Read Zokam Paikhiatna 9 Bible Online

Paikhiatna 9 - Zokam bible

Paikhiatna 9

¹Tua ciangin TOPA in Moses tungah, "Pharaoh kiangah pai inla, ‘Hih in TOPA Hebrew-te’ Pasian, cih ahi hi: Kei hong biak theih nadingun ka mite paisak hen,"

²Amaute na paisak nop kei a na letcip lai leh,

³TOPA khut in gamsunga na gante uh - na sakolte, na laate, na kala-ohte le na bawnghonte le na tuute le na keelte uh tungah a mulkim huai pulpi a tungsak ding hi.

⁴Ahi hangin TOPA in Israel-te tawh kisai ganhing peuhmah a sih loh nadingin Israel-te’ ganhing le Egypt-te aa deidanna khat ka nei ding hi,’ ci hi,’ va ci in," a ci hi.

⁵TOPA in hun khat seh a, "Zing ciangin TOPA in leitang ah hih a sem ding hi," a ci hi.

⁶A zing ciangin TOPA in a sem hi: Egypt-te’ ganhing khempeuh si a, ahi hangin Israel-te neihsa ganhing peuhmah khat beek a si kei hi.

⁷Pharaoh in a kantel dingin mite sawla, Israel-te’ ganhingte khat nangawn a sih loh lam a mu hi. Tua hi napi a lungsim nem tuan lo-a, mite pai ding a phal kei hi.

⁸Tua ciangin TOPA in Moses le Aaron tungah, "Pum meikhuk panin innking khutdim khat pham inla, Pharaoh muh in Moses in huih lakah lawn hen.

⁹Egypt gambup tungah leivuinel suak dinga gamsung khempeuh a mihingte le ganhingte tungah kizelin meimatum naitawm a suak ding hi," a ci hi.

¹⁰Tua ciangin amaute in pum meikhuk pana innking la-in Pharaoh mai-ah a ding uh hi. Moses in huih lakah lawna, mihing tung le ganhing tungah meimatum naitawm a kizelh hi.

¹¹Amaute tung le Egypt mi khempeuh tunga meimatumte hangin mitphial siamte Moses mai-ah a ding thei kei uh hi.

¹²Ahi hangin TOPA in Pharaoh lungsim khauhsak-a, TOPA cihsa bang tektek in Moses le Aaron thu a ngai kei hi.

¹³Tua ciangin TOPA in Moses kiangah, "Zingsangin tho baih inla Pharaoh maituahin ama kiangah, ‘Hih in TOPA Hebrew-te’ Pasian gen ahi hi: Ka mite in kei hong biak theih nadingun paisak in,

¹⁴ahikeh tu tungin nang tung, na uliante le na mite tungah kong gimsak nading a khauh pen kong tungsak dinga, tua ciangin leitung khempeuh ah kei tawh a kibang khatbeek a om loh lam na thei ta ding hi.

¹⁵Ahang in, tu mahmah in ka khut zankhia in, nang le na mite leitung pana hong phiatmang ding pulpi kong tungsak thei hi.

¹⁶Ahi hangin ka vangliatna le leitung khempeuhah ka min a kitangko theih nadingin hih thu hangin nang kong sangsak to b[17] hi.

¹⁷Nang mahmah in ka mite na langbawla, amaute pai ding na phal kei hi.

¹⁸Tua ahi manin tutunga pen zing ciangin, Egypt a kisat-a kipan tu dong gial kiasate sanga a nasia zaw gialpi ka kiasak ding hi.

¹⁹Inn-a om lo gamsunga om lai mihing ganhing peuhmah tungah gialpi kia-in amaute si ding uh ahi manin na gahhingte le gam sunga na neih khempeuh hawlin a liah ding omna mun khatah a omsak nadingin tu-in thu pia in, ci hi,’ ci-in gen in," a ci hi.

²⁰TOPA kammal a kihta Pharaoh uliante in manlangin a silate uh leh a ganhingte uh a sungah a koih uh hi.

²¹Ahi hangin TOPA kammal a thudon lote in a silate uh le a ganhingte uh gam sungah a hici omsak uh hi.

²²Tua ciangin TOPA in Moses kiangah, "Egypt tung khempeuh - mihing ganhing tung le Egypt-te lo-a po na khempeuh tungah gialpi a kiat nadingin na khut van lamah zankhia in," a ci hi.

²³Moses in a ciangkhut van lamah a viktoh ciangin TOPA in vanging le gialpi sawla leitungah khua a phiasuk hi. Tua ciangin TOPA in Egypt gam tungah gialpi a zusak hi;

²⁴Gialpi kia a, khua a phia tuah kawikawi hi. Egypt minam khata a om a kipan huihpi nasia pen ahi hi.

²⁵Egypt gam bupah lo-a na khempeuh - mihing ganhing a denggawp hi; lo sunga po khempeuh dengzan gawpa, singkung peuhmah a heuh khin hi.

²⁶Gialpi kiat lohna Israel-te omna Goshen gam bek ahi hi.

²⁷Tua ciangin Pharaoh in Moses le Aaron sam-a, amaute kiangah, "Tutungin ka khial hi, TOPA a man hi-a, kei le ka mite a khial ka hi uh hi.

²⁸Gialpi le vanging ka kham ta uh hi, TOPA kiangah thu ngen un. No kong paisak ta ding hi; tu-a ban na omlai ding uh kisam nawn lo hi," a ci hi.

²⁹Moses in, "Khuapi pan ka paikhiat ciangin TOPA kiangah thungenin ka khutte ka zak ding hi. Van ging nawn loin gialpi a kia nawn kei ding hi; tua ciangin leitung pen TOPA aa ahilam na thei thei ding hi.

³⁰Ahi zongin nang le na uliante in Pasian, TOPA na kihta nai kei lai uh hi, cih ka thei hi," a ci hi.

³¹(Pat a pak laitak hi-a, buhmante a vuih laitak ahi manin pat le buhman a kisia hi.

³²Mangbuh le mangbuh-ham min nunung ahi manin a kisia kei hi.)

³³Tua ciangin Moses in Pharaoh paisan-a, khuapi pua-ah a paikhia hi. Amah in TOPA lamah a khut a zan hi; vanpi ging le gialpi kia khawl a, leitungah guah a bua nawn kei hi.

³⁴Pharaoh in guah, vanpi ging le gialpi theu ta cih a muh ciangin a mawh kik hi. Amah le a uliante in a lungsim uh a khauhsak uh hi.

³⁵Tua ahi ciangin TOPA in Moses tungtawna a gensa bang tektekin Pharaoh lugsim khauh a, Israel-te pai ding a phal kei hi.