangin TOPA in amah a thupiak bang tektekin biakbukah puanbuk zal-a, a tungah a khuhna-in a khuh hi.

²⁰Amah in Tecipanna la-in sing-kuang sungah koiha, singkuang zawlte bulhin thoihdamna sinin a tungah a sin hi.

²¹Tua ciangin TOPA in amah a thupiak bang tektekin biakbuk sungah singkuang paipih a, dalna puanzak khai-in, Tecipanna singkuang a dal hi.

²²Moses in Kikhopna Puanbuk sung biakbuk leilu-lam pang puanzak pua lamah sabuai koih a,

²³TOPA in amah a thupiak bang tektekin TOPA mai tua sabuai tungah anlum a lui hi.

²⁴Amah in Kikhopna Puanbuk sung, biakbuk a leitaw-lam pang sabuai tawh kigalsai-ah meivk tunna koihin

²⁵TOPA in amah a thupiak bang tektekin TOPA mai-ah meivakte a bulh hi.

²⁶Moses in Kikhopna Puanbuk sung puanzak mai-ah kham biakna-tau koih-a,

²⁷TOPA in amah a thupiak bang tektekin biakna-tau tungah gim namtui a hal hi.

²⁸Tua ciangin biakbuk lutna-ah puanzak a khai hi.

²⁹Amah in biakbuk ahi, Kikhopna Puanbuk lutna-ah meihal biakna-tau koih-a, TOPA in amah a thupiak bang tektekin tua tungah meihal biakna le an-a biakna a pia hi.

³⁰Amah in Kikhopna Puanbuk le biakna-tau kikalah kuangpi koih-a, kisil nadingin a sungah tui koihin,

³¹Moses le Aaron le a tapate in a khut le a khete uh silna-in a zang uh hi.

³²TOPA in Moses a thupiaksa bang tektekin amaute Kikhopna Puanbuk ah a tum uh ciang le biakna-tau a manawh peuhpeuh uh ciangin a kisil uh hi.

³³Tua ciangin Moses in biakbuk le biakna-tau kimkotah ahuang bawla, ahuang lutna-ah puanzak a khai hi. Tuaci bangin Moses a nasep a man hi.

³⁴Tua ciangin Kikhopna Puanbuk meii in tuama, biakbuk ah TOPA minthanna a dim hi.

³⁵Kikhopna Puanbuk ah Moses a lut thei kei hi, bang hang hiam cih leh meiipi in tuama, TOPA minthanna biakbuk a dim hi.

³⁶Israel-te a khualzinna khempeuh-uah, biakbuk tung pan meii a kilaktoh ciangin amaute a dingkhia uh hi;

³⁷ahi hangin meii a kilakkhiat kei leh - a kilaptoh matengin a zinkhia kei uh hi.

³⁸Tuaci-in amaute khualzinna tawntungah Israel innkuante mitmuh in biakbuk tung sanah, sun-in TOPA meii kai-a, zanin meii lakah meikuangin a om hi.