Read Zokam Job 10 Bible Online

Job 10 - Zokam bible

Job 10

¹Ka nuntakna mahmah ka cimtak hi; tua ahi manin ka ututin ka phun dinga ka lunggimna ka genkhia ding hi.

²Pasian kiangah: Kei hong mawhpaih kei inla nong mawhsakna hong gen in, ka ci ding hi.

³Kei hong kinengniam a, na bawlsate kisimmawhbawlin migilote ngimna na maitaipih ciangin na lungkim ahi hiam?

⁴Ci-le-sa mit nei na hi hiam? Mihing muh bangin mu na hi hiam?

⁵Na nite mihingte aa bang, ahikeh na kumte mihingte aa bang ahi hiam?

⁶Ka khialhnate zongin bang hangin ka mawhna hong sulzuih na hi hiam?

⁷Mawhna ka neih loh lam, na khut panin hong honkhia zo kuamah a om loh lam, thei hi lo na hi hiam?

⁸"Na khut in kei hong geelin nong bawl hi. Tu-in kei hong susia zel ding na hi hiam?

⁹Tungman bangin kei nong seek lam phawk in. Tu-in leivui hong suaksak zel ding na hi hiam?

¹⁰Nawitui bangin kei nong sungkhia a, nawikhal bangin nong khalsak a,

¹¹vun le satakin nong tuam a, guh le thagui-in hong khuituah hi lo na hi hiam?

¹²Hong nungtasakin, migitna nong lak a, nangma huaina sungah kei ka nungta hi.

¹³"Ahi hangin hih in na lungsima na selsiah hi a, hih pen na lungsim ahilam ka thei ta hi:

¹⁴Ka mawh leh nong vil gige a, ka mawhna dan pan nong pengsak kei ding hi.

¹⁵Ka khialhkhak leh thuak mah ning! Mawhpenga ka om nangawnin ka lu ka phong thei kei hi; ahang in, ka mai zum lua a, gim thuakna sungah a[18] ka kia hi.

¹⁶Ka lu phongkaang pan leng humpinelkai bangin nong gem khiankhian a, a kihtak huai na vangliatna nong tungsak hi.

¹⁷Kei hong langpan ding teci thak nong puak a, kei tungah na heh semsem hi. Kei lamah na hatna a hualhualin hong tung hi.

¹⁸"Bang hangin sul sung pan hong pusuakkhiasak peuhmah na hi hiam? Kuama hong muh ma-in si leng ka ut hi.

¹⁹Mihinga piang vet lo, ahikeh sul sung panin han a zuanpah hizaw leng maw!

²⁰Ka hun tomno beikuan ta hi lo ahi hiam? Tomno sung nuam ka sak theih nadingin kei kiang pan kihemkhia in.

²¹Kuamah a kileh kik nawn lohna mun, khuamial le niliap b[19] thukpi in a tuamcipna mun,

²²zan khuamial penpenna mun, niliap thukpi, khuavak nangawn khuamial tawh a kibatna mun ka tun ma-in tomvei sung ka lungnop nadingin kei hong nusia in," a ci hi.