Read Zokam Job 11 Bible Online

Job 11 - Zokam bible

Job 11

¹Tua ciangin Naamath mi Zophar in dawng a:

²"Na kampau khempeuh hong kidawng lo ding sa na hiam? Hih kamtampa mawh kipengsak ding hiam?

³Ciakciakna in mite daisak tuam ding sa na hi hiam? Simmawhna kam na pau ciangin hong kitai lo tuam ding sa na hiam?

⁴Pasian kiangah, ‘Ka upnate genbaang lo a, na muhna ah ka siangtho hi,’ na ci hi.

⁵Tazen teh, nang langah Pasian kamka-in hong pau ek leh ut siing!

⁶Tua hileh pilna thusimte nang tung hong pulakin, pilna maan in pang nih a neih lam hong gen ding hi. Pasian in na mawhna pawlkhat nangawn a mangngilh lam thei in.

⁷"Pasian thusimte lam teh thei na hi hiam? Vanglianpa thu gensiang thei ding na hi hiam?

⁸Vantungte sangin amaute sangzaw uh hi - nang bang hih thei na hi hiam? Hankhuk c[20] thukna sangin amaute thukzaw uh hi - nang bang thei na hi hiam?

⁹Leitung sangin amaute sauzaw uh a, tuipi sangin zaizaw uh hi.

¹⁰"Amah hong pai-in thong sungah hong khum henla, thukhen zumkhat sam leh kua in amah nang zo ding hiam?

¹¹Amah in zuauphuak mite phawk vilvel hi; tuateh gamtat hoih lo a muh ciangin ciamteh lo sa na hiam?

¹²Ahi hangin gamsung laate mihing d[21] a suah theih loh bangin mihaipa mipil suak thei lo hi.

¹³"Hi taleh ama tungah na lungsim apin, ama lamah na khut zankhia lecin,

¹⁴na khut sunga om mawhna koihkhia-in, na buk sungah gamtat hoih lo tumsak kei lecin,

¹⁵tua ciangin zum loin na lu na phong to dinga, lau loin kiptakin na ding ding hi.

¹⁶Na lungkhamnate na mangngilh kiuhkeuh dinga, tuisik luangmang a bang ding hi.

¹⁷Na nuntakna sun laitak sangin vakzaw dinga, khuamialna zingsang a bang ding hi.

¹⁸Lametna om ahi manin nang na bit ding hi; na kim na pam na khuadakdak dinga, lungmuangin na tawlnga ding hi.

¹⁹Kuama lausak lohin na lum hithiat dinga, mi tampi in nang hong maivil ding uh hi.

²⁰Ahi hangin migilote in hong en ngam lo ding uh a, suakta loin amaute lametna pen kha-awhna suak ding hi," a ci hi.