Read Zokam Job 13 Bible Online

Job 13 - Zokam bible

Job 13

¹"Hihte khempeuh ka mitin ka mu khina ka bilin ka za khin a, ka thei khin hi.

²No theihte ken zong ka thei hi. No sangin ka niamzaw tuan kei hi.

³Ahi hangin Vanglianpa tawh ka kiho nuam a, Pasian tawh ka thu ka kikum nuam hi.

⁴Bangbang ahi zongin zuauthu-in nong melhbawl uh hi; note navekun kimanna nei lo zato siamte na hi uh hi.

⁵Note na vekun dai tapeuh dih un! Mipil na tangzaw ding uh hi.

⁶Tu-in ka thugen za unla, ka muka ka thumna ngai dih un.

⁷Pasian tangin kam gilo pau ding na hi uh hiam? Ama adingin zuauphuak ding na hi uh hiam?

⁸Amah angvan sawm na hi uh hiam? Pasian tangin phutsak sawm na hi uh hiam?

⁹Note hong sittel leh gina takpi ding na hi uh hiam? Mi na khem bangun amah khem thei ding na hi uh hiam?

¹⁰A simthamin mi na deidan vial uh leh hong tai taktak ding hi.

¹¹Ama thupina in nang hong lausak lo ding ahi hiam? Amah kihtakna nang tungah hong tu lo ding hiam?

¹²Na thu tomlaknate uh, vut paunak hi a; na kihutnate uh lah tungman kihutna ahi hi.

¹³"Na dai unla kei hong gensak dih un; tua ciangin a piang bangbang a piang hi mai hen.

¹⁴Bang hangin kei le kei a lauhuai munah kikoih in, ka nuntakna ka khutah koih ka hi hiam?

¹⁵Amah’n kei hong thah leh zong amah ka lamen lai hi; a maitang ah ka ngaihsutna ka puak taktak a[24] ding hi.

¹⁶Ama mai-ah pasian nei lote pai ngam lo uh ahi manin hih in kei kihutna hong lehsuah ding hi.

¹⁷Ka kammalte limtakin ngai dih un; ka gente na bil uh na dawh dih un.

¹⁸Tu-in ka thu sung dingin ka kithawi zo hi; ka thu ka zawh ding ka thei hi.

¹⁹Mi khatpeuh kei langah pang thei ding ahi hiam? A tuacih theih leh pau loin ka si ding hi.

²⁰"Pasian aw, hih thunih bek hong pia in, tua ciangin nang kong buksan kei ding hi:

²¹Kei tung pan gamlapi ah na khut dokkik inla, na lauhuainate-in hong linthawn nawn kei in.

²²Tua ciangin hong hopih in, kong dawng ding hi; Ahikeh ken hong hopih ning in nang hong dawng in.

²³Mawhna le khialhna bangzah bawl khin ka hi hiam? Ka mawhna le ka thupalsatnate hong lak in.

²⁴Bang hangin na mai selin na gal banga hong ngaihsun na hi hiam?

²⁵Huih mutsa singteh khat gawt ding na hi hiam? Anvai keu khat nungdelh ding na hi hiam?

²⁶Ahang in, kei langdona a hoih lo tampi na gelh khin a, ka neu lai-a ka mawhnate nong luahsak hi.

²⁷Ka khete sikkolpi in na hen hi; ka khekhap na ciaptehna tawh ka paina khempeuh ah naitakin nong encik hi.

²⁸Tua hi-a amuat na khat le nget nek puan bangin mi khat a beibei hi.