Read Zokam Paikhiatna 6 Bible Online

Paikhiatna 6 - Zokam bible

Paikhiatna 6

¹Tua ciangin TOPA in Moses kiangah, "Tu-in Pharaoh tunga ka hih ding na mu ding hi: A thahat ka khut hangin amaute a paisak ding hi; a thahat ka khut hangin ama gamsung panin amaute a hawlkhia ding hi," a ci hi.

²Pasian in Moses kiangah, "Keimah TOPA ka hi hi;

³Abraham tung, Isaac tung le Jacob tungah Thahatpen a[11] Pasian in ka kilanga, ahi hangin TOPA b[12] ka min tawh amaute kiangah ka kitheisak nai kei hi. c[13]

⁴Amaute pemta-a a tenna uh Canaan gam amaute ka piak nading thukhun kip zong ka bawl zo hi.

⁵Tua banah Egypt-te in sila-a a khawi uh Israel mite thumna ka za zo a, ka thukhun ka phawk zo hi.

⁶Tua ahi ciangin Israel mite kiangah, ‘Keimah TOPA ka hi a, Egypt-te hakkol nuai panin note kong paikhiatpih ding hi. Amaute khuta sila suahna pan kong tankhia dinga, khut zankhiatna le thukhenna vangliatna nasep tawh note kong tan ding hi.

⁷Note, ka mi dingin kong la dinga, note’ Pasian ka hi ding hi. Tua ciangin keimah TOPA note Pasian Egypt-te’ hakkol nuai pana hong lakhia pa ka hilam na thei ding uh hi.

⁸Keimah in Abraham tung, Isaac tung le Jacob tungah kong pia ding hi, ci-a khut zan-a ka ciamsa leitangah note kong puak ding hi. Note tanh dingin kong pia ding hi. Keimah TOPA ka hi hi, ci hi,’ ci-in gen un," a ci hi.

⁹Moses in hih thu Israel mite tungah ko a, ahi hangin amaute in amau lungkiatna le sila-a a kikhelbawlna hangin a thu a ngai nuam kei uh hi.

¹⁰Tua ciangin TOPA in Moses kiangah,

¹¹"Pai inla Egypt kumpipa Pharaoh kiangah, Israel-te ama gam panin a paikhiatsak nadingin va gen in," a ci hi.

¹²Ahi hangin Moses in TOPA kiangah, "Israel-te in ka thugen hong ngai lo uh ahileh bangci in Pharaoh in pau-awkpi-a ka thugen hong ngai ding ahi hiam?" d[14] a ci hi.

¹³Tu-in Egypt kumpipa Pharaoh le Israel-te tungtang thu TOPA in Moses le Aaron tungah gena, Egypt panin Israel-te a paikhiatpih dingun thu a pia hi.

¹⁴Hihte amau innkuan e[15] lutangte ahi hi: Israel’ ta upa pen Reuben pana piang ta pasalte Hanoch le Pallu, Hezron le Carmi. Hihte Reuben’ bawng’ ahi hi.

¹⁵Simeon’ tapate Jemuel, Jamin, Ohad, Jakin, Zohar le Canaan numei’ tapa Shaul ahi hi. Hihte Simeon’ bawng’ ahi hi.

¹⁶Hihte amau ciamtehna tawh kizui-a Levi’ tapate’ minte ahi hi: Gershon, Kohath le Merari ahi hi. Levi kum 137 a nungta hi.

¹⁷A beh zui-in Gershon’ tapate Lubni le Shimei ahi uh hi.

¹⁸Kohath’ tapate Amram, Izhar, Hebron le Uzziel ahi hi. Kohath kum 133 a nungta hi.

¹⁹Merari’ tapate Mahli le Mushi ahi hi. Hihte amau ciamtehna tawh kizui-in Levi’ bawng’te ahi hi.

²⁰Amram in a pa sanggamnu Jochebed tenpih a tuanu in amah tawh Aaron le Moses a nei hi. Amram kum 137 a nungta hi.

²¹Izhar’ tapate Korah, Nepheg le Zicri ahi hi.

²²Uzziel’ tapate Mishael, Elzaphan le Sithri ahi hi.

²³Aaron in Nahshon’ sanggamnu Amminadab tanu Elisheba tenpih-a, tuanu in amah tawh Nadab le Abihu, Eleazar le Ithamar a nei hi.

²⁴Korah’ tapate Assir, Elkanah le Abiasaph ahi hi. Hihte Korah-te bawng’ ahi hi.

²⁵Aaron’ tapa Eleazar in Putiel’ tanute khat tenpih a, tuanu in amah tawh Pinehas a nei hi. Hihte in a bawng’bawng’-a Levi’ innkuan lutangte ahi hi.

²⁶TOPA in, "Israel mite amau kikhenna tawh kizui-in Egypt pan paikhiatpih un," a cihna hih Aaron le Moses-te tung mah ahi hi.

²⁷Egypt kumpipa Pharaoh tungah, Egypt pan Israel-te paikhiatpih nading thu a gen amaute mah ahi hi. Tuate Moses le Aaron mah ahi uh hi.

²⁸Egypt ah TOPA in Moses kianga thu a gen lai-in,

²⁹ama kiangah, "Keimah TOPA ka hi hi. Nang tungah kong gen peuhmah Egypt kumpipa Pharaoh tungah gen in," a ci hi.

³⁰Ahi hangin Moses in TOPA tungah, "Pau-awkpi-a thugen ka hi tawh bang hangin Pharaoh in ka thugen ngai ding ahi hiam?" a ci hi.