Read Zokam Job 1 Bible Online

Job 1 - Zokam bible

Job 1

¹Uz gamah Job min nei mi khat a teng hi. Hih mipa thutangin a pau baang kei hi; amah in Pasian kihta a gamtat hoih lo a pel hi.

²Amah in ta pasal sagih le ta numei thum nei a,

³tuu tul sagih, kala-oh tul thum, bawngtal kap zanga le laa zanga, le nasem tampitak a nei hi. Nisuahna gam mite khempeuh lakah a lian pen ahi hi.

⁴A tapate in amau inn ah a banbanin pawi bawl zel uh a, a nek a dawn khawmpih dingun a sanggam numei thumte a sam uh hi.

⁵Pawi bawl vial khat a kikhit ciangin Job in amaute samin a siansuah hi. Zingsang tungin amaute khat ciat adingin meihal biakna piaksak a, "Ka tate in mawhna bawla a lungsim uah Pasian a samsiat khak uh leh," cih a ngaihsutna ahi hi. Hih pen Job in a hunhunin ngeina-a a neih ahi hi.

⁶Ni khat TOPA mai-ah vansawltakte a[1] va om uh a, amaute tawh Satan b[2] zong a paikhawm hi.

⁷TOPA in Satan kiangah, "Koi pana hong pai na hi hiam?" a ci hi. Satan in TOPA kiangah, "Leitung mun khempeuh ah vakin ka vaksuk ka vaktohna pan hi," ci-in a dawng hi.

⁸Tua ciangin TOPA in Satan kiangah, "Ka nasempa Job na ngaihsun kha ngei hiam? Leitungah amah tawh kibang kuamah a om kei hi; amah thutangin paubaang lo a, Pasian a kihta gamtatsia a pel mi khat ahi hi," a ci hi.

⁹Satan in, "Job in a mawkna-in Pasian kihta ahi hiam?" ci-in dawng a,

¹⁰"Amah le a innkuanpihte le a neihsa khempeuh kimkotah dai kai zo hi lo na hi hiam? A khuta a septe thupha na pia a, a tuuhonte le a bawnghonte mun tengah kizel hi.

¹¹Ahi hangin na khut zanin a neihsa khempeuh suksak lecin na maitangah hong hamsiat taktak ding hi," ci-in a dawng hi.

¹²TOPA in Satan kiangah, "Tua ahileh pha hi, ama neihsa khempeuh nang thu hihen; ahi hangin mipa tungah na khutme zong na nga kei ding hi," a ci hi. Tua ciangin TOPA’ omna pan Satan a pai khia hi.

¹³Ni khat Job tanute le tapate a sanggam upenpa uh inn ah pawi bawlin zu a dawn laitakun,

¹⁴Job kiangah kamtai khat tunga, "Lo kho kimlai bawngtalte le a kianga gamta laate

¹⁵Sabe mite in hong simin tuate hawlmang khin uh hi. Amaute in nasemte namsau-in that uh a, nang hong ko dinga suakta kei kia bek ka hi hi!" a ci hi.

¹⁶A gengen laitakin kamtai dang khat tunga, "Vantung pan Pasian meikuang hong kiasukin tuute le nasemte kangtum a, nang hong ko dinga suakta kei kia bek ka hi hi!" a ci hi.

¹⁷A gengen laitakin kamtai dang khat mah tung lai a, "Chaldea mite pawlthum in hong sim uh a kala-ohte manin a paipihmang uh hi. Amaute in nasemte namsau-in ban uh a, nang hong ko dinga suakta kei kia bek ka hi hi!" a ci hi.

¹⁸A genkhin nai loin kamtai dang khat mah hong tung lailai a, "Na tanute le na tapate in pawi bawl uh a, na tapa upa pen inn ah zu a dawn laitakun

¹⁹sehnel-gam lam pan huih khauh khat nungvatin, inn pumpi mutpai hi. Inn in puknelha, amaute si khin uh hi; nang hong ko dinga suakta kei kia bek ka hi hi!" a ci hi.

²⁰Tua takteh, Job ding to-a a puantualpi balkekin a lu a mettol hi. Tua ciangin leitual ah boksukin bia a,

²¹"Ka nu sung pan guaktangin ka suaka, guaktang mah in ka ciah a[3] kik ding hi. TOPA in hong pia a, TOPA mah in lakhia khin hi; TOPA min kiphat hen," a ci hi.

²²Hihte khempeuh ah Pasian mawh sakna tawh Job a mawh kei hi.