Read Zokam Paikhiatna 7 Bible Online

Paikhiatna 7 - Zokam bible

Paikhiatna 7

¹Tua ciangin TOPA in Moses kiangah, "En in, Pharaoh tungah nang Pasian in kong bawla, na sanggampa Aaron na kamsangpa ahi ding hi.

²Kong sawl khempeuh nang na gen dinga, Aaron in Pharaoh tungah Israel mite ama gam pana a paikhiatsak ding a gen ding hi.

³Ahi hangin Pharaoh lungtang ka khauhsak dinga, Egypt ah a lamdang limte le nalamdang tampi ka bawl hangin

⁴amah in hong mang lo ding hi. Tua ciangin Egypt tungah ka khut ka nga dinga, a vanglian thukhennate zangin ka khenkhiattuam ka mi Israel-te ka paikhiatpih ding hi.

⁵Egypt langah ka khut zanin Israel-te ka paikhiatpih ciangin kei TOPA ka hilam Egypt mite in a thei ding uh hi," a ci hi.

⁶Moses le Aaron in TOPA thupiak bang tektekin a sem uh hi.

⁷Amaute Pharaoh tawh a kiho hunin Moses kum sawmgiat pha a, Aaron kum sawm giat le thum a pha hi.

⁸TOPA in Moses le Aaron tungah,

⁹"Pharaoh in note kiangah, ‘Nalamdang khat bawl un,’ hong cih ciangin Aaron kiangah, ‘Na ciangkhut la-in Pharaoh mai-ah lawn in,’ ci in, gul hong suak ding hi," a ci hi.

¹⁰Tua ciangin Pharaoh kiangah Moses le Aaron pai uh a, TOPA thupiak bang tektekin a hih uh hi. Aaron in Pharaoh le a uliante mai-ah a ciangkhut lawnsuka gul a suak hi.

¹¹Tua ciangin Pharaoh in mipilte le aisiamte sama, Egypt mitphial siamte in zong amau siamna tawh tua tawh kibang a hih thei uh hi.

¹²A ciangkhut tek lawnsuk uh a, gul a suak hi. Ahi hangin Aaron ciangkhut in amaute ciangkhut a valh tum hi.

¹³Tua hi napi TOPA gensa bangin Pharaoh lungsim khauhsak lai-a amaute thu angai tuan kei hi.

¹⁴Tua ciangin TOPA in Moses kiangah, "Pharaoh lungsim nem nai het lo hi; amah in a mite a paisak nuam kei hi.

¹⁵Zingsangin tui-ah Pharaoh a pai ciangin a kiangah va pai in. Amah tawh kituak dingin Nile gun gei-ah ngak inla, gul a suak na ciangkhut na khutin tawi in.

¹⁶Tua ciangin ama kiangah, ‘TOPA, Hebrew-te Pasian in nang kiangah kei hong sawla: Sehnel gam sungah kei hong biak theih nadingun ka mite paisak hen, ci hi. Ahi hangin tu hun dong na mang kei hi.

¹⁷Hih in TOPA gen ahi hi: Hih tawh keimah TOPA ka hilam na thei ding hi: Ka khut sunga ciangkhut tawh Nile guntui ka sat dinga sisan a suak ding hi.

¹⁸Nile sunga ngasate si dinga gun a uih ding hi. Egypt mite in guntui a dawn thei kei ding uh hi,’ ci in," a ci hi.

¹⁹TOPA in Moses kiangah, "Aaron kiangah, ‘Na ciangkhut la inla Egypt a tuite tung - luite le hawkguamte tung, bualte le tuikholnate tungah na khutzan in’ - tuate sisan a suak ding hi. Egypt mun khempeuh sing tuikuang le thambel sung nangawn ah sisan a om ding hi," a ci hi.

²⁰TOPA thupiaksa bangin Moses le Aaron in a hih uh hi. Amah in Pharaoh le a uliante muh in a ciangkhut lamto in Nile tui sat-a, tui khempeuh sisanin a kilaih hi.

²¹Nile sunga ngasate si-a gun namsia lua ahi manin Egypt-te in tui a dawn thei kei uh hi. Egypt mun khempeuhah sisan a om hi.

²²Ahi hangin Egypt mitphial siamte in amau siamna tawh tua bang mahin hih uh a, Pharaoh lungsim a khauhsak hi. TOPA cihsa bang tektekin amah in Moses le Aaron thu a ngai kei hi.

²³A ngaih sangsikin kileh in a kumpi inn sungah lut-a, ngaihsutin zong a nei beek kei hi.

²⁴Tua ciangin Egypt mite khempeuh in Nile dungah tui dawn ding a to uh hi; bang hang hiam cih leh amaute in guntui a dawn thei kei uh hi.

²⁵TOPA in Nile a sat zawh ni sagih cing khin hi.