Read Zokam Job 15 Bible Online

Job 15 - Zokam bible

Job 15

¹Tua ciangin Teman mi Eliphaz in dawng a:

²"Mipil khat in a cihnopna kithei lopi in mi dawng ngei ahi hiam, ahikeh nisuahna huih-sa in a gilpi vahsak ding hiam?

³Kimanna nei lo kammalin mi sel a, phattuamna om lopi kampau ahi hiam?

⁴Ahi hangin nang, biakna-mi hih ding na sumai-a, Pasian tunga ki-ap ding na dal hi.

⁵Na mawhna in na kam manlangsak a; khembawlna leii na zang hi.

⁶Na kam in kei hong mawhpaih loin nang hong mawhpaih hi; na langkhatah na muk in teci pang hi.

⁷"Nang bek mihing a piang kisa na hi hiam? Mualte pianma-in hong kibawl khia khin ahi hiam?

⁸Pasian vaihawmna zasim na hi hiam? Nang bek pilna nei na hi hiam?

⁹Kote theih loh bang thei na hi hiam? Kote neih zawh loh bang thugil nei na hi hiam?

¹⁰Na pa sang nangawn-a upazaw khangham-a samkangte ko lamah pang uh hi.

¹¹Pasian in nang hong hehnem a kamkhuma hong hopihnasa kicing sa nai lo na hiam?

¹²Bang hangin na lungtang in hong pimang a, mit sat khapkhap in

¹³Pasian tungah tua bang hehluatna kam na muk panin paukhia na hi hiam?

¹⁴"Numei pana piangkhia peuhmah a siantho nading ahikeh a thumaan nadingin mihing bang sa mawk na hiam?

¹⁵Pasian in ama misiangthote muang loin ama mitah vantungte nangawn siangtho lo ahileh,

¹⁶gitlohna tui banga a dawn, a siahuai, bangmah a man lo mihing nak ginat kei zaw na’n cia!

¹⁷"Ken zong hong gencian ning, na ngai dih in; ka muhsate hong gensak dih in;

¹⁸Hih in mipilte thugen hi a, a pate uh tung pana a ngahte uh a ip hetloh uh hi a

¹⁹(tua in amaute tung bekah a gam uh kipia in, amaute lakah pemtate a om ma-a kipia ahi hi):

²⁰Migilo in a nuntak sung thuaksiatna tuak a, a nuntak kum tawntung ngongtatna a thuak ding hi.

²¹Patauhna aw a bil ah gingden a, a nuamsa a bat laitakin buluhte in luh ding uh hi.

²²Khuamial pan suahtak nading lametna om lo a, namsau-a thah dingin ciamtehsa ahi hi.

²³Musanete a[28] an dingin - a vak kawikawi hi a, a tungah khuamial a tunpah ding lam a thei hi.

²⁴Lungdonna le lungtawlna in amah linthawn hi; galsim dinga kithawisa kumpipa bangin tuate in a lungsim a zen hi.

²⁵Bang hang hiam cihleh amah in Pasian lamah a khuttum liika, a Thahatpa langkhat ah kiphasak in,

²⁶ama langah a sah a khauh lum tawi-in khauhtakin a do hi.

²⁷"A maitang thau-in a kawng sa dimin pek khilkhel zawzen zongin

²⁸kuama ten lohna inn siasa tawh a kidim khuapi siasa ah a teng ding hi.

²⁹Amah hau nawn lo dinga, a neihsate kip loin a neihsate zong leitungah a kizel nawn kei ding hi.

³⁰Amah khuamial pan a suakta kei ding hi; ama mengte meikuang in hultum dinga, Pasian kam pana huu in amah pimang ding hi.

³¹Man nei lo khat muangin amah le amah kikhem kei hen, ahang in, bangmah a lawhtak kei ding hi.

³²Ama hun a tun ma-in a cingin kipia dinga, ama hiangte a meng nawn kei ding hi.

³³A gah a min ma-a kizuutkhia lenggah bang dinga, a pakte a pulh khin olive kung bang ding hi.

³⁴Ahang in, Pasian neilote tawh a kipawlte tasel ding uh a, golhsum lak nuam sate puanbuk mei in a hultum ding hi.

³⁵Amaute in buaina paii in gitlohna suakkhia uh hi; amaute’ sul in khemna a piangsak hi," a ci hi.